မဲခေါင်၊ ဖေဖော်ဝါရီ ၇
ရှမ်းပြည်တောင်ပိုင်း၊ ပအိုဝ်းဒေသ၊ ဆီဆိုင်မြို့နယ်၌ စစ်ကောင်စီနှင့် PNO ပြည်သူ့စစ်က ဒရုန်းဖြင့် ဗုံးကြဲတိုက်ခိုက်သောကြောင့်ကလေးတစ်ဦးနှင့် အမျိုးသားကြီးတစ်ဦး၊ ပေါင်း နှစ်ဦး သေဆုံးခဲ့သည်။
ယမန့်နေ့ (ဖေဖော်ဝါရီလ ၆) မွန်းလွဲ ၂ နာရီဝန်းကျင်တွင် တိုက်ပွဲဖြစ်ပွားခြင်းမရှိပဲ စစ်ကောင်စီနှင့် PNO ပြည်သူ့စစ်ပူးပေါင်းအဖွဲ့က ဒရုန်းဖြင့်ဗုံးကြဲစဉ် တောင်ယာမှပြန်လာသည့် ကောင်ထိုကျေးရွာဒေသခံ ပြည်သူနှစ်ဦးသေဆုံးကြောင်း PNLA ပြောရေးဆိုခွင့်ရှိသူ ခွန်ရိန်းယံက မဲခေါင်ကို ပြောသည်။
ထို့အပြင် ယမန်နေ့တွင် စစ်ကောင်စီက ဟောင်ဝစ်ဇာလက်နက်ကြီးဖြင့် လေးကြိမ်တိုင်တိုင် ပစ်ခတ်တိုက်ခိုက်ခဲ့သော်လည်း ထိခိုက်ပျက်ဆီးမှုမရှိခဲ့ကြောင်းသိရသည်။
PNO ပြည်သူ့စစ်တပ်ဖွဲ့ဝင် ပအိုဝ်းလူမျိုးများအနေဖြင့် လူတစ်ဦးတစ်ယောက်၏ အကျိုးစီးပွားကို ကာကွယ်ရင်း မိမိတို့၏ ပအိုဝ်းကျေးရွာများနှင့် ပအိုဝ်းလူမျိုးများကို ဖျက်ဆီးသတ်ဖြတ်နေသည့်အဆင့်သို့ ရောက်ရှိနေသည့်အပေါ် လိပ်ပြာသန့်သန့် လုပ်နိုင်ကြသလားဟု ခွန်ရိန်းယံက မေးခွန်းထုတ်သည်။
“ပအိုဝ်းလူမျိုးမဟုတ်တဲ့ အစုအဖွဲ့တခုရဲ့ ခေါင်းဆောင် ခရိုနီနေဝင်းထွန်းရဲ့ အကျိုးစီးပွားအတွက် ကိုယ့်ပအိုဝ်းလူမျိုးကို ပြန်ပြီးသတ်ဖြတ်နေရတာ၊ ပအိုဝ်းကျေးရွာကို ဖျက်ဆီးနေရတာ၊ ပအိုဝ်းဒေသကို တိုက်ခိုက်နေရတာ လိပ်ပြာလုံလုံနဲ့ လိပ်ပြာသန့်သန့်နဲ့ လုပ်နိုင်ကြသလား သေချာစဉ်းစားကြပါ၊ အမှန်တရားကို မြင်ကြပါ” ဟု ၎င်းက ပြောသည်။
စစ်ကောင်စီအနေဖြင့် ယခုကဲ့သို့ လက်နက်ကြီးနှင့် ဒရုန်းများကို အသုံးပြု၍ ပအိုဝ်းဒေသနှင့် ပအိုဝ်းကျေးရွာများကို ဖျက်ဆီးကာ စစ်ရာဇဝတ်မှုများကို ပြောင်ပြောင်တင်းတင်း ကျူးလွန်နေကြောင်း ၎င်းက ပြောသည်။
သုဝဏ္ဏခွန်
#MeKongNews
#ဆီဆိုင်မြို့နယ်
#စစ်ကောင်စီ
#PNOဗုံးကြဲ
#နှစ်ဦးသေဆုံး
