မဲခေါင်၊ မေ ၁၆
ရှမ်းပြည်တောင်ပိုင်းတွင် ဂေါ်ဖီထုပ်ပေါ်သည့်ရာသီ၌ ဝယ်သူမရှိ၊ ဈေးနှုန်းမရှိသည့် အခြေအနေမျိုးထိ ကြုံနေရကြောင်း ရှမ်းတောင် ဒေသခံတောင်သူများထံမှ သိရသည်။
အောင်ပန်း၊ ပင်လောင်း၊ ဟဲဟိုး၊ ရွာငံနှင့် ပင်းတယဒေသများတွင် ဂေါ်ဖီထုပ် ခူးဆွက်ချိန်ဖြစ်သည့် မေလဆန်းမှ စတင်ကာ အဝယ်မရှိသလောက် နည်းပါးပြီး ပေးသည့်ဈေးနှုန်းမှာလည်း ခြံဖြတ်ဈေးတစ်ထုပ်လျှင် ကျပ် ၁၀၀ခန့်သာရှိကြောင်း၊ ယခင်နှစ်က မေလဆန်းခြံဖြတ်ဈေးမှာ တစ်ထုပ်လျင် ကျပ် ၁၂၀၀မှ ကျပ် ၁၅၀၀အထိ ဈေးရကြောင်း အောင်ပန်းဒေသခံတစ်ဦးက မဲခေါင်ကိုပြောသည်။
“ဂေါ်ဖီထုပ်က ဝယ်သူမရှိပဲ။ ဂေါ်ဖီထုပ်တွေက ကောင်းပေးမယ့် ခုတ်သမားတောင် မရှိဘူး။ ဈေးကလည်းနည်းပြီး ဝယ်သူ မရှိဘူး” ဟု ၎င်းကပြောသည်။
၂၀၂၃ခုနှစ်က ဂေါ်ဖီတစ်ထုပ်လျှင် ခြံဖြတ်ဈေး ကျပ် ၄၀၀-၅၀၀ဝန်းကျင်၊၂၀၂၄ ခုနှစ်တွင် ကျပ် ၁၂၀၀-၁၅၀၀ ဝန်းကျင်အထိ ရရှိကြသော်လည်း ယခုနှစ် မေလ ခြံဖြတ်ဈေးမှာ ကျပ် ၁၀၀ ဝန်းကျင်တွင်သာ ရှိနေပြီး အောင်ပန်းကုန်စည်ဒိုင်တွင် တစ်ထုပ် ကျပ် ၆၀၀-၁၀၀၀ ဝန်းကျင်တွင် ဈေးရှိနေသည်။
ယခင်နှစ်များက ရွာငံဒေသမှ ထွက်ရှိသည့် ဂေါ်ဖီထုပ်များကို မန္တလေးမြို့သို့ တိုက်ရိုက်ရောင်းချခဲ့ကြသော်လည်း ပြီးခဲ့သည့် မတ်လက ပြင်းထန်သည့် ငလျင်ဒဏ်ခံရခြင်း၊ မန္တလေးမှ တဆင့် ပြန်လည်ဖြန့်ဖြူးသည့် စစ်ကိုင်း၊ ကချင်လမ်းကြောင်းများလည်း ပိတ်သွားခြင်းတို့ကြောင့် အဝယ်လျော့သွားကြောင်း၊ ထို့ကြောင့် ရွာငံတောင်သူများမှာ အောင်ပန်းကုန်စည်ဒိုင်သို့သာ လာရောက်ရာင်းချသည့်အတွက် ရှမ်းတောင်ဒေသတခုလုံးရှိ စိုက်ပျိုးထားသည့် ဂေါ်ဖီထုပ်များ စုံပြုံလာကာ ဈေးနှုန်းပါမရရှိတော့ခြင်းဖြစ်ကြောင်း နယ်ခံပွဲစားတစ်ဦးက ပြောဆိုသည်။
“ဒီဖက်မှာ အခင်းတွေကို လာကြည့်တဲ့သူတောင် မရှိတော့ဘူး။ ပွဲစားတွေကို ကားနဲ့ သွားခေါ်တာတောင် မလိုက်ကြဘူး” ဟု ၎င်းက ပြောသည်။
ဂေါ်ဖီစိုက်တောင်သူများအနေဖြင့် ဂေါ်ဖီတစ်ထုပ်လျှင် ခြံဖြတ်ဈေး ကျပ် ၂၀၀၀ ခန့်ရရှိမှသာ တွက်ခြေကိုက်မည်ဖြစ်ပြီး လက်ရှိဈေး ကျပ် ၁၀၀မှာ အလုပ်သမားခပင် မရှိသည့်အတွက် ခြံအတွက် မြေဩဇာအဖြစ်သာ ခုတ်ထွင် ရှင်းလင်းနေကြသည်။
ရှမ်းပြည်တောင်ပိုင်းတွင် ဂေါ်ဖီစိုက်ပျိုးသည့် ဧက တစ်သောင်းကျော်ရှိပြီး တစ်ဧကလျှင် အထွက်နှုန်း ၆၅၀၀ ပိသာ အထက် ထွက်ရှိကြောင်း စိုက်ပျိုးရေးဌာန အချက်အလက်များအရသိရသည်။
#MeKongNews
#ရှမ်းတောင်
#ဂေါ်ဖီထုပ်
#စံချိန်တင်ဈေးကျ
#အောင်ပန်းကုန်စည်ဒိုင်
