မဲခေါင်၊ ဖေဖော်ဝါရီ ၁၆
ရှမ်းပြည်နယ်အရှေ့ပိုင်း မိုင်းလားနှင့် ရှမ်းပြည်မြောက်ပိုင်း လားရှိုးအကြား ကားလမ်းပေါ်၌ ငွေပေးမှဖြတ်သန်းခွင့်ရသည့် ဂိတ်မျိုးစုံအနက် စစ်ကောင်စီ၏ ဌာနပေါင်းစုံထိုင်သည့် တာကော်အက်တံတားသည် ငွေတောင်းအကြမ်းဆုံး ဂိတ်ဖြစ်သည်။
တာကော်အက်ဂိတ်၌ ရဲ၊ ယာဉ်ထိန်း၊ မူးယစ်၊ SB သတင်းတပ်ဖွဲ့၊ လူကုန်တားရဲတပ်ဖွဲ့၊ လဝက၊ သစ်တော၊ စရဖ၊ တံတားကြေးကောက်ခံရေးအဖွဲ့ စသဖြင့် ကိုးဖွဲ့ရှိပြီး ပုံမှန်ခရီးသွားများအနေဖြင့် ထိုဂိတ်များကိုဖြတ်သန်းပါက ဂိတ်ဖြတ်ကြေးအဖြစ် လူတစ်ဦးလျှင် ကျပ် ၅၀၀၀ ပေးရသည်။
သို့သော်လည်း မှတ်ပုံတင် ၅ မျဉ်းစောင်း၊ ၈ မျဉ်းစောင်းကိုင်ဆောင်သူများ၊ စစ်မှုထမ်းသတ်မှတ်အသက် အကျုံးဝင်သည့် အသက် ၁၈ မှ ၃၅ အတွင်းရှိသူများ၊ ရခိုင်တိုင်းရင်းသား၊ ကိုးကန့်တိုင်းရင်းသားများဆိုလျင် တဖွဲ့စီကို အနည်းဆုံး ကျပ်ငါးသောင်း ကိုးဖွဲ့ လုံးကိုပေးရသဖြင့် ထိုဂိတ်၌ပင် လူတစ်ဦးဖြတ်သန်းခွင့်ရဖို့ ကျပ် လေးသိန်းခွဲ ကုန်ကျမည်ဖြစ်သည်။
“သူတို့နဲ့ Viber ကနေချိတ်ပြီး ဘာတွေပါမယ်ဆိုတာ အရင်လှမ်းညှိထားရင် အဆင်ပြေတယ်၊ လူပြောင်းလူလဲရင်သာ ထပ်ညှိရတာ၊ အဆင်ပြေတာများပါတယ်” ဟု မိုင်းလား- လားရှိုးဆွဲ ကားသမားတစ်ဦးက ပြောသည်။
ကိုယ်ပိုင်လိုင်စင်ကားဖြင့် တာကော်အက်တံတားကိုဖြတ်၍ မင်္ဂလာဆောင်သွားသူတစ်ဦးပြောပြရာတွင် ဂိတ်ကိုရောက်လျှင်ရောက်ချင်း ပထမဆုံးပုံစံ(form)စာရွက်ကို ရဲနှင့်ယာဉ်ထိန်းအဖွဲ့ထံမှ ဝယ်ယူရသည်။ စာရွက်ကြေးမှာ ပုံမှန်မရှိပဲ ထိုနေ့က ကျပ်တစ်သောင်းပေးခဲ့ရကြောင်း၊ ကျန်အဖွဲ့များကိုလည်း တစ်ဖွဲ့လျှင် ကျပ်နှစ်ထောင်ပေးရကြောင်း၊ ထိုဂိတ်ကို ငွေပေးဖြတ်ကျော်ပြီး မန်ကန်ဂိတ်၊ လွယ်ပန်လုံစစ်တပ်ဂိတ်နှင့် အထူးတိုက်ခိုက်ရေးရဲဂိတ်များ၌လည်း တစ်ဂိတ်ကို ကျပ်နှစ်ထောင်စီပေးရသည်။
အကယ်၍ ပန်ဆန်းမှ တန့်ယန်းသို့သွားလျင် တန့်ယန်းမြို့အဝင်အထွက်မုခ်ဦး၌ ငွေကြေးကောက်ခံသည့်အဖွဲ့များလည်း ရှိသေးပြီး ၎င်းတို့ကိုလည်း အနည်းဆုံးကျပ် ၂၀၀၀ မှ ကျပ် ၅၀၀၀ အထိ ပေးရသည်ဟု ဆိုသည်။
ပန်ဆန်းမြို့ ဝ ဂိတ်၌ ဝင်ကြေး ယွမ်၁၀၀(ကျပ် ခြောက်သောင်း)ပေးရသည့်အပြင် ၆လ နေထိုင်ခွင့်စာအုပ် မဖြစ်မနေ ပြုလုပ်ရပြီး စာအုပ်ကြေး ယွမ် ၁၈၀(ကျပ်တစ်သိန်းကျော်)ပေးရသည်ဟု ဆိုသည်။
“လိုင်စင်ဓာတ်ပုံပါ ဆောင်ထားရတယ်၊ နေနေ မနေနေ လုပ်ခိုင်းတာ၊ ထိုင်တဲ့လူအပေါ် မူတည်တယ်ပြောတယ်၊ ကျွန်တော်နေထိုင်ခွင့် ၆ လ လုပ်ပြီးမှ မိုင်းလားလာရတာ၊ မမိုက်ပါဘူးဗျာ၊ မြန်မာပြည်ထဲမှာ နိုင်ငံခြားသွားရသလို ဖြစ်နေတာ” ဟု မိုင်းလား၌နေထိုင်သူတစ်ဦးက ပြောသည်။
မိုင်းလားအဝင်၌ ယွမ် ၄၀ ပေးရပြီး နေထိုင်ခွင့်အတွက် တစ်နှစ်စာ ယွမ် ၂၀ သာ ပေးရကာ ချက်ခြင်းလုပ်ရန်မလိုအပ်ပဲ နှစ်လကျော် သုံးလအကြာမှသာ လုပ်ရကြောင်း ၎င်းမှ ပြောသည်။
လက်ရှိတွင် မိုင်းလားမှ တန့်ယန်းကိုဖြတ်၍ လားရှိုးအထိ ကားခ ယွမ် ၁၂၀၀ (ကျပ်၇သိန်းကျော်)ရှိပြီး လားရှိုးမှ မိုင်းလားအထိ ကားခ ယွမ် ၁၅၀၀ (ကျပ်၁၀သိန်းခန့်)အထိရှိကြောင်း သိရသည်။
မဟာ
#MeKongNews
#မိုင်းလား
#လားရှိုး
#တာကော်အက်ဂိတ်
#ဂိတ်ကြေး
