မဲခေါင်၊ ဇန်နဝါရီ ၃၁
ရှမ်းပြည်အရှေ့ပိုင်း၊ မိုင်းဆတ်မြို့နယ်ထဲက မိုင်းခုတ်ချောင်းမှာ ဖောင်အကြီးစားနဲ့ ရွှေကျင်နေပြီး မြစ်ရေအရောင်ဟာလည်း သိသာစွာပြောင်းလဲ သွားတယ်လို့ ဒေသခံတွေထံက သိရပါတယ်။
မိုင်းခုတ်မြို့က ပိန်းခမ်းရွာသွားလမ်း ဝမ်ဟုန်အကျော်ချောင်းကွေ့တစ်နေရာမှာ ဖောင်အကြီးစားနဲ့ ရွှေကျင်နေတာ ဒေသခံတွေက တွေ့ရှိခဲ့တာဖြစ်ပြီး ၂၀၂၄ ခုနှစ်၊ ဒီဇင်ဘာလက စလို့ ဒေသခံတွေကြား သတိထားမိကြတယ်လို့ မိုင်းဆတ်ဒေသခံတစ်ဦးက မဲခေါင်ကို ပြောပါတယ်။
“အကြီးစားကြီးဗျ။ ဘက်ဟိုးကုတ်တဲ့ခွက်လို အများကြီးနဲ့ မှုံစုပ်ပြီး ကျင်တာမျိုး၊ လုပ်နေတာတော့ တရုတ်တွေပဲ” လို့ သူက ပြောပါတယ်။
အဲဒီရွှေဖောင်ဟာ အလျား ပေ ၁၀၀ ကျော်၊ အနံ ပေ ၄၀ ခန့်လို့ ခန့်မှန်းပြီး မဲခေါင်မြစ် ဝမ်ပုံဆိပ်ကမ်းမှာ သီးခြားရှိတဲ့ ရေဆိပ်ကနေ တာချီလိတ်ကိုဖြတ်ပြီး သယ်လာတာလို့ ရွှေဖောင်အကြောင်းသိတဲ့ သတင်းရင်းမြစ်တစ်ဦးက ပြောပါတယ်။
အဲဒီလိုရွှေဖောင်မျိုး ရှမ်းပြည်တောင်ပိုင်းက သံလွင်မြစ်ထဲမှာလည်းတွေ့ရပြီး မိုင်းဆတ်ဒေသမှာ ပထမဆုံးတွေ့ရတဲ့ ရွှေဖောင်ကြီးဖြစ်တယ်လို့ သူက ပြောပါတယ်။
Google Earth ရဲ့ ဓာတ်ပုံမှတ်တမ်းတွေအရ ရွှေဖောင်ဟာ ၂၀၂၂ ခုနှစ်၊ ဇွန်လ ၁ရက်မှာ ရိုက်ထားတဲ့ ဂြိုလ်တုဓာတ်ပုံထဲမှာ မတွေ့ရသေးဘဲ ၂၀၂၄ ခုနှစ်၊ အောက်တိုဘာလ ၂၆ရက်မှာ ရိုက်ထားတဲ့ ဓာတ်ပုံမှသာ တွေ့ရတာဖြစ်ပါတယ်။ ရွှေဖောင်မရောက်မီ မြစ်ရေအရောင်ဟာ အစိမ်းရောင်အဖြစ်မြင်ရပြီး ရွှေဖောင်ရောက်လာပြီးတဲ့အချိန်မှာတော့ မြစ်ရေအရောင်ဟာ ရွှံ့ရောင်ပြောင်းသွားပြီး မြစ်ကြောင်းလည်း သိသာစွာ ပျက်စီးသွားတာကို တွေ့ရပါတယ်။
အခုမိုင်းခုတ်ချောင်းမှာ ရွှေဖောင်ချပြီး တူးဖော်နေတဲ့ နေရာဟာ ရွှေတူးဖော်သင့်တဲ့ နေရာမဟုတ်သလို ရွှေတူးဖော်ရာမှာ အသုံးပြုတဲ့ ဆိုင်ရာနိုက်ဟာ အဆိပ်အတောက်ဖြစ်တာကြောင့် ဒေသခံလူထုကိုရော သဘာဝပတ်ဝန်းကျင်ကိုပါ အကြီးအကျယ်ထိခိုက်စေတယ်လို့ ရှမ်းပြည်အတွင်း မြေယာသယံဇာတအရေး တက်ကြွလှုပ်ရှားသူတစ်ဦးက ထောက်ပြပါတယ်။
ရှမ်းပြည်မှာ ၂၀၂၄ ခုနှစ်အတွင်း ဆိုးရွားတဲ့ ရေကြီးနစ်မြုပ်မှုဘေးနဲ့ ကြုံတွေ့ခဲ့ရပြီး ဒါဟာ သယံဇာတတူးဖော်မှုရဲ့ နောက်ဆက်တွဲဆိုးကျိုးတွေဖြစ်တယ်တဲ့ သူက ဆိုပါတယ်။
“ရွှေတူးဖော်မှုနဲ့ပတ်သက်ပြီးတော့လည်း သဘာဝပတ်ဝန်းကျင်ထိခိုက်မှုတွေ၊ ဒေသနေလူထုထိခိုက်မှုတွေ များစွာရှိခဲ့တယ်ဆိုတာ တာလေဒေသက နမူနာပဲဖြစ်ပါတယ်။ ချောင်းတွေတိမ်ကောတယ်။ လယ်မြေတွေပျက်ဆီးတယ်။ အိုးအိမ်တွေပျက်ဆီးတယ်။ လူတွေနေမရတော့အထိဖြစ်ရတယ်။ ဒါဟာ လက်တွေဖြစ်ခဲ့တာတွေပါ” လို့ အဲဒီတက်ကြွလှုပ်ရှားသူက ပြောပါတယ်။
မိုင်းဆတ်ခရိုင်းအတွင်းမှာ ဒေသအာဏာပိုင်တွေနဲ့ တရုတ်တွေပူးပေါင်းပြီး ရွှေနဲ့ သတ္တု တူးဖော်တာတွေကို တရားမဝင် အများအပြားလုပ်ကိုင်နေပြီး ဝမ်ဟုန်ရွာအောက်ဖက်၊ ဖာဖဲ့ရွာအနီးက မိုင်းခုတ်ချောင်းမှာလည်း သတ္တုစက်ရုံတစ်ရုံ တည်ထားတယ်လို့ ဒေသခံတွေထံက သိရပါတယ်။
ရွှေဖောင်အကြီးစားတူးဖော်ပြီး သတ္တုစက်ရုံလည်းတည်ထားတဲ့ နမ့်ခုတ်ချောင်းဟာ တာချီလိတ်မြို့မှာ အရေးကြီးတဲ့ မယ်ဆိုင်မြစ်ရဲ့ လက်တက်ဖြစ်ပြီး မယ်ဆိုင်မြစ်ဟာ မဲခေါင်မြစ်လက်တက်တစ်ခုဖြစ်ပါတယ်။
၂၀၂၄ ခုနှစ် စက်တင်ဘာလနဲ့ အောက်တိုဘာလတွေအတွင်း ဆိုးရွာလှတဲ့ စံချိန်တင် ရေကြီးနစ်မြုပ်မှုကို ကြုံခဲ့ရတာဟာ ဒီမြစ်လက်တက်တွေမှာ သတ္တု တူးဖော်တာတွေကြောင့်လည်း အဓိကကျတဲ့ အချက်တစ်ခုဖြစ်တယ်လို့ တာချီလိတ်ဒေသခံတွေက ရှု့မြင်ပါတယ်။
ထိုင်းအစိုးရရဲ့ လေ့လာမှုတွေအရ မယ်ဆိုင်မြစ်ရဲ့ ရေကြောင်းတစ်လျှောက် မျောပါလာတဲ့ နုံး တွေမှာ အာဆင်းနစ်၊ နီကယ်လ်နဲ့ ဇင့် ပါဝင်မှု အများဆုံးဖြစ်ကာ ဇင့်ပါဝင်မှုမှာသတ်မှတ်ထားတဲ့ပမာဏ ထက် ၁၈ ဆပိုများ နေတယ်လို့ ဆိုပါတယ်။
၂၀၂၄ခုနှစ် နိုဝင်ဘာ ၂၇ ရက်က ရှမ်းလူ့အခွင့်အရေးမဏ္ဍိုင် – SHRF ရဲ့ ထုတ်ပြန်ချက်မှာ မိုင်းဆတ်ခရိုင်အတွင်းက ရွှေတူးဖော်မှုတွေကြောင့် တာချီလိတ်ရေဘေးအကြီးအကျယ်ကြုံတွေ့ခဲ့ရပြီး လူသေဆုံးမှုတွေအထိ ဖြစ်ခဲ့တယ်လို့ ပါရှိပါတယ်။
MK – 004, MK – 012
#MeKongNews
#တရားမဝင်ရွှေကျင်
#ရွှေဖောင်
#မိုင်းဆတ်
#မိုင်းခုတ်ချောင်း
#မယ်ဆိုင်မြစ်
#မဲခေါင်မြစ်
Photo Source – Google Earth
