မဲခေါင်၊ မတ် ၉
ဖယ်ခုံမြို့နယ်အတွင်း၌ ရဟန်းတစ်ပါးနှင့် ကပ္ပိယတစ်ဦးတို့ကို ပျားစစ်ကြောင်းမှ သတ်ဖြတ်ကြောင်းဝန်ခံသည့်စာကို ဖယ်ခံရဲတပ်ဖွဲ့ PK – Police က ယနေ့ မတ်လ ၉ရက်၌ ထုတ်ပြန်လိုက်သည်။
ပျားစစ်ကြောင်းမှ တာဝန်ရှိသူ လက်မှတ်ရေးထိုးထားသည့်စာတွင် ရှမ်းပြည်တောင်ပိုင်း၊ ဖယ်ခုံမြို့နယ်၊ နားဟီးကျေးရွာအုပ်စု၊ အုန်တိုင်းရွာမှ ဦးဇင်းဓမ္မသာရ (ခ) ဦးဇင်းပိန်နှင့် ၎င်း၏ကပ္ပိယဖြစ်သူ အိုက်ပီးတို့ကို သတ်ပစ်ခဲ့သည်ကို ဝန်ခဲ့ထားပြီး သတ်ပစ်ရသည့် အကြောင်းအရင်းမှာ စစ်ကောင်စီ၏ အကြီးစားထောက်တိုင်ဖြစ်သည့်အတွက်ဟု ပြောဆိုဖြောင့်ချက်ပေးထားသည်။
ပစ်သတ်ခဲ့သူမှာ ရဲဘော်ဘလက်ဆိုသူဖြစ်ပြီး ဦးဇင်းပိန်အားစစ်ဆေးနေစဉ် အပြန်အလှန်ရုန်းရင်းဆန်ခတ်ဖြစ်၍ ပစ်သတ်ရသည်ဟု စာ၌ထည့်သွင်းပြောဆိုထားသည်။
ဦးဇင်းပိန်မှာ စစ်ရှောင်များကို ကူညီရာတွင် လူသိများသူဖြစ်ပြီး ဝန်ခံသည့်စာပါ အကြောင်းအရာများမှာ သေဆုံးသူများအပေါ် ဂုဏ်သိက္ခာပိုင်းအရပါ ထိခိုက်နစ်နာစေကြောင်း၊ တာဝန်ရှိသူများအနေဖြင့် အမှုမှန်ပေါ်ပေါက်ရန်နှင့် တရားမျှတမှုရှိရန် လုပ်ဆောင်ပေးဖို့ လိုကြောင်း ရှမ်းပြည်အရေးလေ့လာသူတစ်ဦးက ပြောသည်။
“ဘာမှ ပြန်မပြောနိုင်တော့တဲ့ သေသွားတဲ့သူတွေအပေါ် ဒလန်ဆိုပြီးစွပ်စွဲထားတယ်။ တကယ်ဆို အချက်အလက်နဲ့ သေသေချာချာပြဖို့လိုတယ်။ နောက်ပြီးတော့ လက်နက်မဲ့ပြည်သူတွေ၊ သံဃာတွေကို ဒီလိုလက်လွတ်စပယ် လုပ်လို့မရဘူး” ဟု ၎င်းက ပြောသည်။
ယင်းပျားစစ်ကြောင်း၏ထုတ်ပြန်ချက်နှင့်သဘော ထားစာတွင် အဆိုပါ လူသတ်မှုကို ကျူးလွန်သူမှာ မောင်ဘလတ်၂၉နှစ်ဖြစ်ပြီး ၎င်းတစ်ဦးထဲက ၂ယောက်လုံးကို ပစ်ခတ်သတ်ဖြတ်ခဲ့ခြင်းဖြစ်ကြောင်း၊ ထိုပြစ်မှူကျူးလွန်သူ မောင်ဘလတ်ကို တပ်စည်းကမ်းအတိုင်း တပ်ခုံရုံးဖွဲ့၍ အပြစ်ပေးအရေးယူမည်ဖြစ်ကြောင်း ပြည်သူလုထုထံတင်ပြအပ်ပါသည်ဟု ပါရှိသည်။
ယင်းဖြစ်စဥ်မှာ ပြီးခဲ့သည့် မတ်လ၄ရက်နေ့ကဖြစ်ပွားခဲ့ခြင်းဖြစ်ပြီး ဖြစ်စဥ်အတွင်းဦးဓမ္မသာရ ခေါ် ဦးဇင်းပိန်သက်တော် ၄၇ နှစ်၊ ဝါတော်၄၈ဝါ နှင့် ဦးအိုက်ပီး၄၀ နှစ်တို့ သေဆုံးခဲ့ရသည်။
မဟာ
#MeKongNews
#ပျားစစ်ကြောင်း
#ဦးဇင်းပိန်
#အိုက်ပီး
#ဖယ်ခုံ
