မဲခေါင်၊ဖေဖော်ဝါရီ ၂၂
၁၀၂၇ စစ်ဆင်ရေး ကာလမှစတင်ကာ တအာင်းတပ်(TNLA) ထိန်းချုပ်နယ်မြေ၊ ကွတ်ခိုင်မြို့၌ တရိပ်ရိပ်မြင့်မားလာသည့်ကုန်ဈေးနှုန်းသည် ယခုအခါ ထိုကာလမတိုင်မီကထက် ၅ဆ ခန့် ကြီးမားနေပြီဖြစ်သည်။
ဆန်တစ်ပြည် ကျပ် ရှစ်ထောင်( ၈၀၀၀) မှ ကျပ် တစ်သောင်း(၁၀၀၀၀ )၊ စားဆီ တစ်လီတာ ကျပ် နှစ်သောင်း (၂၀၀၀၀)၊ ဓာတ်ဆီ တစ်လီတာခွဲ ကျပ် တစ်သောင်းသုံးထောင်(၁၃၀၀၀)၊ ဝက်သား တစ်ပိဿာ ကျပ် လေးသောင်းနှစ်ထောင်(၄၂၀၀၀)၊ အမဲသား တစ်ပိဿာ ကျပ် သုံးသောင်းငါးထောင်(၃၅၀၀၀)၊ ကြက်သား တစ်ပိဿာ ကျပ် နှစ်သောင်းရှစ်ထောင်(၂၈၀၀၀)ဝန်းကျင်၊ ကြက်ဥ တစ်လုံး ကျပ် ခြောက်ရာ(၆၀၀) အထိ ပေးဝယ်နေရကြောင်း ကွတ်ခိုင်မြို့ဒေသခံတစ်ဦးက မဲခေါင်ကိုပြောသည်။
အလုပ်အကိုင်ရှားပါးခြင်းနှင့် ဝင်ငွေနည်းပါးခြင်းသည် ကြီးမားနေသည့်ကုန်ဈေးနှုန်းနှင့် လိုက်လျောညီထွေ မဖြစ်ဘဲ အစားအစာချို့တဲ့သည့် အခြေအနေများလည်း ရှိနေကြသည်။
“မိသားတစ်စုစာဆို တနပ်ကို စရိတ်က မနည်းဘူးရယ်၊ ချက်စားတော့လည်း ဆီမပါပြားမပါပေါ့၊ ကလေးတွေ ထမင်းထုပ်လာရင်လည်း အသီးအရွက်ပဲ၊ တချို့ဆို ရှူးရှဲလေးတစ်ထုပ်ပဲ၊ ဘာဟင်းမှ သိပ်မပါကြဘူးရယ်” လို့ ဒေသခံက ပြောပါတယ်။
ယခင်ကဲ့သို့ မိသားစုအတွင်း တစ်ဦး နှစ်ဦး လုပ်အားခဝင်ငွေဖြင့် လုံလောက်ခြင်း မရှိသဖြင့် ကျောင်းနေအရွယ် ကလေးများကိုပင် လုပ်ငန်းခွင်ဝင်ခိုင်းရသည့် အခြေအနေများလည်း ရှိနေကြသည်။
“မိဘတွေက အလုပ်ခိုင်းကြတော့ ပညာရေးထိခိုက်၊ နဂိုကမှ ပညာတတ်နည်းပါးတဲ့ တိုင်းရင်းသားတွေအဖို့ အသိဉာဏ်နည်းပါးမှုပြဿနာ ကြီးထွားလာဖို့ရှိတယ်၊ ရေရှည်မှာ အများကြီးထိခိုက်လာနိုင်တာပေါ့” ဟု ဒေသခံကပြောသည်။
ဒေသခံများအနေဖြင့် မီးသွေးဖုတ်ခြင်းနှင့် ကြံခုတ် ဆေးဖျန်း စသဖြင် ရာသီပေါ်နေ့စားအလုပ်များ လုပ်ကိုင်ကြရာတွင် တစ်ရက်နေ့စားခ ကျပ် ၁၅၀၀၀ မှ ကျပ် ၂၀၀၀၀ အထိရရှိသည်။ ထိုအလုပ်များသည် ပုံမှန်လုပ်ကိုင်ရသည့် အလုပ်မဟုတ်သောကြောင့် အလုပ်ပြတ်လျှင် ငွေပြတ်သည့်အခြေအနေ ဖြစ်နေသည်။
“ကုန်ဈေးနှုန်း အဆမတန်တက်နေတော့ သူသူငါငါ ခက်ခဲကြတယ်၊ အများစုကတော့ အဆင်သိပ်မပြေ၊ ရွာဘက်တွေကတော့ တောင်ယာလုပ် မီးသွေးဖုတ်များတာပေါ့၊ ဝင်ငွေနဲ့ ကုန်ဈေးနှုန်းနဲ့ မမျှတော့ခက်ခဲ့ကြတာပဲ” ဟု ဒေသခံတစ်ဦးက မဲခေါင်ကိုပြောသည်။
ဒေသအုပ်ချုပ်ရေးအာဏာပိုင်ဖြစ်သည့် တအာင်းတပ်(TNLA) အနေဖြင့်လည်း ကုန်ဈေးနှုန်းကို ထိန်းညှိပေးနိုင်ခြင်း မရှိသေးချေ။
ဂနိုက်
#MeKongNews
#ကွတ်ခိုင်
#ဝင်ငွေနည်း
#ကျောင်းနေအရွယ်
#ပညာရေးထိခိုက်
