မဲခေါင်၊ ဇန်နဝါရီ ၁
၂၀၂၄ ခုနှစ်အတွင်း စစ်ကောင်စီက မတရားညှဉ်းပန်းနှိပ်စက်လို့သေဆုံးတာနဲ့ ဖမ်းဆီးသတ်ဖြတ်တာတွေကြောင့် နိုင်ငံတဝှမ်းမှာ သေဆုံးသူ ၁၇၉၁ ဦးရှိပြီး နိုင်ငံရေးအရဖမ်းဆီးခံရပြီး သေဆုံးရသူ ၅၈ ဦးရှိခဲ့ပါတယ်။
ရဲစခန်းမှာသေဆုံးရသူ ၁၂ ဦး ၊စစ်ကြောရေးမှာ သေဆုံးသူ ၁၅ ဦးနဲ့အကျဉ်းထောင်တွေမှာသေဆုံးသူ ၃၁ ဦးရှိပါတယ်။
၂၀၂၄ ခုနှစ်၊ ဇန်နဝါရီ ၁ ရက်ကနေ ဒီဇင်ဘာ ၃၁ ရက်အထိ တစ်နှစ်တာကာလအတွင်း စစ်ကောင်စီရဲ့လက်ချက်ကြောင့်သေဆုံးတဲ့ စာရင်းကို နိုင်ငံရေးအကျဉ်းသားများ ကူညီစောင့် ရှောက်ရေးအသင်း (AAPP)က ဒီနေ့ (ဇန်နဝါရီ ၁)ထုတ်ပြန်တာပါ၊ ထုတ်ပြန်ချက်ကို ‘ သံတိုင်နောက်မှ ဘဝများ’ လို့အမည်ပေးထားပါတယ်။
နိုင်ငံရေးအကျဉ်းသားတွေကို စစ်ကောင်စိရဲ့ လက်အောက်ခံ ရဲစခန်းတွေ၊ စစ်ကြောရေးစခန်းတွေနဲ့ အကျဉ်းထောင်တွေမှာ ချုပ်နှောင်ကာ စိတ်ပိုင်း၊ ရုပ်ပိုင်းနဲ့ လိင်ပိုင်းဆိုင်ရာ ညှဉ်းပန်းနှိပ်စက်မှုတွေကို နည်းလမ်းမျိုးစုံနဲ့လုပ်ဆောင်နေတယ်လို့ AAPPကဖေါ်ပြပါတယ်။
ဖမ်းဆီးခံပြီးနောက် စစ်ကြောရေးမှာ အပြင်းအထန် နှိပ်စက်ခံခဲ့ရပြီး အကျဉ်ထောင်တွင်း သေဆုံးခဲ့တဲ့ နိုင်ငံရေးအကျဉ်းသားတစ်ဦးရဲ့ ဇနီးဖြစ်သူက “ စစ်ကြောရေးမှာ တော်တော်ခံခဲ့ရတယ်တဲ့၊ ပေါင်တွေအမွှန်းခံရတယ်၊ စစ်ဘိနပ်တွေနဲ့အကန်ခံရတယ်၊ ထုထောင်းရိုက်နှက်ခံရတယ်၊ လိင်အကြမ်းဖက်ခံရတယ်ပြောတယ်” လို့ ထုတ်ပြန်ချက်မှာပါရှိပါတယ်။
ထောင်ဆူပူမှုဖြစ်ပြီး အဲ့ဒီအကျဉ်းသား ကျဆုံးတယ်လို့ ဇနီးဖြစ်သူက သိသိချင်းအတည်ပြုဖို့သွားရာမှာ လည်ပင်းနဲ့ ဗိုက်ကိုပြန်ချုပ်ထားပြီး ခေါင်းကိုလည်း လွှာချုပ်ထားတာကိုမြင်တွေ့ရတယ်လို့ သိရပါတယ်။
အကြမ်းဖက်စစ်အုပ်စုဟာ တိုင်းပြည်အာဏာရယူရန် ကြိုးပမ်းရာမှာ ၄ နှစ် ပြည့်တော့မယ့် ကာလကိုရောက်ရှိလာပေမယ့် အာဏာလုယူမှုဟာ အောင်မြင်ခြင်းမရှိပဲ နယ်မြေအများအပြားကိုပါ ထိန်းချုပ်နိုင်ခြင်းမရှိတော့ပါ။ တိုင်းရင်းသားတော်လှန်ရေးအဖွဲ့များထံ လက်လွှတ်လိုက်ရပြီးနောက် နိုင်ငံရေးအရ ဖမ်းဆီးထားတဲ့ နိုင်ငံရေးအကျဉ်းသားတွေအပေါ် ပိုမိုရမ်းကား ဖိနှိပ် ရက်စက်လာတယ်လို့ဆိုပါတယ်။
နေရာဒေသအသီးသီးမှာ ရာဇဝတ်မှုတွေကို ဆိုးဆိုးရွားရွားကျူးလွန်နေတဲ့ အကြမ်းဖက်စစ်အုပ်စုဟာ အကျဉ်းထောင်နဲ့ စစ်ကြောရေးစခန်းတွေမှာလည်း ရက်စက်ပြင်းထန်တဲ့ လူ့အခွင့်အရေးချိုးဖောက်မှုတွေကို စနစ်တကျ ကျင့်သုံးလျက်ရှိနေဆဲပါ။
၂၀၂၄ တစ်နှစ်အတွင်း AAPP ရဲ့ ကောက်ယူရရှိတဲ့အချက်အလက်အရ နိုင်ငံရေးအရ ဖမ်းဆီးခံသူ ၇၅၁ ဦးရှိတဲ့အနက် ၇၄၈ ဦးဟာ လက်ရှိ ထိန်းသိန်းခံထားရဆဲလို့ပါရှိပါတယ်။
နိုင်ငံရေးသမားတွေကို အကျဉ်းထောင်နဲ့အချုပ်ထောင် ၅၀ ခုမှာချုပ်နှောင်ထားရှိပြီး ဆောက်လုပ်ဆဲ အချုပ် ထောင်နဲ့ အကျဉ်းထောင်လေးခုရှိတယ်လို့ဖော်ပြထားပါတယ်။
စစ်ကောင်စီရဲ့ အကျဉ်းဦးစီးဌာန စာရင်းမှာတော့ အကျဉ်းထောင် ၄၆ ခုနဲ့ အချုပ် ထောင် ၁၉ ခုရှိကာ ကုန်ထုတ်အလုပ်ကြမ်းစခန်း ၃၁ ခုရှိတယ်လို့သိရပါတယ်။
နိုင်ငံတကာအသိုင်းအဝိုင်းအနေနဲ့ အကြမ်းဖက်စစ်အုပ်စုရဲ့ တရားဝင်မှုမပေးပဲ သမ္မတဦးဝင်းမြင့်နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားတွေအားလုံး အမြန်ဆုံးပြန်လည် လွှတ်ပေးရေးနဲ့ အကြမ်းဖက်စစ်အုပ်စုအပေါ် ထိရောက်စွာဖိအားပေးရေး၊ နိုင်ငံတကာရာဇဝတ်မှုကျူးလွန်တာတွေအတွက် တာဝန်ယူမှု တာဝန်ခံမှုရှိလာစေရေးကို ဝိုင်းဝန်းကြိုးပမ်း ကူညီပံ့ပိုးပေးရန် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) မှ တိုက်တွန်းထားပါတယ်။
MK-012
#MekongNews
#စစ်ကောင်စီ
#ပြည်သူ၁၈၀၀နီးပါး
#အကျဉ်းထောင်
#သတ်ဖြတ်ခဲ့
