မဲခေါင်၊ မေ ၁၃
ရှမ်းပြည်မြောက်ပိုင်းရှိ SSPP ထိန်းချုပ်ထားသည့် စိန်ကျော့တပ်စခန်းသို့ ဦးတည်ထားသည့် လမ်းကြောင်းအားလုံးကို ကိုးကန့် MNDAA က ယနေ့မေလ ၁၃ ရက် နံနက်ပိုင်းအထိ နေရာယူ တပ်စွဲထားဆဲဖြစ်ကြောင်း စုံစမ်းသိရသည်။
ပြီးခဲ့သည့် ဧပြီလ ၂၈ ရက်က သီပေါမြို့နယ် နမ္မကျောက်မီးသွေးတွင်း၌ စတင်ဖြစ်ပွားခဲ့သည့် SSPPနှင့် MNDAA တို့အကြား စစ်ရေးပဋိပက္ခသည် ယခု သီတင်း ၂ပတ်ကျော် ကြာသည်အထိ ဆက်လက်တင်းမာနေပြီး SSPP ထိန်းချုပ်မှုအောက်ရှိ စိန်ကျော့တပ်စခန်းသို့ ဦးတည်ထားသည့် လမ်းကြောင်းအားလုံးတွင် ကိုးကန့်တပ်ဖွဲ့ MNDAA က နေရာယူ တပ်စွဲထားဆဲဖြစ်ကြောင်း ဒေသခံများက ပြောသည်။
“နမ္မကနေ စိန်ကျော့၊ မိုင်းရယ်ဘက်က ဟိုတိ၊ သီပေါဘက်က ပန်ညုလမ်းတွေ မှာ ကိုးကန့်တပ်တွေ ရှိနေဆဲပဲ။ ညှိတာ အဆင်မပြေလို့ တိုက်ပွဲတွေ ပြန်ဖြစ်မှာ စိုးရိမ်နေကြတယ်” ဟု သီပေါဒေသခံတစ်ဦးက မဲခေါင်ကို ပြောသည်။
MNDAA က အင်အားရာချီဖြင့် မေ၁ရက်မှစကာ SSPP ၏ ထိန်းချုပ်ရာဒေသဖြစ်သော တာလုံကျေးရွာနှင့် လွိုင်ငင်းကျေးရွာအနီးသို့ စစ်ရေးချဲ့ထွင်ခဲ့သလို မေ ၃ ရက်တွင်လည်း သီပေါမြို့ နယ်၊ ကုန်းဆာကျေးရွာ (ဆွတ်လှိုင်း)ရှိ ကျေးရွာသားများအား စစ်စည်းရုံးရေးအစည်းအဝေး ပြုလုပ်ခဲ့သည်ဟု ဒေသခံများက ပြောသည်။
မေလဆန်းပိုင်းတွင် UWSA ထိန်းချုပ်ထားသည့် ပန်ဆန်း၌ FPNCC အဖွဲ့ဝင်အချင်းချင်းအနေဖြင့် နှစ်ဘက်တွေ့ဆုံ ဆွေးနွေး ညှိနှိုင်းမှုများတွင် စိန်ကျော့၊ နမ္မ၊ ဟန်နားတို့မှ MNDAA က ဆုတ်ပေးလျင် မူဆယ်၊ ကွတ်ခိုင် တကြောရှိ SSPP တပ်စခန်းများကို ဆုတ်ခွာပေးရန်၊ ပြည် ထောင်စုကားလမ်းမကြီးတလျှောက် SSPP မှ အခွန်ကောက်ခံခြင်း မပြုလုပ်ရန်တို့ တောင်းဆိုခဲ့ခြင်းကြောင့် သဘောတူညီမှု တစုံတရာ မရရှိခဲ့ဘဲ အစည်းအဝေးပြီးဆုံးခဲ့သည်ဟု ဒေသများထံက သိရသည်။
SSPP ထိန်းချုပ်မှုအောက်ရှိ စိန်ကျော့တပ်စခန်းကို ဧပြီလ ၂၉ ရက် ညနေပိုင်းတွင် ကိုးကန့်တပ်ဖွဲ့ MNDAA မှ ထိန်းချုပ်နိုင်ခဲ့ကြောင်း ဒေသခံများက ဆိုသော်လည်း ဧပြီလ ၃၀ ရက်တွင် SSPP မှ ပြန်လည်ထိန်းချုပ်နိုင်ခဲ့ကြောင်း SSPP Info မှ သတင်းထုတ်ပြန်ထားသည်။
ယင်းထုတ်ပြန်ချက်တွင်ပင် သီပေါမြို့နယ်အတွင်းက SSPPတပ်စခန်းများရှိသည့် နားနန်း၊ နားတော်၊ ခိုနန်းဖ၊ တင်းဟိုင်း၊ ဆင်ကျော့၊ နားတောင့်၊ နားမခေါ်၊ ဖာစေ စသည့် ကျေးရွာနေရာများကို ကိုးကန့် MNDAA မှ အင်အားဖြည့်တင်းမှုများ ပြုလုပ်ခဲ့ပြီး နှစ်ဖက်တပ်ဖွဲ့ စစ်ရေးတင်းမာသည့် အခြေအနေများ ရှိနေကြောင်းလည်း သတင်းထုတ်ပြန်ထားသည်။
မဟာ
#MeKongNews
#စိန်ကျော့
#SSPP
#MNDAA
#သီပေါ
#နမ္မ
