မဲခေါင်၊ ဒီဇင်ဘာ ၂၀
၂၀၂၁ ခုနှစ်၊ စစ်တပ်အာဏာသိမ်းပြီးနောက်ပိုင်း ဖက်ဒရယ်ပြည်ထောင်စုတည်ထောင်မယ်လို့ ကြေညာခဲ့တဲ့ မြန်မာနိုင်ငံဟာ ဖက်ဒရယ်သတင်းစကား ပြောဆိုဖြန့်ဝေတာ နည်းပါးပြီး စစ်ရေးနည်းလမ်းနဲ့ အကြမ်းဖက်မှုကို အားပေးတာအများဆုံးဖြစ်တယ်လို့ Blue Shirt အဖွဲ့က ထောက်ပြပါတယ်။
ဒီမိုကရေစီစံနှုန်း တန်ဖိုးတွေ၊ လူ့အခွင့်အရေး၊ ဖက်ဒရယ်အရေးတွေနဲ့ ပတ်သက်တဲ့ စိတ်ကူးစိတ်သန်းတွေ အယူအဆအတွေးအခေါ်တွေကို ပြောဆိုဆွေးနွေးပြုလုပ်တာ နည်းပါးတာကိုတွေ့ရတယ်လို့ ထုတ်ပြန်တာပါ။
အများပြည်သူအကြား တုံ့ပြန်မှုအများဆုံးရရှိတဲ့ နိုင်ငံရေးသတင်းစကားတွေကတော့ လက်ရှိနိုင်ငံရေးပဋိပက္ခနဲ့ ပတ်သက်ပြီး စစ်ရေးနဲ့ နိုင်ငံရေးဆိုင်ရာ ရေတိုရည်မှန်းချက်တွေအပေါ် အဓိကထားတာတွေ့ရပြီး ဒီမိုကရေစီစံနှုန်းတန်ဖိုးတွေ၊ လူ့အခွင့်အရေး၊ ဖက်ဒရယ်အရေးတွေနဲ့ ပတ်သက်တဲ့ စိတ်ကူးစိတ်သန်းတွေနဲ့ အယူအဆအတွေးအခေါ်တွေကို ပြောဆို ဆွေးနွေးမှုပြုလုပ်တဲ့အကြောင်းအရာတွေ နည်းပါးတယ်လို့ ဆိုပါတယ်။
Blue Shirt ရဲ့ စစ်တမ်းဟာ လူမှုကွန်ရက်မီဒီယာတွေဖြစ်တဲ့ Facebook နဲ့ Telegram ပေါ်က အများပြည်သူရဲ့ သတင်းစကားကို အခြေခံတာဖြစ်ပြီး ကိန်းဂဏန်းအနေနဲ့ စစ်ရေးနည်းလမ်းနဲ့ အကြမ်းဖက်မှုကို အားပေးတာ ၉၁၉ ခု၊ နိုင်ငံသားတွေပါဝင်ရေး အားပေးတာနဲ့ ဆော်ဩတိုက်တွန်းတာ ၉၀၆ ခု၊ လူ့အဖွဲ့အစည်းအတွင်း အကွဲအပြဲ ပိုမိုကြီးမားစေဖို့အတွက် လှုံ့ဆော်တာ ၂၃၆ ခု၊ ဖက်ဒရယ်စနစ်နဲ့ နိုင်ငံရေးနည်းလမ်း ၉၁ ခု၊ လစ်ဘရယ်နဲ့ ဒီမိုကရေစီတန်ဖိုးကို အားပေးမြှင့်တင်တာ ၈၅ ခု လို့ ဖေါ်ပြထားပါတယ်။
နိုင်ငံရေးခေါင်းဆောင်တွေ၊ တက်ကြွလှုပ်ရှားသူတွေ၊ နိုင်ငံရေးနဲ့ပတ်သက်ပြီးမှတ်ချက်ပြုရေးသားကြသူတွေရဲ့ Facebook စာမျက်နှာ ၂၀၇ ခု၊ Telegram Channel ၂၄ ခုပေါ်မှ Facebook ပိုစ့် ၂၃၀၇ ခု၊ Telegram သတင်းစကား ၂၀၀ ခု ကို ဆန်းစစ်လေ့လာခဲ့တယ်လို့ ဆိုပါတယ်။
စစ်တမ်းကို ၂၀၂၁ ဒီဇင်ဘာကနေ ၂၀၂၄ ဩဂုတ်အထိ ပြုလုပ်တာဖြစ်ပြီး သူတို့ရဲ့ အခုဆန်းစစ်တွေ့ရှိချက်ကို ဒီဇင်ဘာ ၁၇ ရက်မှာ ထုတ်ပြန်တာပါ။
အမျိုးသားညီညွတ်ရေးအစိုးရ(NUG)မှာ ဒေါက်တာ လျန်မှုန်းဆာခေါင်း ဝန်ကြီးအဖြစ်တာဝန်ယူထားတဲ့ ဖက်ဒရယ်ပြည်ထောင်စုရေးရာဝန်ကြီးဌာန ရှိပေမယ့် ပြည်သူတွေကို ဖက်ဒရယ်နဲ့ပါတ်သက်တဲ့ အသိပညာတိုးပွါးရေးလုပ်ဆောင်ချက်တွေ မရှိသလောက်ပါပဲ။
ပြည်ထောင်စုလွှတ်တော်ကိုယ်စားပြုကော်မတီ(CRPH)က ကမကထပြုပြီး အဖွဲ့အစည်းပေါင်းစုံနဲ့ ဆွေးနွေးအတည်ပြုခဲ့တဲ့ ဖက်ဒရယ်ဒီမိုကရေစီပဋိညာဏ် ကို ၂၀၂၁ ခုနှစ်၊ မတ်လ ၃၀ ရက်မှာ ကြေညာစာတမ်းစီစဉ်ခဲ့ပေမယ့် ပြည်သူအများစု မသိကြပါဘူး။
အဲ့ဒီစာတန်းကို ရွေးကောက်ခံလွှတ်တော်ကိုယ်စားလှယ်တွေ၊ နိုင်ငံရေးပါတီတွေ၊ CDM ဦးဆောင်သူတွေ၊ အထွေထွေသပိတ်အင်အားစုတွေ၊ အမျိုးသမီးနဲ့လူငယ်အင်အားစုတွေ၊ အရပ်ဖက်လူမှုအဖွဲ့အစည်းနဲ့ တိုင်းရင်းသားတွေ၊ လက်နက်ကိုင်တော်လှန်ရေးအဖွဲ့တွေနဲ့ ဆွေးနွေးအတည်ပြုခဲ့ကြတာပါ။
မဲခေါင်က မြေပြင်တော်လှန်ရေးအထောက်အကူပြုအဖွဲ့ Ground Revolution Support Team (GRST )ကို ဖက်ဒရယ်နဲ့ပတ်သက်တဲ့ လုပ်ဆောင်ချက်တွေမေးမြန်းခဲ့ရာ တပ်ဖွဲ့ဝင်တွေကို အခြေခံဖက်ဒရယ်သဘောတရား၊ အခြေခံ ဒီမိုကရေစီသဘောတရားနဲ့ နိုင်ငံရေးအခြေခံသင်တန်းတွေ ပေးဖြစ်သလို တပ်ရင်းတပ်ဖွဲ့တွေရဲ့ ဖိတ်ကြားချက်အရ စစ်ပညာမွမ်းမံသင်တန်းတွေမှာလည်း တစ်နှစ်ကို ငါးကြိမ်ခန့် မျှဝေဖြစ်တယ်လို့ အဲ့ဒိအဖွဲ့ရဲ့ တာဝန်ခံကပြောပါတယ်။
NLD အစိုးရလက်ထက်မှာ ဖက်ဒရယ်အသံအနည်းငယ်ထွက်ပေါ်ခဲ့ပေမယ် ၂၀၂၀ ရွေးကောက်ပွဲနီးကာလမှာ အသံပိုထွက်လာပါတယ်။ အသံထွက်ခဲ့ပေမယ့် ဖက်ဒရယ်ကြိုးပမ်းမှုနဲ့ အကောင်အထည်ဖော်တာ မတွေ့ရပါဘူး။ ၂၀၂၁ အာဏာသိမ်းပြီးနောက်ပိုင်း NUG နဲ့ CRPH က တိုင်းရင်းသားလက်နက်ကိုင်တွေ သဘောကျစေမယ့် ဖက်ဒရယ်ပြည်ထောင်စုတည်ထောင်ရေး အသံထွက်ပေါ်လာပြီးမှ စစ်ကောင်စီကလည်း ဖက်ဒရယ်အသံထွက်ပေါ်လာခဲ့ပါတယ်။ ဒါပေမယ့် ဖက်ဒရယ်အကောင်အထည်ဖော်ရေးထက် စစ်ရေးပဋိပက္ခကိုသာ ဦးစားပေးနေတာပါ။
#MekongNews
#စစ်ရေးပဋိပက္ခ
#ဖက်ဒရယ်
#အမုန်းစကား
#NUG
#CRPH
