ရှမ်းပြည်တောင်ပိုင်းရှိ ပအိုဝ်းလူမျိုးများ နေထိုင်သည့် မြို့၊ ရွာများတွင် စစ်ကောင်စီလက်အောက်ခံ ပြည်သူ့စစ် – PNO က အခွန်ဟုဆိုကာ ဆက်ကြေးကောက်ခံနေပြီး မပေးလျှင် လေယာဉ်ဖြင့်ဗုံးကြဲမည်ဟု ခြိမ်းခြောက်နေကြောင်း ဒေသခံများက ပြောသည်။
အိမ်တစ်အိမ်လျှင် ကျပ် ၅သောင်း၊ ကားရှိလျှင် ကားတစ်စီးကို ကျပ် ၅သောင်း၊ ဆိုင်ဖွင့်ထားပါက ဆိုင်ကြီးလျှင် ကျပ်တစ်သိန်းနှင့် ဆိုင်ငယ်လျှင် ကျပ် ၅သောင်း ကောက်ခံနေပြီး တောင်ကြီးမြို့နယ်အတွင်းရှိ ဘန်းကန်ကျေးရွာတွင် လွန်ခဲ့သည့် တစ်ပတ်ခန့်က စတင်ကောက်ခံနေခြင်းဖြစ်ကြောင်း ဒေသခံတစ်ဦးက မဲခေါင်ကို မတ်လ ၁၆ရက်တွင် ပြောသည်။
“မပေးရင် ဗုံးကြဲမယ်၊ လေယာဉ်တွေလာရင် မကာကွယ်ပေးဘူး ဆိုပြီး ပြောပြီးကောက်တာ။ ကိုမျိုးဆိုတဲ့ PNO ကလူက ဦးဆောင်ပြီး လာပြောတာ” ဟု ၎င်းကပြောသည်။
ရပ်စောက်မြို့နယ်အတွင်းရှိ ပအိုဝ်းလူမျိုးများ အများဆုံးနေထိုင်သည့် ပင်ဖြစ်မြို့နှင့် ထီးခမ်းကျေးရွာတို့တွင်လည်း မတ်လ ၁၄ရက်နေ့က တစ်အိမ်လျှင် ကျပ် ၅သောင်း အခွန်ပေးရန် PNO တပ်ဖွဲ့ဝင်များက လာရောက်ပြောကြားကြောင်း ဒေသခံများထံမှ သိရသည်။
ပင်ဖြစ်မြို့မှာ ရပ်ကွက် ၁၂ခုရှိသည့် မြို့တစ်မြို့ဖြစ်ပြီး ထီးခမ်းကျေးရွာမှာလည်း အိမ်ခြေ ၁၀၀ ကျော်ရှိကြောင်း၊ နောက်ဆုံးပေးရမည့် ရက်ကိုသတ်မှတ်ထားခြင်း မရှိသေးသော်လည်း အစည်းအဝေးပြန်လည်ခေါ်ယူမည်ဟု ပြောကြောင်း ပင်ဖြစ် ဒေသခံတစ်ဦးက ပြောသည်။
ရှမ်းပြည်တောင်ပိုင်းရှိ ဆီဆိုင်၊ ဟိုပုံး၊ ပင်လောင်း၊ တောင်ကြီး၊ အောင်ပန်း၊ ကလော၊ ပင်လုံ၊ လွိုင်လင်နှင့် ရပ်စောက် မြို့နယ်များအားလုံးတွင် PNO က လိုက်လံကောက်ခံနေခြင်းဖြစ်ပြီး စီးပွားရေးလုပ်ငန်းများကိုလည်း ကောက်ခံကြောင်း ပအိုဝ်းလူငယ်တစ်ဦးက ပြောသည်။
“တချို့ရွာတွေက မထည့်ဘူးဆိုရင် နှင်ထုတ်မယ်တို့၊ စကစကို အကြောင်းကြားပြီး ဗုံးကြဲခိုင်းမယ်တို့ အမျိုးမျိုး ခြိမ်းခြောက်ပြီး ကောက်နေတာ။ PNO ခေါင်းဆောင်တွေက သူဌေးတွေပဲ သူတို့ပိုက်ဆံနဲ့ သူတို့ စိုက်သုံးပါလား။ ပြည်သူလူထုက တစ်နေ့ထက်တစ်နေ့ ဒုက္ခရောက်နေတာ၊ ဒါကိုပဲ ဖိတောင်းနေတယ်” ဟု ၎င်းက ပြောသည်။
ပအိုဝ်းပြည်သူ့စစ်တပ်ဖွဲ့ဖြစ်သည့် PNO/PNA သည် စစ်ကောင်စီဘက်မှ ကူတိုက်ပေးနေခြင်းဖြစ်ပြီး ၂၀၂၄ ခုနှစ် ဩဂုတ်လအတွင်းက ရပ်ရွာအတွင်း ပအိုဝ်းလူငယ်များကို အဓမ္မစစ်သားစုဆောင်းပြီး အင်အား ၂သောင်းခန့်ဖြည့်တင်းခဲ့သည်။
ယင်းနောက် ရှမ်းတောင်နှင့် ကရင်နီပြည်နယ် နယ်စပ်ရှိဒေသများကို စစ်ကောင်စီက အင်အားအလုံးအရင်းဖြင့် စစ်ကြောင်းထိုးရာတွင် အဓိကပါဝင်နေပြီး ပြည်သူအများအပြားမှာ စစ်ဘေးရှောင်နေရသည်။
ဇော်မြင့်
#MeKongNews
#PNO
#ဆက်ကြေးကောက်
#ပအိုဝ်းပြည်သူ
#ရှမ်းတောင်
