မဲခေါင်၊ ဒီဇင်ဘာ ၉
ဒီနေ့ကစပြီး တစ်ပတ်အတွင်း ဘင်္ဂလားပင်လယ်အော်မှာ လေဖိအားနည်းရပ်၀န်း တစ်ခုဖြစ်ပေါ်လာနိုင်တာကြောင့် ရှမ်းပြည်တောင်ပိုင်းနဲ့ ကရင်နီပြည်အပါအဝင်ဒေသတချို့မှာ နေရာကွက်ကြားမိုးရွာနိုင်ပြီး ဆောင်းသီးနှံတွေအတွက်ဖျက်မိုးသတိပြုဖို့ အမျိုးသားညီညွတ် ရေးအစိုးရ(NUG)၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး၀န်ကြီးဌာန (MOHADM) က ဒီနေ့(ဒီဇင်ဘာ ၉ ) သတင်းထုတ်ပြန်ပါတယ်။
ဘင်္ဂလားပင်လယ်အော် အရှေ့တောင်ပိုင်းအတွင်း ဒီနေ့ကစပြီး အစပျိုးလာတဲ့ လေဖိအားနည်းရပ်၀န်းတစ်ခုမှာ ဒီဇင်ဘာ ၁၀ ရက်ကစတင်ပြီး အားကောင်းတဲ့ လေဖိအားနည်းရပ်၀န်းအဆင့်ကို ရောက်ရှိလာနိုင်ခြေရှိကာ ဒီဇင်ဘာ ၁၂ ရက်တွင် အိန္ဒိယနိုင်ငံ တမီးလ်နာဒူးကမ်းခြေကို ဖြတ်ကျော်ကာ အားလျော့သွားနိုင်တယ်လို့ ထုတ်ပြန်ထားပါတယ်။
ဒါပေမဲ့ ဒီဇင်ဘာ ၁၄ နဲ့ ၁၅ ရက်တွေမှာတော့ ဘင်္ဂလားပင်လယ်အော်အရှေ့တောင်ပိုင်းမှာ နောက်ထပ် လေပွေလှိုင်းတစ်ခု ထပ်မံဖြစ်ပေါ်လာနိုင်ပြီး အဆိုပါလေပွေလှိုင်းမှာလည်း တမီလ်းနာဒူးကမ်းခြေဘက်သို့သာ ဦးတည်ရွေ့သွားနိုင်တယ်လို့ ဆိုပါတယ်။
ဒါ့ကြောင့် ဒီနေ့မှစတင်ကာ ရှမ်းပြည်၊ ကရင်နီပြည်နဲ့ တနင်္သာရီတိုင်းတွေမှာ နေရာကွက်ကျားမိုးရွာသွန်းနိုင်ပြီး ကျန်ဒေသတွေမှာ တိမ်အသင့်အတင့် ဖြစ်ထွန်းနိုင်ပါတယ်။
ဒီအပြင် ဒီဇင်ဘာ ၁၀ ရက်ကနေ ၁၅ ရက်အထိ ရခိုင်ပြည်နယ်၊ ဧရာ၀တီ၊ ရန်ကုန်၊ ပဲခူးတိုင်းနဲ့ ရှမ်းပြည်တောင်ပိုင်းတွေမှာ မိုးဆက်လက်ရွာနိုင်တယ်လို့ MOHADM က ခန့်မှန်းထားပါတယ်။
၂၀၂၄ ခုနှစ် မုတ်သုန်ရာသီပြီးဆုံးချိန်ကာလမှာ ပြီးခဲ့တဲ့ (၂၀၂၃/၂၄) ရာသီထက် ဘင်္ဂလားပင်လယ်အော်၊ တောင်တရုတ်ပင်လယ်ပြင်နဲ့ ပစ္စိဖိတ်သမုဒ္ဒရာအနောက်ပိုင်းမှာ တိုင်းဖွန်းမွန်တိုင်နဲ့ ဆက်စပ်နေတဲ့လေဗွေလှိုင်းတွေ အာရှတိုက်ကုန်းမြေဘက်ကို ၀င်ရောက်လာမှုများပြားနိုင်တာကို သတိပြုရန်နဲ့ ဆောင်းသီးနှံတွေအတွက်လည်း ဖျက်မိုးအဖြစ် ကြုံတွေ့နိုင်တယ်လို့ သတိပေး ထုတ်ပြန်ထားပါတယ်။
CJ-017
#MekongNews
#ရှမ်းပြည်
#ကရင်နီပြည်
#မိုးရွာနိုင်
#ဆောင်းသီးနှံ
#ဖျက်မိုး
