မဲခေါင်၊ ဒီဇင်ဘာ ၂၈
ရှမ်းပြည်တောင်ပိုင်း၊ အင်တောမြို့ဝန်းကျင်မှာ ရှမ်းလက်နက်ကိုင်နှစ်ဖွဲ့ဖြစ်တဲ့ SSPP နဲ့ RCSS ဒီနေ့ မနက်အထိတိုက်ပွဲပြင်းထန်ခဲ့တယ်လို့ ဒေသခံတွေဆီက သိရပါတယ်။
မနေ့က(ဒီဇင်ဘာ ၂၇) ည ၉ နာရီခန့်ကတည်းက တိုက်ခိုက်နေတာဖြစ်ပြီး ဒီနေ့( ဒီဇင်ဘာ၂၈) မနက် ၆ နာရီလောက်အထိ သေနတ်သံတွေကြားနေရတယ်လို့ဒေသခံတွေကပြောပါတယ်။
အင်တောမြောက်ဘက် အထွက် SSPP စခန်းနဲ့၊ ဇော်ဂျီဆည်က အင်တောဘက်အထွက်၊ ပါမဲလုံရွာ ကိုးကွေ့ဘက်၊ အင်တော အနောက်မြောက်လေးမိုင်လောက်ဝေးတဲ့ မြို့ရေပေးဝေရေး၊ ရေထွက်တောင် ရေငံပေါက် အစရှိတဲ့ သုံးနေရာမှာ တိုက်ပွဲဖြစ်သံတွေကြားခဲ့ရတာလို့ ပြောပါတယ်။
“အထိအခိုက်တော့ ရွာသားတွေ မရှိဘူး၊ ရွာထဲလည်း ကျည်မကျဘူး” လို့ ပါမဲလုံရွာနဲ့နီးစပ်သူတစ်ဦးက ပြောပါတယ်။
အခု တိုက်ပွဲနဲ့ပတ်သက်ပြီး သက်ဆိုင်ရာ တပ်တွေက သတင်းထုတ်ပြန်တာ မရှိသေးသလို မဲခေါင်အနေနဲ့လည်း ဆက်သွယ်နေဆဲဖြစ်ပါတယ်။
ပြီးခဲ့တဲ့ ၂၀၂၃ ၊ နိုဝင် ဘာ ၂၉ရက်က ရှမ်းလက်နက်ကိုင်တပ်နှစ်ဖွဲ့ဖြစ်တဲ့ SSPP နဲ့ RCSS တို့ အပစ်အခတ်ရပ်စဲဖို့ လက်မှတ်ထိုးသဘောတူကြပေမယ့် သုံးလအကြာမှာ နှစ်ဘက်တိုက်ပွဲ တွေပြန်ဖြစ်ခဲ့ပါတယ်။
ဒီဇင်ဘာ ၁၅ ရက်မနက်က SSPP ရဲ့ယာဉ်တန်းကို RCSS ကမိုင်းဆွဲတိုက်ခိုက်ခဲ့ကြောင်း SSPP က ဒီဇင်ဘာ ၁၆ ရက်မှာထုတ်ပြန်ခဲ့ပါသေးတယ်။ အဲ့ဒီတိုက်ခိုက်မှုမှာ အရပ်သား မိသားစုသုံးဦး ဒဏ်ရာရရှိခဲ့ပါတယ်။
MK-012
#MekongNews
#RCSS
#SSPP
#အင်တောဘက်
#တိုက်ပွဲဖြစ်
