မဲခေါင်၊ မတ် ၁၇
စစ်ကောင်စီသည် လမ်းစစ်ဆေးရေးဂိတ်များတွင် “Person Scrutinization and Monitoring System” “လူပုဂ္ဂိုလ် စိစစ်ခြင်းနှင့် စောင့်ကြည့်စနစ်” (PSMS) ကို တွင်တွင်ကျယ်ကျယ်အသုံးပြုလာကြောင်း စစ်ကောင်စီ လုံခြုံရေးတပ်ဖွဲ့နှင့် နီးစပ်သူများထံမှ သိရသည်။
ယင်းစနစ်ကို မြို့ဝင်မြို့ထွက်နှင့်တံတားဂိတ်များ၊ နယ်စပ်များတွင် ယခုသီတင်းပတ်အတွင်း တပ်ဆင်ကာ စစ်ဆေးနေခြင်းဖြစ်သည်ဟု ရှမ်းပြည်နယ်ရဲတပ်ဖွဲ့ရုံးနှင့် နီးစပ်သူတစ်ဦးက မဲခေါင်ကို ပြောသည်။
“သူတို့ပြောတဲ့ တရားခံပြေးဖမ်းစက်ပေါ့လေ၊ အဆင့်မြင့် လေဆိပ်တွေမှာ သုံးတာပေါ့။ ခု PLAN အနေနဲ့ အရေးကြီးမြို့၊တံတားတွေ၊ တိုင်းနဲ့ပြည်နယ် အကူးအပြောင်း နယ်စပ်တွေမှာတပ်ပြီးဖမ်းမှပေါ့” ဟု ၎င်းကပြောသည်။
လက်ရှိ ရှမ်းပြည်နှင့် မန္တလေးနယ်စပ် ကျွဲတပ်ဆုံစစ်ဆေးရေးဂိတ်တွင် ကုန်ပစ္စည်းစစ်ဆေးသည့် X-Ray စက်ကဲ့သို့ လူကိုစစ်ဆေးသည့် (PSMS) စနစ်ဖြင့် ခရီးသည်များကို စစ်ဆေးမည်သွားမည်ဖြစ်ပြီး တောင်ကြီးမှ လွိုင်ကော်ဘက်သို့လာသည့် ခရီးလမ်းတွင်လည်း ယင်းသို့စစ်ဆေးရန် စီစဉ်နေကြောင်း သိရသည်။
ထိုင်းနိုင်ငံဘက်သို့ အဓိကထွက်ပေါက်တစ်ခုအဖြစ်ရှိနေသည့် တာချီလိတ်-မယ်ဆိုင် ချစ်ကြည်ရေးတံတား ၁ တွင်လည်း ယင်းစနစ်ကို တပ်ဆင်ပြီး စစ်ဆေးရန် စီစဉ်နေကြောင်း သတင်းရဲတပ်ဖွဲ့နှင့် နီးစပ်သူတစ်ဦးထံမှ သိရသည်။
“တာချီလိတ် တံတား ၁ မှာလည်း အဲလိုစစ်ဆေးဖို့ အစီအစဥ်ရှိတယ်။ Network နဲ့ချိတ်ပြီး ဆော့ဖ်ဝဲလ်နဲ့ စစ်တဲ့စနစ်ပဲ” ဟု ၎င်းက ပြောသည်။
ယင်းစနစ်တပ်ဆင်ထားသည့် မော်လမြိုင်မြို့ အတ္ထရံတံတား (မော်လမြိုင်) စစ်ဆေးရေးဂိတ်၌ အကြမ်းဖက်မှုတိုက်ဖျက်ရေးဥပဒေပုဒ်မ ၅၀ဖြင့် မိထ္တီလာရဲစခန်းက ဝရမ်းထုတ်ခံထားရသူ စွမ်းပြည့်စုံဆိုသူအား မတ်လ၁၅ရက် ညနေပိုင်းက ဖမ်းမိကြောင်း စစ်ကောင်စီဝါဒဖြန့်သတင်းဌာနများတွင် ဖော်ပြထားသည်။
မှတ်ချက် – ပုံဟောင်း
မဟာ
#MeKongNews
#PSMS
#စစ်ဆေးရေးဂိတ်
#တာချီလိတ်
#တံတား၁
