မဲခေါင်၊ ဇန်နဝါရီ ၂၀
ရှမ်းပြည်မြောက်ပိုင်း၊ စစ်ကောင်စီထိန်းချုပ်ထားတဲ့ မူဆယ်မြို့မှာ ပျောက်ကြားယူနီဖေါင်း ဝတ်ထားသူတစ်ဦးနဲ့ အရပ်ဝတ် ဝတ်ထားသူနှစ်ဦး လက်ထိပ်ခတ်ကာ အဓမ္မခေါ်ဆောင်ခံရတဲ့ ကုန်စုံဆိုင်ပိုင်ရှင်အမျိုးသမီးတစ်ဦး အခုထိ မိသားစုနဲ့ အဆက်အသွယ်ပြတ်တောက်နေတယ်လို့ ဆိုင်ရှင်နဲ့ နီးစပ်သူတစ်ဦးက ပြောပါတယ်။
CCTV မှတ်တမ်းအရ သုံးဦးထဲမှာ ပျောက်ကြားယူနီဖေါင်းဝတ်ထားသူဟာ လက်နက်ကိုင်ဆောင်ထားပြီး မူဆယ်မြို့၊ ကောင်းမူးတုန်ရပ်ကွက်၊ မီးသတ်ရုံးအနီးက ကုန်စုံဆိုင်တစ်ဆိုင်ရဲ့ ဆိုင်ပိုင်ရှင်အမျိုးသမီးထိုင်နေတဲ့ ကောင်တာစားပွဲထိလာရောက်ကာ လက်ထိပ်ခတ် ဖမ်းဆီးခေါ်ဆောင်သွားတာ ဖြစ်ပါတယ်။
ဇန်နဝါရီ ၁၈ ရက် ညပိုင်းက ခေါ်ဆောင်သွားတာဖြစ်ပြီး ဒီနေ့ (ဇန်နဝါရီ ၂၀) နေ့လယ် ၁ နာရီထိ မိသားစုနဲ့အဆက်အသွယ်ပြတ်နေဆဲဖြစ်တယ်လို့ ကုန်စုံဆိုင်ပိုင်ရှင် အမျိုးသမီးနဲ့နီးစပ်သူတစ်ဦးက ပြောပါတယ်။
ဒေသခံတွေက ပြန်ပေးဆွဲတာလို့ ယူဆကြပါတယ်။
“ဘယ် အဖွဲ့အစည်းဆိုတာတော့ မသိပါဘူး၊ လက်ထိပ်ခတ်ခေါ်သွားတာပေါ့ ” လို့ မူဆယ်မြို့ ဒေသခံအမျိုးသားတစ်ဦးက မဲခေါင်ကိုပြောပါတယ်။
မူဆယ်မြို့နယ်အတွင်းမှာ စစ်ကောင်စီ အပါအဝင် ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် အစရှိတဲ့ ပြည်သူ့စစ် ၁၅ ဖွဲ့ထက်မနည်း ရှိနေတယ်လို့ သိရပါတယ်။
လက်ရှိနိုင်ငံရေးအခြေအနေအရ မူဆယ်မြို့မှာ နေထိုင်သူတွေဟာ စီးပွားရေးကြပ်တည်းတာ အပါအဝင် မြို့တွင်းမူးယစ်ဆေးဝါးနဲ့ လောင်းကစားလုပ်ငန်းတွေပေါများလာတာကြောင့် အသက်အန္တရာယ်ခြိမ်းခြောက်မှုနဲ့ ပြန်ပေးဆွဲမှုတွေ ဆက်တိုက်ဖြစ်ပေါ်နေပြီး ငွေကျပ်သိန်းတစ်ထောင်ကနေ သိန်းတစ်သောင်းအထိ ငွေညှစ်တောင်းခံမှုတွေ ရှိနေပါတယ်။
ဒေသခံတွေအနေနဲ့ သတိထား သွားလာနေထိုင်ကြဖို့ လိုအပ်လာပြီလို့ မူဆယ်မြို့ ပရဟိတလုပ်ကိုင်နေသူတစ်ဦးက သတိပေးပါတယ်။
“အခု အမျိုးသမီးပြန်ပေးဆွဲခံရမှုကို အာဏာပိုင်တွေက စုံစမ်းနေတာတော့ ရှိပါတယ်၊ ဒါမျိုးက လူသိများလာပြီဆိုရင် အမှု ဖွင့်ဖွင့် မဖွင့်ဖွင့် စုံစမ်းစစ်ဆေးတာတွေလုပ်တာ သူတို့ထုံးစံပဲ၊ သူတို့လုပ်ထုံးလုပ်နည်းအတိုင်းတော့ လုပ်နေကြမှာပေါ့” လို့ သူကပြောပါတယ်။
လက်နက်တွေ အလွယ်တကူရနိုင်ပြီး တရားဥပဒေစိုးမိုးမှုအားနည်းတဲ့ တရုတ်-မြန်မာနယ်စပ် မူဆယ်မြို့က လုပ်ငန်းရှင်တွေဟာ ပြန်ပေးဂိုဏ်းတွေရဲ့ ပစ်မှတ်ဖြစ်နေတာပါ။
မူဆယ်မြို့စီးပွားရေးလုပ်ငန်းရှင်တစ်ဦးကို ပြန်ပေးဂိုဏ်းအဖွဲ့က ကားတစ်စီးနဲ့ အနောက်ကလိုက်ပြီး ပြန်ပေးဆွဲခဲ့တဲ့ဖြစ်စဉ် ၂၀၁၃ ခုနှစ်က ဖြစ်ပွားခဲ့ပါသေးတယ်။
အဲဒီနောက်ပိုင်း မူဆယ်မြို့ ပြန်ပေးဆွဲမှုတွေဟာ ပိုမိုရဲတင်းလာခဲ့ပြီး လမ်းပေါ်ပြန်ပေးဆွဲရာကနေ နေအိမ်တွေ ဈေးဆိုင်တွေအထိ ဝင်ရောက်ပြန်ပေးဆွဲတာတွေ ဖြစ်ပွားခဲ့ပါတယ်။
၂၀၂၄ ခုနှစ်၊ စက်တင်ဘာလအတွင်းမှာ အမည်မသိလက်နက်ကိုင်တွေရဲ့ သေနက်ပစ်ခြိမ်းခြောက် ဓားပြတိုက်မှု သုံးကြိမ်အထိ ဖြစ်ပွားခဲ့ကာ အလားတူ ၂၀၂၄ ခုနှစ်၊ ဒီဇင်ဘာ ၂၁ ရက်ကလည်း ဟိုမွန်ရပ်ကွက်မှာ အမျိုးသမီးတစ်ဦးကို သေနက်ထောက်ပြီး ကားကို ဓားပြတိုက်ခဲ့မှု ဖြစ်ပွားခဲ့ပါတယ်။
၂၀၂၅ ခုနှစ်၊ ဇန်နဝါရီ ၇ ရက်က အသက် ၂၀ အရွယ် နန်းချစ်စုအောင် ပျောက်ဆုံးခဲ့ရာ လေးရက်အကြာ ဇန်နဝါရီ ၁၁ ရက်မှာ မူဆယ် Win စီးကရက်စက်ရုံအနောက်ဘက်မှာ အသက်မဲ့ခန္ဓာကိုယ်သာ ပြန်လည်တွေ့ရှိခဲ့ပါတယ်။
ဒေသခံတွေရဲ့ ပြောကြားချက်အရ အပြင်သွားရင်း ဆိုင်ကယ်နဲ့ဖုန်း ပါသွားတဲ့အတွက် ဓားပြတိုက်ခံရကာ လူသူအရောက်အပေါက်နည်းတဲ့နေရာမှာ အလောင်းဖျောက်စွန့်ပစ်ထားတာဖြစ်နိုင်တယ်လို့ ဆိုပါတယ်။
အဲဒီဖြစ်စဉ်တွေဟာ မကြာခဏဆိုသလို မူဆယ်မြို့မှာဖြစ်ပွားနေပြီး အမှုအတော်များများနဲ့ပတ်သက်ပြီး လက်ရှိအချိန်ထိ တရားခံတွေကို ဖမ်းဆီးရမိတာ၊ ပြန်ပေးဆွဲဂိုဏ်းတွေကို ဖမ်းဆီးတာ၊ လောင်းကစားရုံတွေကို ပိတ်သိမ်းတာနဲ့ မူးယစ်ဆေးဝါးအမှုတွေကို ထိထိရောက်ရောက် အရေးယူဆောင်ရွက်နိုင်တယ်ဆိုတာမျိုး မကြားမိ မတွေ့ရှိရသေးဘူးလို့ ဒေသခံတွေက ပြောပါတယ်။
မူဆယ်မြို့ဟာ ၁၀၂၇ စစ်ဆင်ရေးပထမပိုင်းမှာ ညီနောင်သုံးဖွဲ့က တိုက်ခိုက်ဖို့ ပြင်ဆင်နေချိန် တရုတ်အစိုးရက ကြားဝင်ညှိနှိုင်းပေးခဲ့တဲ့ ဟိုင်ဂင်အပစ်ရပ်စာချုပ်ကြောင့် မတိုက်ခိုက်ပဲ ကျန်နေတဲ့မြို့ဖြစ်သလို တရုတ်နိုင်ငံနဲ့ အဓိကကုန်သွယ်ရေးမြို့လည်း ဖြစ်ပါတယ်။
လက်ရှိမှာတော့ မူဆယ် ၁၀၅ မိုင် ကုန်သွယ်ရေးဇုန်ကို တော်လှန်ရေးအင်အားစုတွေက ထိန်းချုပ်ထားတာဖြစ်ပြီး စစ်ကောင်စီနဲ့ ပြည်သူစစ်တွေဟာ မူဆယ်မြို့ပေါ်မှာသာ တပ်စွဲထားနိုင်ပေမယ့် အုပ်ချုပ်ရေးယန္တရား ကောင်မွန်စွာလည်ပတ်နိုင်တာမျိုး မရှိဘူးလို့ မူဆယ်မြို့ခံတွေက ပြောပါတယ်။
CJ-017
#MeKongNews
#မူဆယ်မြို့
#ကုန်စုံဆိုင်
#ပြန်ပေးဆွဲ
#ပျောက်ကြားယူနီဖေါင်း
