မဲခေါင်၊ ဒီဇင်ဘာ ၁၁
သွေးစည်းညီညွတ်ရေးကို အခြေခံပြီး ပအိုဝ်းအချင်းချင်းအကြား ပဋိပက္ခမဖြစ်စေရေးကို PNO/PNA က ပူပေါင်းဆောင်ရွက်ပေးရေး၊ လုံးဒါညီလာခံမှာချမှတ်ခဲ့တဲ့ အချက်သုံးချက်နဲ့အညီ လူထုတော်လှန်ရေးမှာ PNO/PNA အနေနဲ့ ပြန်လည်ပူးပေါင်းရေး၊ ဘက်ပြောင်းခိုလုံလာကြသူများကို နွေးထွေးစွာကြိုဆိုကြရန် PNLO နဲ့ PNLA က တိုက်တွန်း နှိုးဆော်ကြောင်း ဒီနေ့ထုတ်ပြန်ပါတယ်။
PNO/PNA စတင်ဖွဲ့စည်းကတည်းက လုံးဒါညီလာခံမှာချမှတ်ခဲ့တဲ့ စစ်အာဏာရှင်စနစ်နဲ့ မဟာလူမျိုးဝါဒဆန့်ကျင်တိုက်ဖျက်ရေး ၊ ဖက်ဒရယ် ဒီမိုကရေစီပြည်ထောင်စု ထူထောင်ရေးမူနဲ့အညီ လူထုတော်လှန်ရေးကြီးမှာ ပါဝင်နွှဲရေး နှိုးဆော်ထားပါတယ်။
တော်လှန်ရေးတပ်ဖွဲ့ဝင်များအနေနဲ့ စစ်အုပ်စုနဲ့အပေါင်းပါများဖန်တီးထားတဲ့ လူထုဆန့်ကျင်ရေးထောင်ချောက်များအတွင်း မကျရောက်စေရေးအတွက် အထူးသတိထားကာ ဘက်ပြောင်းခိုလုံကြသူများကို ကျင့်ဝတ်စည်းကမ်းနဲ့အညီ နွေးထွေးစွာကြိုဆိုကြပါရန် ပန်ကြားထားပါတယ်။
(၇၅) နှစ်မြောက် ပအို၀်းတော်လှန်ရေးနေ့ (ပဒေသရဇ်စနစ်ဆန့်ကျင်တော်လှေန်ရေးနေ့) မှာ ပအိုဝ်းအမျိုးသားလွတ်မြောက် ရေးအဖွဲ့ချုပ် PNLO နဲ့ ပအို၀်းအမျိုးသားလွတ်မြောက်ရေးတပ်မတော် PNLA တို့ရဲ့ ဒီကနေ့( ဒီဇင် ၁၁ ) ပူးပွဲထုတ်ပြန်ချက်မှ အခုလို ထည့်သွင်းကြေညာထားတာပါ။
PNFC နဲ့ PNLO တို့ဟာ နိုင်ငံရေး၊ စစ်ရေး၊ အုပ်ချုပ်ရေး၊ လူသားချင်းစာနာမှုကိစ္စရပ်တွေ အပါအ၀င် လူထုအကျိုးပြုလုပ်ငန်းတွေကို ပူးပေါင်းဆောင်ရွက်သွားမယ်လို့ ဆိုပါတယ်။
စစ်ကောင်စီလက်အောက်ခံ PNO ပြည်သူ့စစ်ဟာ နွေဦးတော်လှန်ရေးကာလအတွင်း စစ်ကောင်စီနဲ့ပူး ပေါင်းပြီး တော်လှန်ရေးတပ်ဖွဲ့တွေကို ကရင်နီပြည်နယ်အထိ၀င်ရောက် တိုက်ခိုက်တာ၊ အာဏာရှင်ဆန့်ကျင်ရေးမှာ ပါ၀င်တဲ့ ပအို၀်းလူငယ်အများအပြားကို ဖမ်းဆီးပြီး စစ်ကောင်စီထံ အပ်နှံတာတွေ လုပ်ဆောင်ခဲ့ဖူးပါတယ်။
ဒါ့အပြင် ရှမ်းပြည်တောင်ပိုင်း ဆီဆိုင်မြို့နယ်ရှိ တွေပူးကျေးရွာက ရွာသူကြီးကို စစ်ကောင်စီတပ်နဲ့ PNO ပြည်သူ့စစ်တွေက ပြီးခဲ့တဲ့ ဒီဇင်ဘာ ၇ ရက်က နေအိမ်ထိ၀င်ရောက်ဖမ်းဆီးသွားခဲ့တယ်လို့ PNLA က ပြောပါတယ်။
ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO/PNLA ဟာ ရှမ်းပြည်နယ်တောင်ပိုင်း ဆီဆိုင်မြို့နယ်နဲ့ အနီးတစ်၀ိုက် ဟိုနမ့်ဒေသမှာ စစ်ကောင်စီနဲ့ မြေပြင်ထိတွေ့တိုက်ပွဲတွေ ဖြစ်ပွားနေတာပါ။
“ဆီဆိုင်ဘက်မှာ စစ်ကြောင်း နှစ်ကြောင်း ဟိုနမ့်ဘက်မှာက စစ်ကြောင်း တစ်ကြောင်း ဒီလိုစစ်ကြောင်း သုံးကြောင်းနဲ့စစ်ကောင်စီက PNLO/PNLA ရဲ့ ထိန်းချုပ်ဧရိယာတွေကို၀င်ပြီးသူတို့တိုက်ခိုက်နေတာဖြစ်ပါတယ်၊ အဲလို တိုက်ခိုက်တဲ့နေရာမှာ အထူးသဖြင့်တော့ ဟိုနမ့်ဒေသမှာမြေပြင်တိုက်ပွဲတွေ ပိုမိုပြီးပြင်းပြင်းထန်ထန်ဖြစ်နေပါတယ်” လို့ ပအိုဝ်းအမျိုးသား ဖက်ဒရယ်ကောင်စီ PNFC ပြောရေးဆိုခွင့်ရှိသူက ပြောပါတယ်။
စစ်ကောင်စီရဲ့ စစ်ကြောင်း သုံးကြောင်းနဲ့ တိုက်ပွဲဖော်ဆောင်နေတဲ့ဒေသတွေမှာ စစ်ကောင်စီဘက်က လေယာဉ်တွေနဲ့ ဗုံးကြဲတာ၊ လက်နက်ကြီးတွေနဲ့ပစ်တာ၊ ဒရုံးတွေနဲ့ပစ်တာအပြင် လူအင်အား၊ လက်နက်အင်အား စသဖြင့် သာလွန်အင်အားသုံး တိုက်ခိုက်နေတယ်လို့ ဆိုပါတယ်။
ပအိုဝ်းအမျိုးသားဖက်ဒရယ်ကောင်စီ PNFC ကို ၂၀၂၁ ခုနှစ် ဒီဇင်ဘာမှာကျင်းပခဲ့တဲ့ ပအို၀်းအမျိုးသား ဖက်ဒရယ်ညီလာခံ အပြီးမှာ စတင်ဖွဲ့စည်းခဲ့တာဖြစ်ပြီး အာဏာရှင်စနစ်အမျိုးမျိုးကိုတော်လှန်ကာ ဖက်ဒရယ်ဒီမိုကရေစီစနစ် တည်ဆောက်ရေးမှာ ပါ၀င်သွားမှာဖြစ်တယ်လို့ ကြေညာထားပါတယ်။
CJ-017
#MekongNews
#ပအိုဝ်း
#ဟိုနမ့်ဒေသ
#စစ်ကြောင်း
#ဆီဆိုင်
#ရှမ်းပြည်
