မဲခေါင်၊ မတ် ၁၁
ထိုင်းနိုင်ငံဘက်မှ လျှပ်စစ်မီး ရောင်းချမှုရန်တန့်လိုက်သလို လာအိုဘက်မှ လျှပ်စစ်မီးရောင်းချမှု လျှော့ချလိုက်သဖြင့် တာချီလိတ်မြို့ပေါ်ရပ်ကွက်များတွင် အလှည့်ကျစနစ်ဖြင့်သာ လျှပ်စစ်မီး ရရှိသော်လည်း မြို့နယ်မီးလင်းရေးကော်မတီ ဥက္ကဌ ပိုင်ဆိုင်သည့် နေရာအချို့တွင် ၂၄ နာရီမီးလာနေကြောင်း ပြည်သူများက ဝေဖန်သည်။
တာချီလိတ်မြို့နယ် မီးလင်းရေးကော်မတီ ဥက္ကဌ ဦးတင်လှိုင်ပိုင်ဆိုင်သည့် မြသဟာဆေးရုံနှင့် ၎င်းအစုရှယ်ယာပါဝင်သည့် တော်ဝင်ဆေးရုံတို့တွင် ၂၄ နာရီမီးလာနေပြီး ယင်းနေရာများနှင့် လျှပ်စစ်မီးတလိုင်းတည်းဖြစ်သည့် နေအိမ်များတွင်လည်း မီးလာကြောင်း ဒေသခံတစ်ဦးက မတ်လ ၁၀ရက် ညပိုင်းတွင် ပြောသည်။
“မီးလာတယ်။ မီးစက်နှိုးထားတာလည်းမဟုတ်ဘူး။ ခပ်တည်တည်ပဲ။ မီးချိန်းရင် မီးလင်းရေးကလူတွေက တုတ်နဲ့လိုက်လုပ်နေရတယ်။ မိုးတွင်းတော့ ဘယ်လိုနေမယ်မသိဘူး” ဟု ၎င်းက ပြောသည်။
ဖေဖော်ဝါရီလ ၅ရက်တွင် ထိုင်းနိုင်ငံဘက်မှ မီးဖျက်ပြီးနောက် လာအိုဘက်မှလည်း မူလရောင်းချနေသည့် ၃၀ မီဂါဝပ်ဓာတ်အားကို ၁၃ မီဂါဝပ်ဓာတ်အားသို့သာ လျှော့ချ ရောင်းမည်ဟု ပြင်ဆင်လိုက်ပြီးနောက် ဆယ်စုနှစ် ၂စုကျော်ကြာ ၂၄ နာရီလျှပ်စစ်မီးရသည့် တာချီလိတ်မြို့မှာ အလှည့်ကျဓာတ်အားပေးစနစ်သို့ ပြောင်းလဲသွားခြင်းဖြစ်သည်။
သို့သော် အလှည့်ကျမီးပေးစနစ်တွင် မီးပြတ်သည့်အချိန်သာမှန်ပြီး မီးလာသည့်အချိန်မမှန်ကြောင်း ဒေသခံများက ဝေဖန်နေကြသည်။
“မီးက ပျက်ရင်မှန်တယ်၊ အတိအကျပဲ။ လာမယ်ဆိုရင်တော့ မမှန်ဘူး။ ကြေညာထားတဲ့အတိုင်း တိတိကျကျ ပေးနိုင်ရင်အကောင်းဆုံးပါပဲ” ဟု မြို့ခံတစ်ဦးက ပြောသည်။
ထို့အပြင် မီးလင်းရေးကော်မတီနှင့်ပတ်သက်ပြီး လက်ရှိဥက္ကဌ တာဝန်ထမ်းဆောင်နေသည်မှာ ၇နှစ်ကျော်ရှိပြီဖြစ်ပြီး စည်းမျဉ်းအရ ၅နှစ်လျှင်တစ်ကြိမ် ဥက္ကဌပြန်လည်ရွေးချယ်ရမည်ဖြစ်ကြောင်း၊ ဘဏ္ဍာရေးဆိုင်ရာ ရှင်းတမ်းများလည်း အများသိအောင် ရှင်းလင်းမှုမရှိကြောင်း၊ မီးလင်းရေးကော်မတီ၏ ရန်ပုံငွေဖြစ်သည့် ဘတ်ငွေ သန်း ၃၀ကျော် (၂၀၁၈ စာရင်းအရ) ကိုလည်း မည်သို့မည်ပုံလုပ်ဆောင်ထားကြောင်းလည်း မသိရကြောင်း ဒေသခံတစ်ဦးက ထောက်ပြသည်။
“၂၀၁၈မှာ လွှတ်တော်ကိုယ်စားလှယ်တွေရှိတုန်းက သိလိုက်ရတာက ရန်ပုံငွေ ဘတ်သန်း ၃၀ ကျော်ရှိတယ်။ အဲဒီနောက်ပိုင်းလည်း ဘာမှ မကြားရတော့ဘူး။ အခုမီးလင်းရေးက လူတစ်စုက အုပ်စိုးထားသလိုဖြစ်နေတယ်။ မီးလင်းရေးဆိုတာ အများပိုင်ဖြစ်တယ်။ အရင်ခေတ်အဆက်ဆက်ကတည်းက မြို့အတွက်လုပ်လာကြတာ။ လျှပ်စစ်မီးရောင်းတိုင်းလည်း တစ်ယူနစ်တိုင်းမှာ အကျိုးအမြတ်ရနေတာ၊ ဒါတွေကို ပွင့်လင်းမြင်သာမှုရှိအောင် ချပြဖို့လိုပါတယ်” ဟု ၎င်းက ပြောသည်။
တာချီလိတ်မြို့နယ်မီးလင်းရေးကော်မတီ (၁)ကို ၂၀၁၈ ခုနှစ်နှစ်ကုန်ပိုင်းတွင် ပိုမိုပွင့်လင်းမြင်သာမှုရှိစေရန် ခရိုင်အုပ်ချုပ်ရေးဦးဆောင်မှု ကော်မတီမှ မြို့မိမြို့ဖဦးဆောင်သည့် ကော်မတီသို့ လွှဲပြောင်းပေးခဲ့ခြင်းဖြစ်သည်။ ယင်းအချိန်ကတည်းက ကော်မတီဥက္ကဌနေရာကို ဦးတင်လှိုင်က ရရှိထားခြင်းဖြစ်သည်။
တာချီလိတ်မြို့နယ်အတွင်း မီးလင်းရေးကော်မတီ (၁) နှင့် မီးလင်ရေးကော်မတီ (၂) ဟူ၍ရှိပြီး မီးလင်းရေးကော်မတီ (၁)ကို မြို့မိမြို့ဖများဦးဆောင်သည့် ကော်မတီက တာဝန်ယူကာ မြို့ပေါ်ရပ်ကွက်များသို့ အဓိကထား လျှပ်စစ်မီးဖြန့်ဖြူးပေးနေခြင်းဖြစ်ပြီး မီးလင်းရေးကော်မတီ (၂)ကို “ဝ” တပ်ဖွဲ့က တာဝန်ယူကာ မြို့အစွန်ရပ်ကွက်များနှင့် ကျေးရွာများသို့ ဖြန့်ဖြူးပေးနေခြင်းဖြစ်သည်။
ဇော်မြင့်
#MeKongNews
#တာချီလိတ်
#လျှပ်စစ်မီး
#အလှည့်ကျ
#မီးလင်းရေးကော်မတီဝင်
#ဦးတင်လှိုင်
