မဲခေါင်၊ ဧပြီ ၈
အင်းလေးဒေသမှ ငလျင်ဒဏ်သင့်ရွာအချို့ ငလျင်သင့်ပြီး ၁၀ ရက်ကျော် ကြာသည်အထိ အကူအညီများ မရရှိသေးသဖြင့် ရေသန့်မှအစ နေစရာတဲအိမ်အထိ အခက်ကြုံနေရကြောင်း ဒေသခံများထံမှ သိရသည်။
အခက်အခဲကြုံနေသည့် ကျေးရွာများမှာ သာလေး၊ အိုးကုန်း၊ လယ်ခြေ စသည့် ဖော်တော်ဦးဘုရား တောင်ဘက်ရွာများဖြစ်ပြီး စေတနာရှင်ကူညီသူများ လာရောက်မှု မရှိသလောက် နည်းပါးသဖြင့် ရေသန့်မှအစ လိုအပ်ချက်များ ရှိနေသည်ဟု ဒေသခံများက ပြောသည်။
“ပျက်စီးသေဆုံးစာရင်းတွေ မီဒီယာတွေက ဖော်ပြလာတာမှာ ကျမတို့ရွာတွေမပါဘူး။ လှူသူ အနည်းအကျဥ်းပဲ၊ ခုထိရေသန့် ၂ ဘူး၊ ခေါက်ဆွဲခြောက် ဒါလေးပဲ ရဘူးတယ်။ မိုးကလည်း စရွာလာတော့ မိုးကာတွေကမလုံနဲ့ အားလုံးကြောက်နေကြတယ်” ဟု အိုးကုန်း ရွာခံတစ်ဦးက မဲခေါင်ကိုပြောသည်။
စစ်ကိုင်းငလျင်လှုပ်ခတ်မှုကြောင့် သလေးအုပ်စုတွင်ပါဝင်သော ကုန်းတစ်ပိုင်း၊ ရေတစ်ပိုင်းရွာများဖြစ်သည့် သာလေး၊ အိုးကုန်း၊ လယ်ခြေ၊ ဖွဲ့ကုန်း၊ ကန့်လန့်ရွာများရှိ အိမ်ခြေ ၃၇၁ အိမ်အနက် ပြိုလဲ ၃၁ အိမ်၊ ပျက်စီး ၁၂၁ အိမ်နှင့် သေဆုံး ၃ ဦး၊ ဒဏ်ရာရ တစ်ဦးရှိခဲ့ကြောင်း သိရသည်။
ယင်းကျေးရွာများတွင် အားထားရသည့်ရေသန့်စက်မှာလည်း ပျက်စီးသွားသည့်အတွက် သောက်သုံးရေလည်း လိုအပ်သလို စားနပ်ရိက္ခာ၊ ဆေးဝါးနှင့် အိမ်ဆောက်ပစ္စည်းများလည်း လိုအပ်နေကြောင်း၊ လက်ရှိတွင် စာသင်ကျောင်းများ၌ စုပေါင်းနေထိုင်ကြသူများ ရှိသလို အိမ်အပျက်များမှ ရရာအစိတ်အပိုင်းများဖြင့် တဲဆောက်ပြီး နေထိုင်ကြသူများလည်းရှိကြောင်း သိရသည်။
“ရွာတွေက ဖောင်တော်ဦးဘုရားမှာ ပန်းရောင်းရင်းရပ်တည်ကြတဲ့သူတွေ များတော့ ရေဘေးရော၊ ငလျင်ရောမှာ ဝင်ငွေမရှိ အလုပ်မရှိနဲ့ ဆင်းရဲပြီး အတော်ခက်ခဲနေကြတယ်။ ခုလည်း ပြိုပျက်စီးတဲ့ အိမ်တွေ ပြန်ဆောက်ဖို့ ဝါးကအစ သောက်ဖို့ရေသန့်၊ ပိုက်ဆံတွေ မရှိကြဘူး” ဟု ကူညီရေးကယ်ဆယ်ရေး လုပ်ဆောင်နေသူတစ်ဦးက ပြောသည်။
မတ်လ ၂၈ ရက်တွင် လှုပ်ခတ်သည့် စစ်ကိုင်းငလျင်ကြောင့် အင်းလေးဒေသတွင် ထိခိုက်ပျက်စီးမှုများပြီး နေအိမ် ၂၀၀၀ ကျော်ပြိုကျပျက်စီးကာ လူ ၁၀၀ ကျော်သေဆုံးကြောင်း စာရင်းကောက်ခံမှုများအရ သိရပြီး ယခုကျေးရွာများကဲ့သို့ အလှူရှင်လက်လှမ်းမမှီသည့် ကျေးရွာများလည်း ရှိနေဆဲဖြစ်သည်။
မဟာ
#MeKongNews
#အင်းလေးဒေသ
#စစ်ကိုင်းငလျင်
#အကူအညီလိုအပ်
#ရေသန့်
