မဲခေါင်၊ ဇန်နဝါရီ ၂၆
တရုတ်ငွေဈေးတက်ရင် ကုန်ဈေးနှုန်းပါ တက်လေ့ရှိတဲ့ ရှမ်းပြည်မြောက်ပိုင်း၊ တန့်ယန်းမြို့မှာ တရုတ်ငွေဈေးကျပေမယ့် ကုန်ဈေးနှုန်း လိုက်ပါကျဆင်းတာမျိုးမရှိတဲ့ပြင် တက်မြဲတက်နေတာကြောင့် ဝင်ငွေနည်းအခြေခံလူတန်းစားတွေ စားနပ်ရိက္ခာ ပြတ်လပ်တဲ့အဆင့်ထိ ရောက်ရှိနေပြီလို့ ဒေသခံတွေက ပြောပါတယ်။
ရှမ်းပြည်မြောက်ပိုင်းက တရုတ်နိုင်ငံနဲ့ နီးကပ်နေပေမယ့် နယ်စပ်ဂိတ်တွေပိတ်ထားတာကြောင့် ကုန်ပစ္စည်းအသစ်ဝင်ရောက်မလာတာ၊ ဝင်လာတဲ့ကုန်ပစ္စည်းကလည်း မှောင်ခိုပစ္စည်းဖြစ်တာကြောင့် ဈေးနှုန်းကြီးမြင့်တာဖြစ်သလို ဝင်ရောက်လာတဲ့ ကုန်ပစ္စည်းကို အဆင့်ဆင့် အမြတ်တင်ရောင်းချတာတွေကြောင့် စားသုံးသူဟာ ဈေးကြီးပေးဝယ်ယူနေရတာဖြစ်တယ်လို့ လေ့လာသူတစ်ဦးက ပြောပါတယ်။
ဇန်နဝါရီ ၂၀ ရက်က “ဝ”ဒေသဘက်က နယ်စပ်ဂိတ်တွေ တရားဝင်ဖွင့်လှစ်ကာ ကုန်သွယ်ရေးပြန်လည်စတင်နေပေမယ့် တန့်ယန်းမှာ ကုန်ဈေးနှုန်းကြီးမြင့်နေဆဲပါပဲ။
၂၀၂၄ ခုနှစ်၊ သြဂုတ်လထဲမှာ တရုတ်ငွေ တစ်ယွမ်ကို ကျပ် ၈၅၀ ကနေ ၉၀၀ အထိမြင့်တက်ခဲ့ကတည်းက ကုန်စျေးနှုန်းဆက်တိုက် မြင့်တက်ခဲ့တာဖြစ်ပြီး တစ်ယွမ်ကို ကျပ် ၆၂၀ ထိပြန်ကျလာပေမဲ့ ကုန်စျေးနှုန်းပြန်လည်ကျဆင်းတာမရှိဘူးလို့ ဒေသခံတစ်ဦးက ပြောပါတယ်။
“တန့်ယန်းမှာ ကုန်စျေးနှုန်း အကျမရှိဘူး၊ မုန့်ညှင်းထုပ် တကယ့်သေးသေးလေးကို ၁၀၀၀ ပေးဝယ်ရတယ်၊ မိသားစုနဲ့က အနည်းဆုံး လေးငါးထုပ်မဝယ်ရင် စားမလောက်ဘူး” လို့ ပြောပါတယ်။
ယွမ်ဈေးမတက်ခင် ၂၀၂၄ ခုနှစ်၊ ဩဂုတ်လအစောပိုင်းကာလတွေတုန်းက အခြေခံစားသောက်ကုန်ဖြစ်တဲ့ ဆန်တစ်အိတ်ကို ကျပ် ၁၂၀,၀၀၀(တစ်သိန်းနှစ်သောင်းကျပ်) ဝန်းကျင်သာရှိပေမဲ့ လက်ရှိမှာ ကျပ်၁၈၀,၀၀၀ (ကျပ် တစ်သိန်းရှစ်သောင်း)ကနေ ကျပ်၂၀၀,၀၀၀ (နှစ်သိန်းကျပ်) ဝန်းကျင်ထိ ဈေးတက်နေပြီး တခြားအခြေခံစားသောက်ကုန်တွေလည်း ၃ ပုံ ၁ ပုံ ခန့် စျေးမြင့်တက်နေပါတယ်။
“ကုန်ဈေးနှုန်းကတော့ မြင့်သထက်မြင့်တာပဲ၊ တချို့ဆိုင်ဆို တရုတ်ငွေပဲယူကြတယ်၊ တရုတ်ငွေဈေးတက်ရင် ကုန်ဈေးနှုန်းတက်ပြီ၊ တရုတ်ငွေဈေးကျရင် ကုန်ဈေးနှုန်းကျတာတော့ မရှိဘူး၊ အခြေခံလူတန်းစားတွေ ငတ်တာပေါ့”လို့ ဒေသခံတစ်ဦးက ပြောပါတယ်။
ကုန်စျေးနှုန်း အလွန်အမင်းမြင့်တက်နေတဲ့အပေါ် USWA ပြောခွင့်ရ ဦးညီရန်းကို မဲခေါင်ကမေးမြန်းရာ “ကျွန်တော်တို့ တန့်ယန်းမဝင်ခင်ကတည်းက ကုန်စျေးနှုန်းက တက်နေတာ” လို့ ပြောပါတယ်။
၁၀၂၇ စစ်ဆင်ရေးဒုတိယလှိုင်းအတွင်း ၂၀၂၄ ခုနှစ်၊ ဇူလိုင် ၁၀ ရက်မှာ TNLA က တန့်ယန်းမြို့အနီးမှာရှိတဲ့ စစ်ကောင်စီရဲ့ အထိုင်စခန်းဖြစ်တဲ့ မန်ကတ်စခန်းနဲ့ မန်ပတ်စခန်းတွေကို တိုက်ခိုက်ခဲ့ပြီးနောက် ဇူလိုင်လ ၁၁ ရက်မှာ UWSA က စစ်ကောင်စီနဲ့ နားလည်မှုယူကာ တန့်ယန်းမြို့ထဲကိုဝင်ရောက်လာခဲ့ပြီး တန့်ယန်း၊ မိုင်းရယ်၊ ဟိုယ အထိ ဝင်ရောက်တပ်စွဲထားခဲ့တာပါ။
တန့်ယန်းမြို့ကို စစ်ကောင်စီတပ်က အဓိက ထိန်းချုပ်ထားတာဖြစ်ပြီး ကုန်စျေးနှုန်းမြင့်တက်မှုကို ထိန်းချုပ်တာတွေပြုလုပ်ခြင်း မရှိသေးဘူးလို့ ဒေသခံတွေက ပြောပါတယ်။
၁၀၂၇ စစ်ဆင်ရေးစတင်ကတည်းက တရုတ်ဘက်က နယ်စပ်ဂိတ်ပိတ်ခဲ့တာကြောင့် ဒေသတွင်းမှာ စက်သုံးဆီနဲ့ ကုန်စျေနှုန်းမြင့်တက်တာ၊ စားသုံးကုန်ရှားပါးတာတွေ ဖြစ်ပေါ်ခဲ့တာပါ။ စစ်ကောင်စီနဲ့ MNDAA တို့ အပစ်အခတ်ရပ်စဲပြီးတဲ့နောက် နယ်စပ်ဂိတ်တွေ ဖွင့်ပေးလိုက်ပေမဲ့ လားရှိုး၊ မိုင်းရယ်၊ တန့်ယန်းတို့မှာ ကုန်စျေးနှုန်းပြန်လည်ကျဆင်းတာ မရှိသေးပါဘူး။
MK-016
#MeKongNews
#တန့်ယန်း
#ကုန်ဈေးနှုနန်း
#တရုတ်ငွေဈေး
#နယ်စပ်ဂိတ်
