မဲခေါင်၊ မေ၅
တရုတ်အကူအညီဖြင့် လားရှိုးမြို့ကို ပြန်လည်ထိန်းချုပ်နေသည့် စစ်ကောင်စီက မေလ ၄ ရက်တွင် မြို့လုံးကျွတ် ကမ္မဝါစာနှင့် အန္တရာယ်ကင်းပရိတ် မြို့တွင်းလှည့်လည် ရွတ်ဖတ်ပူဇော်ခြင်းပြုလုပ်ခဲ့ကြောင်း ဒေသခံများထံမှ သိရသည်။
လားရှိုးမြို့ကို ပြန်လည်စီမံခန့်ခွဲမည့် စစ်ကောင်စီ၏ အရပ်ဖက် တာဝန်ရှိသူများအဖြစ် ပြည်နယ်အထွေထွေအုပ်ချုပ်ရေးမှူး ဦးမြင့်သန်းဝင်း၊ ခရိုင်အထွေထွေအုပ်ချုပ်ရေးမှူး ဦးမျိုးမင်းထွန်းနှင့် မြို့နယ်အထွေထွေအုပ်ချုပ်ရေးမှူး ဦးဇော်နိုင်ဦးတို့က တာဝန်ယူလျက်ရှိကြောင်း၊ မေလ ၄ ရက်တွင် မန်ဆူကျောင်းဆရာတော်ဦးဆောင်ကာ မြို့အတွင်း လှည့်လည်ပရိတ်ရွတ်ခဲ့ကြောင်း၊ ထွေအုပ်ရုံးများမှ လားရှိုးမြို့ပေါ်ရှိ စစ်ဘေးဒဏ်သင့် အဆောက်အဦများစာရင်း လိုက်လံကောက်ယူနေကြောင်း သိရသည်။
လက်ရှိတွင် တကျော့ပြန် အရှေ့မြောက်တိုင်းစစ်ဌာနချုပ်၏တိုင်းမှူးမှာ ဗသက ၉၄ ဆင်း ဗိုလ်မှူးချုပ်အေးမင်းဦးဖြစ်ပြီး ယမန်နေ့ မေလ ၄ ရက် ည ၉ နာရီခန့်တွင် MI – 35 တိုက်ခိုက်ရေး ရဟတ်ယာဥ်တစ်စီး တိုင်းစစ်ဌာနချုပ်ထဲမှ စတင်လှုပ်ရှား ပျံသန်းခဲ့ကြောင်း CDM ဗိုလ်ကြီး ဇင်ယော်က ပြောသည်။
ယခင် ရမခစစ်တိုင်းလက်အောက်ခံ တပ်ရင်း၊ တပ်ဖွဲ့ ၂၁ ခု ရှိခဲ့ရာ ထပရ – ၆၂၆ အပါအဝင် တပ်အချို့မိသားစုဝင်များပါ ပြန်လည်ရောက်ရှိ နေထိုင်နေပြီဖြစ်ကြောင်း သိရသည်။
လားရှိုးခရိုင်ရဲရုံးလည်း အမှုများ မေလ ၄ ရက်မှ စကာ လက်ခံဆောင်ရွက်နေကြောင်း သိရသည်။
လားရှိုး ခုတင် ၅၀၀ ဆေးရုံကြီးတွင် ပြင်ပလူနာကုဌာနအပြင် ယနေ့၌ အထွေထွေ လူနာဆောင်များ စတင်ဆောင်ရွက်နေကြောင်း သိရသည်။
“မြို့တော်ခန်းမရှေ့တော့ ယာဥ်ထိန်းတွေ လမ်းရှင်းနေပြီ။ စည်ပင်တွေလည်း အမှိုက်ရှင်းနေတာတွေ့တယ်။ လောလောဆယ်တော့ ၂ တပ်လုံး မြို့ပြင် မြို့ထွက် ဝါးနှစ်ပြန်လောက်မှာ ရှိနေကြတယ်” ဟု အငှားယာဥ်မောင်တစ်ဦးက ပြောသည်။
လားရှိုးမြို့သူ၊ မြို့သားများ အမှန်တကယ်လိုအပ်နေသည့် လျှပ်စစ်မီးအပြည့်အဝ ပြန်လည်ရရှိရေး၊ စက်သုံးဆီစျေးနှုန်း ကျဆင်းရေး၊ ကျန်းမာရေးစောင့်ရှောက်မှု အပြည့်အဝရရှိရေး၊ လုံခြုံစိတ်ချသော လူနေမှုဘဝ ပြန်လည်ရရှိရေး၊ အခြေခံကုန်စျေးနှုန်းများ ကျဆင်းရေးတို့ကို ယခု ပြန်လည်ထိန်းချုပ်လာသည့် စစ်ကောင်စီမှ ဖော်ဆောင်ပေးနိုင်ရန် မျှော်လင့်နေကြကြောင်း လားရှိုး ရပ်ကွက် ၉ နေသူတစ်ဦးက ပြောသည်။
“ပြည်သူလူထု ဆိုတာ ကိုယ့်လိုလားချက်၊ ကိုယ့်လိုအပ်ချက်တွေကို အမြန်ဆုံးနဲ့ အမှန်ကန်ဆုံး ဖြည့်ဆည်းပေးနိုင်မယ့် အုပ်ချုပ်သူတွေကိုပဲ လိုလားကြိုဆို လက်ခံကြမှာပဲ။ ဟိုလူလာပြီး အုပ်ချုပ်ပါ၊ ဒီလူလာပြီး အုပ်ချုပ်ပါ၊ ဒီလူကို မကြိုက်ဘူး၊ ဟိုလူကိုပဲ ကြိုက်တယ်လို့လည်း ရွေးချယ်ပိုင်ခွင့် မရှိတာမို့ ရှိတဲ့လူ၊ လာတဲ့လူတွေရဲ့ လုပ်ဆောင်နိုင်မှုကိုပဲ အကဲဖြတ်ပြီး အကောင်းဆုံးကို မျှော်ရတာပါပဲ” ဟု ၎င်းက ပြောသည်။
လားရှိုးမြို့ကို တရုတ်အကူအညီဖြင့် ဧပြီလ ၂၁ ရက် တွင် စစ်ကောင်စီက ပြန်လည်ဝင်ရောက်လာပြီးနောက် ထိန်းချုပ်မှုလုပ်ငန်းများ စတင်လုပ်ဆောင်နေရာ ယနေ့မေလ ၅ ရက်နေ့အထိ အခြေအနေဖြစ်သည်။
မဟာ
#MeKongNews
#လားရှိုး
#အန္တရာယ်ကင်းပရိတ်
#မန်ဆူကျောင်း
#အုပ်ချုပ်ရေး
