မဲခေါင်၊ဖေဖော်ဝါရီ ၈
နေ့စဉ်ဆိုသလို တိုက်ပွဲဖြစ်ပွါးနေသည့် တောင်ခမ်းဒေသ၌ စစ်ကောင်စီထိန်းချုပ်နယ်မြေ ကျဉ်းမြောင်းလာပြီး ကျန်နယ်မြေများကို တော်လှန်ရေး အင်အားစုများက ထိန်းချုပ်ထားနိုင်ပြီ ဖြစ်သည်။
အခြေစိုက်တပ်များဖြစ်သည့်အမှတ်(၉၀၂) အမြောက်စခန်းကွပ်ကဲမှုဌာနချုပ်နှင့် ကွပ်ကဲမှုလက်အောက်ခံ အမတ(၃၅၄)၊ အမတ(၂၀၆)၊အမတ(၄၀၆)တပ်များ တောင်ခမ်းရွာနှင့် မန်ကျည်းရေရွာ၌သာ ထိန်းချုပ်ထားနိုင်ပြီး ကျန်နေရာများကို တော်လှန်ရေးအင်အားစုက ထိန်းချုပ်ထားသည်။
တောင်ခမ်းဒေသကို လက်လွတ်မခံရရေး ခုခံတိုက်ခိုက်နေသည့် စစ်ကောင်စီနှင့် တောင်ခမ်းဒေသကို ထိန်းချုပ်နိုင်ရေး ကြိုးပမ်းနေသည့် TNLA အပါအဝင် တော်လှန်ရေးတပ်များအကြား နေ့စဉ်နီးပါး ပစ်ခတ်တိုက်ခိုက်မှု ဖြစ်ပွါးလျှက်ရှိနေသည်။
တောင်ခမ်းစစ်ဒေသသည် စစ်ကောင်စီ၏ အဓိကပင်မနေရာများဖြစ်သည့် ပြင်ဦးလွင်မြို့၊ ဗထူးတပ်မြို့နှင့် အလွန်နီးကပ်နေသောကြောင့် စစ်ကောင်စီက အပြင်းအထန်ကာကွယ်နေခြင်းဖြစ်ပြီး တော်လှန်ရေးအင်အားစုဘက်ကလည်း အထိုက်အလျောက် အောင်မြင်မှုရရှိနေပြီဖြစ်သည်ဟု အမျိုးသားညီညွတ်ရေးအစိုးရ၊ သမ္မတရုံးပြောခွင့်ရပုဂ္ဂိုလ် ဦးကျော်ဇော်က မဲခေါင်ကိုပြောသည်။
သူက “TNLA, DPLA နဲ့ တော်လှန်ရေးအင်အားစုတွေဟာ တောင်ခမ်းကိုတိုက်ခိုက်နေတာ အချိန်တစ်ခုရှိလာပြီ ဖြစ်ပါတယ်၊ အောင်မြင်မှုလည်း အတိုင်းအတာရလာခဲ့ပြီ ဖြစ်တယ်၊ တိုက်ပွဲဝင်ရင်း ပေးဆပ်သွားတဲ့ ရဲဘော်သူရဲကောင်းတွေကိုလည်း ဦးညွှတ်အလေးပြုနေပါတယ်” ဟု ပြောသည်။
စစ်ကောင်စီက မြေပြင်ခုခံစစ်အပြင် လေကြောင်းတိုက်ခိုက်မှုကိုလည်း နေ့စဉ်ပြုလုပ်နေသလို ရဟတ်ယာဉ်ဖြင့် လိုအပ်သည်ရိက္ခာ၊ လက်နက်ခဲယမ်းများ အဆက်မပြတ်ပို့ဆောင်နေကြောင်းနှင့် ဖေဖေါ်ဝါရီ ၆ ရက်တွင် ရဟတ်ယာဉ်ဖြင့် ရိက္ခာ လေးကြိမ် ချခဲ့သည်ဟု ဓနုပြည်သူ့လွတ်မြောက်ရေးတပ် DPLA တပ်တည်ထောင်သူက မဲခေါင်ကိုပြောသည်။
မနေ့က(ဖေဖော်ဝါရီ ၇) စစ်ကောင်စီမှ ရဟတ်ယာဉ်ဖြင့် လာရောက်ပို့ဆောင်သော ရိက္ခာနှင့် လက်နက်ကြီးကျည်ဆန်များအား DPLA စစ်ကြောင်းမှ စစ်ကြောင်းထွက်ရင်း ရရှိခဲ့သည်။
တောင်ခမ်းဒေသသည် စစ်ကောင်စီ၏ စစ်ဦးစီးတက္ကသိုလ်ကဲ့သို့ တပ်စခန်းအများအပြားရှိရာ ပြင်ဉီးလွင်မြို့နှင့် မိုင် ၅၀ ကျော်သာကွာဝေးပြီး ဗိုလ်သင်တန်းကျောင်းများ၊ အရာခံအကြပ်ကြီးသင်တန်းကျောင်းများအခြေစိုက်ရာ ဗထူးတပ်မြို့နှင့် ၇၉ မိုင်ခန့်သာ ကွာဝေးသည်။
“တောင်ခမ်းပြီးရင် ဗထူးပြိုမယ်၊ ဗထူးက တပ်မြို့အခိုင်မာဖြစ်တာရယ် စစ်သင်တန်းပေါင်းစုံရှိထားတာရယ်ဆိုတော့ စကစအတွက် အရေးကြီး အရေးပါတဲ့ နေရာတစ်ခုဖြစ်နေတာက လူတိုင်းသိပါတယ်” ဟု DPLA တပ်ခေါင်းဆောင်က မဲခေါင်ကိုပြောသည်။
တောင်ခမ်းဒေသကို TNLA, DPLA နှင့် တော်လှန်ရေးပူးပေါင်းအင်အားစုများ ယမန်နှစ်၊ နှစ်ဝက်ခန့်ကတည်းက စတင်တိုက်ခိုက်ခဲ့သည်။
ရှမ်းပြည်မြောက်ပိုင်းနှင့် တောင်ပိုင်းကို အချိန်တိုအတွင်းသွားလာနိုင်ပြီး စစ်ရေးအရ အချက်အချာကျသော တောင်ခမ်းဒေသကို စစ်ကောင်စီက လက်မလွှတ်ရေး အပြင်းအထန်ကာကွယ်နေသကဲ့သို့ တော်လှန်ရေးအင်အားစုများမှလည်း အပြီးတိုင်သိမ်းပိုက်နိုင်ရေး ထိုးစစ်ဆင်နေသည်။
ဖေဖော်ဝါရီလ ၄ ရက်တွင်လည်း တောင်ခမ်းအမြောက်တပ်အနီး တိုက်ပွဲအပြင်းအထန်ဖြစ်ပွားကာ စစ်ကောင်စီတပ်မှ တပ်ကြပ်အဆင့် အပါအဝင် ငါးဦးကို DPLA က စစ်သုံ့ပန်းအဖြစ် ဖမ်းဆီးရမိသည်။
ဂနိုက်
#MeKongNews
#TNLA
#DPLA
#တောင်ခမ်းတိုက်ပွဲ
#တော်လှန်ရေးအင်အားစု
ပုံစာ။ ။ တောင်ခမ်းတိုက်ပွဲဧရိယာအတွင်း အတူတကွတွေ့မြင်ရသည့် DPLA တပ်ခေါင်းဆောင်နှင့်TNLA တပ်မဟာမှူး နှစ်ဦး။
