စစ်ကောင်စီပြုလုပ်မယ့် ရွေးကောက်ပွဲအား ပြည်နယ်ကိုယ်စားပြု ပါဝင်မယ့် KySPP ပါတီကို IEC နဲ့ KNDF ရှုတ်ချ
မဲခေါင်၊ ဇန်နဝါရီ ၂၇
စစ်ပွဲတွေနဲ့ နယ်မြေအေးချမ်းမှုမရှိသေးတဲ့ ကရင်နီဒေသမှာ လူထုကိုဗုံးကြဲပြီး လက်နက်ကြီးနဲ့ ရမ်းသမ်းပစ်ခတ်လေ့ရှိတဲ့ စစ်ကောင်စီရဲ့ ရွေးကောက်ပွဲကို ကယားပြည်နယ်ပြည်သူ့ပါတီ(KySPP)အမည်နဲ့ ပါဝင်ဖို့ မှတ်ပုံတင်လျှောက်ထားတာတဲ့အပေါ် IEC နဲ့ KNDF ကရှုတ်ချပါတယ်။
KySPP ဟာ လူထုကိုမျက်ကွယ်ပြုပြီး ရွေးကောက်ပွဲဝင်မှာဖြစ်တဲ့ အတွက် လက်ခံနိုင်စရာအကြောင်းမရှိဘူးလို့ ကရင်နီပြည်ကြားကာလစီမံအုပ်ချုပ်ရေးကောင်စီ(IEC)ရဲ့ အတွင်းရေးမှူး(၂) ဦးဗညားက ပြောပါတယ်။
“စစ်ကောင်စီရဲ့ အတုအယောင် အနှစ်သာရမရှိတဲ့ ရွေးကောက်ပွဲကို ဝင်ရောက်ယှဉ်ပြိုင်တဲ့ ဘယ်နိုင်ငံရေးပါတီမဆို အာဏာရှင်ကို အားပေးအားမြှောက်ရာရောက်တဲ့ ပါတီဖြစ်တယ်၊ အဲဟာကတော့ ဘယ်ပါတီမဆိုရှုံ့ချတယ်” လို့ ကရင်နီပြည်ကြားကာလစီမံအုပ်ချုပ်ရေးကောင်စီ(IEC)ရဲ့အတွင်းရေးမှူး(၂) ဦးဗညားက ပြောပါတယ်။
ပြည်သူ့ပါတီလို့အမည်ခံထားပေမယ့် စစ်ကောင်စီရဲ့ မိစ္ဆာလုပ်ငန်းတွေ၊ ပြည်သူကို သတ်ဖြတ်တဲ့လုပ်ငန်းတွေကို ပိုမိုလုပ်ဆောင်လာနိုင်အောင် အားဖြည့်ပေးမယ့် ဒေါက်တိုင်တစ်ခုလိုပဲရှုမြင်ကြောင်း KNDF ရဲ့ ပြန်ကြားရေး တာဝန်ခံ တာအယ်စိုးက ပြောပါတယ်။
သူက “အကြမ်းဖက်စစ်ကောင်စီရဲ့ အစွယ်အပွား၊ လက်ကိုင်တုတ်၊ လက်စွဲပါတီလို့ပဲ ကျွန်တော်တို့မြင်တယ်” လို့ပြောပါတယ်။
ပါတီရုံးချုပ်ဟာ လွိုင်ကော်မြို့ အောင်သီဟရပ်ကွက် ၊ သဇင်လမ်း၊ ဧ-၁၂၇မှာ အခြေစိုက်မယ်လို့ ကြေညာပါတယ်။
KySPP ပါတီက စစ်တပ်က အာဏာသိမ်းပြီးချိန် ၂၀၂၄ခုနှစ်၊ ဒီဇင်ဘာ ၂၆ ရက်မှာပါတီတည်ထောင်ခွင့်လျှောက်ထားချက်ကို စစ်ကောင်စီက ခွင့်ပြုခဲ့တာဖြစ်ကြီး ပြီး ပါတီရဲ့ ဥက္ကဌ ဦးဇော်မင်းဦးကို သိတဲ့သူ နည်းပါးပါတယ်။
လွိုင်ကော်မြို့မှာ ပြည်သူတွေ အပြည့်အဝနေထိုင်တာမျိုးမရှိတာကြောင့် လွတ်လပ်မျှတတဲ့ ရွေးကောက်ပွဲဖြစ်ဖို့ မဲဆွယ်စည်းရုံးနိုင်ခြင်းမရှိသလို ပြည်သူကို အတင်းအကြပ်စည်းရုံးခြင်းကလည်း မှန်ကန်တဲ့လုပ်ရပ်မဟုတ်ဘူး လို့ လွိုင်ကော် ဒေသခံတွေကလည်း ကန့်ကွက်ကြပါတယ်။
“စကစအောက်ကနေပြီးတော့ ရွေးကောက်ပွဲဖြစ် အောင်လုပ်တာပေါ့နော်၊ ဒါက ပြည်သူထောက်ခံမှုမပါဘူးဆိုတာလည်း ပြည်သူတွေသိတယ်၊ ကျွန်တော်ကတော့ ဘာမ မခံစားရပါဘူး၊ သူတို့ဖြစ်ရင် လုပ်ပေါ့ဆိုတဲ့ ပုံစံမျိုးလောက်ပဲရှိပါတယ်” လို့ လွိုင်ကော်ဒေသခံအမျိုးသားတစ်ဦးက ပြောပါတယ်။
ရွေးကောက်ပွဲပြုလုပ်ခြင်းက စစ်ကောင်စီတပ်ရဲ့ နိုင်ငံရေးထွက်ပေါက်တွေထဲက တခုအနေနဲ့ရှိနေကာ ရွေးကောက်ပွဲအတွက် မှတ်ပုံတင်လျှောက်ထားတဲ့ ပါတီ ၁၈ ခုရှိပြီး KySPP အပါအဝင် ၁၅ ပါတီကို စစ်ကောင်စီကခွင့်ပြုထားပြီးဖြစ်ပါတယ်။
တဖက်မှာလည်း စစ်ကောင်စီတပ်က လွိုင်ကော်မြို့ကနေ တခြားမြို့နယ် ဒေသတွေမှာ စစ်ဘေးတိမ်းရှောင်နေကြသူတွေကို လွိုင်ကော်မြို့အတွင်း ပြန်လည်နေထိုင်ဖို့ ဖိအားပေးတာ၊ ခြိမ်းခြောက်တာတွေလည်း ရှိနေပါတယ်။
CJ-004
#MeKongNews
