မဲခေါင်၊ ဖေဖေါ်ဝါရီ ၁၄
စစ်အင်အား ၄၀ ခန့်ရှိသော ထိုင်းနိုင်ငံ၊ ကရင်နီနှင့် ရှမ်းပြည်နယ်စပ်ရှိ ပွိုင့် ၅၄၁၆ စခန်းကို တော်လှန်ရေးဘက်မှ ပြင်းပြင်းထန်ထန်တိုက်ခိုက်ခြင်းမျိုးမပြုရပဲ စစ်ကောင်စီက စခန်းစွန့်ခွါထွက်ပြေးသွားခဲ့သည်။
ယခုလ၊ ၁၀ ရက်၊ ၁၁ ရက်နှင့် ၁၂ ရက် နံနက်ပိုင်းအထိ ကရင်နီပြည်တပ်မတော် ( KA) မှ ဒရုန်းနှင့် စနိုက်ဘာအသုံးပြုတိုက်ခိုက်ခဲ့ပြီးနောက် နေ့လည်မတိုင်ခင် စခန်းအတွင်း ဝင်ရောက်ရှင်းလင်းချိန်တွင် လက်နက်ခဲယမ်းများမှအပ စစ်ကောင်စီတပ်ဖွဲ့ဝင်တစ်ဦး တစ်ယောက်မျှမရှိတော့ပဲ စခန်းစွန့်ခွါသွားခဲ့သည်။
“သေဆုံးတာမသိရဘူး၊ ဒဏ်ရာတော့ရမယ်ထင်တာပဲလေ၊ ဘယ်နှယောက်လဲတော့မပြောတတ်ဘူး ၊ ဝင်ကပ်တဲ့အချိန်မှာ သူတို့မရှိတော့ဘူး၊ အကုန်ထွက်ပြေးသွားပြီ” ဟု KA စစ်ရေးချုပ် ဗိုလ်မှူးကြီး ဘုန်းနိုင်က ပြောသည်။
KA တိုက်ခိုက်နေစဉ်မှာ စစ်ကောင်စီက ပစ်ကူအနေဖြင့် လေယာဉ်နှင့်ဗုံးကြဲခဲ့ပေမယ့် စစ်ကောင်စီစခန်းထိုင်များတောင့်ခံနိုင်ခြင်းမရှိပဲ စခန်းစွန့်ခွါခဲ့သည်။ စခန်းတွင်း၌ RPG ၊ စက်လက်၊ လက်နက်အကြီးများနှင့် ကျည်ဆံသေတ္တာများ ရရှိကာ KA ဒဗ ဘက်မှ တစ်ဦး တစ်ယောက်မျှ ထိခိုက်ဒဏ်ရာမရှိပဲ စခန်းသိမ်းနိုင်ခဲ့သည်။
ကရင်နီပြည် သံလွင်မြစ်၏ အရှေ့ဘက်ကမ်း၌ ကျန်ရှိနေသည့် စစ်ကောင်စီ၏ တစ်ခုတည်းသောစခန်းဖြစ်သည်။
ထိုစခန်းသည် လွန်ခဲ့သော နှစ် ၃၀ က KA တပ်၏ စခန်းကုန်းဖြစ်ပြီး စစ်ကောင်စီက သိမ်းပိုက်ထားခဲ့ခြင်းကို ယခုလက်ရှိတွင် ပြန်လည်ရယူနိုင်ခဲ့ခြင်းဖြစ်သည်။
အလားတူ ယမန်နှစ်၊ ဒီဇင်ဘာလတွင်လည်း ထိုင်း-ကရင်နီနယ်စပ်ရှိ မယ်လယုစခန်းကို KA က ပြင်းပြင်းထန်ထန်တိုက်ခိုက်ခြင်းမပြုရပဲ စခန်းသိမ်းပိုက်နိုင်ခဲ့ပြီး လက်နက်နှင့် ခဲယမ်းအမျိုးအစားအစုံအလင် သိမ်းဆည်နိုင်ခဲ့သည်။
အလားတူ မတ်လတွင်လည်း BP ၁၁ ရှိ စစ်ကောင်စီခြေကုပ်စခန်းကို သိမ်းပိုက်နိုင်ခဲ့ပြီး လက်နက်များ သိမ်းဆည်းရမိခဲ့သည်။
မြူနှင်း
#MeKongNews
#နယ်မြေသုံးခုကြား
#ပွိုင့်၅၄၁၆စခန်း
#ကရင်နီ
#KAတပ်
