မဲခေါင်၊ ဖေဖေါ်ဝါရီ ၂၂
ရှမ်းပြည်တောင်ပိုင်း၊ မိုးဗြဲမြို့အနီးတဝိုက်၌ တော်လှန်ရေးအင်အားစုနှင့် စစ်ကောင်စီတပ် တိုက်ပွဲ ပြင်းထန်နေသဖြင့် ပြည်သူများ ဖြတ်သန်းသွားလာခြင်းကို ၅ ရက်တာပိတ်ပင်ကြောင်း ကရင်နီအမျိုးသားများကာကွယ်ရေးတပ် KNDF နှင့် မိုးဗြဲပြည်သူ့ကာကွယ်ရေးတပ် MBPDF က ထုတ်ပြန်သည်။
မြို့အတွင်း ဖြတ်သန်းသွားလာခြင်းကို ဖေဖော်ဝါရီလ ၂၄ ရက်မှ ၂၈ ရက်အထိ ပိတ်ပင်ခြင်းဖြစ်ပြီး အရေးပေါ်သွားလာရန်ရှိပါက အထိုင်ချတပ်စွဲထားသည့် သက်ဆိုင်ရာ တော်လှန်ရေး တပ်ရင်း တပ်ဖွဲ့များ၊ လုံခြုံရေးဂိတ်များကိုအသိပေးခွင့်ပြုချက်ရယူရန်လိုအပ်ကြောင်း အသိပေးထားသည်။
စစ်ကောင်စီသည် ဒရုန်းဖြင့်နေ့စဉ်တိုက်ခိုက်နေသလို မြေပြင်တိုက်ပွဲများဖြင့်လည်း မိုးဗြဲကိုထိန်းချုပ်နိုင်ရေးလုပ်ဆောင်နေပြီး မိုးဗြဲကိုထိန်းချုပ်နိုင်ပါက လွိုကော်၊ ဒီးမောဆိုဘက်ထိလမ်းပွင့်သွားမည်ဖြစ်သည်ဟု KNDF ပြန်ကြားရေး တာအယ်စိုးကပြောသည်။
၎င်းက “ပြည်သူလုံခြုံရေးအရ ပိတ်ထားရခြင်းဖြစ်ပါတယ်” ဟုပြောသည်။
မိုးဗြဲမြို့အနီးတဝိုက် စစ်ကောင်စီနှင့် တော်လှန်ရေးအင်အားစုအကြား ပြီးခဲ့သည့် ၂၀၂၄ ခုနှစ်၊ နိုဝင်ဘာလမှစတင်ကာ ထိတွေ့တိုက်ပွဲများ မကြာခဏဖြစ်ပွားနေပြီးထိတွေ့တိုက်ပွဲအတွင်း စစ်ကောင်စီတပ်ဘက်က သေဆုံးသူ ၄၀ ဦး ရှိနေပြီး ဘက်ပြောင်းခိုလှုံသူများလည်း ဆက်တိုက်ရှိနေသည်။
ယခုလ ၁၉ ရက်တွင် စစ်ကောင်စီက လေကြောင်းမှ မီးလောင်ဗုံးများဖြင့် ကြဲချတိုက်ခိုက်ခြင်းကြောင့် နေအိမ် သုံးလုံး မီးလောင်ပျက်စီးခဲ့သည်။
စစ်ကောင်စီတပ်၏ စစ်မှုထမ်းဥပဒေဖြင့် အတင်းအဓမ္မ ခေါ်ဆောင်မှုကြောင့် ရှေ့တန်းရောက်နေရသည့် တပ်သားများသည် KNDF နှင့် အခြား တော်လှန်ရေး အင်အားစုထံ အလင်းဝင်လာသူ ၁၀၀ ဦးထိရှိနေသည်ဟု KNDF ထံမှ သိရသည်။
ဇန်နဝါရီလ တစ်လအတွင်း စစ်ကောင်စီတပ်၏ လေကြောင်းတိုက်ခိုက်မှု၊ လက်နက်ကြီးဖြင့်ပစ်ခတ်မှု၊ ဒရုန်းနှင့် ဗုံးကြဲမှုကြောင့် ကရင်နီနှင့် မိုးဗြဲမှ ကလေးငယ် နှစ်ဦးအပါအဝင် ပြည်သူ ခုနှစ်ဦးသေဆုံးပြီး အရပ်သားပြည်သူ့နေအိမ် ၃၈ လုံး၊ ဘာသာရေးအဆောက်အအုံ ငါးလုံး၊ စာသင်ကျောင်း နှစ်ကျောင်းပျက်စီးခဲ့သည်ဟု KNDF က ဖေဖော်ဝါရီလ ၂ ရက်က ထုတ်ပြန်ထားသည်။
မြူနှင်း
#MeKongNews
#မိုးမြဲမြို့
#သွားလာခွင့်
#၅ရက်ပိတ်ပင်
#စစ်ကောင်စီ
