မဲခေါင်၊ ဒီဇင်ဘာ ၃
ကရင်နီဒေသကို ရောက်လာတဲ့ စစ်ကောင်စီရဲ့ ခလရ(၈၀)က ရာထူးကြီးငယ်မရွေး မူးယစ်ဆေးသုံးစွဲပြီး ပြည်သူတွေရဲ့ နေအိမ်တွေကို မီးရှို့ခဲ့ကြတယ်လို့ KNDF(Karenni Nationalities Defence Force) ထုတ်ပြန်တဲ့ ဗွီဒီယိုဖိုင်မှာ သုံ့ပန်းအနေနဲ့ ဖမ်းဆီးခံရတဲ့ စစ်ကောင်စီတပ်ဖွဲ့ဝင်တွေက ပြောပါတယ်။
အဓမ္မနည်းနဲ့ စစ်သင်တန်းပေးပြီး စစ်မှုထမ်းခိုင်းသူတွေကိုလည်း မူးယစ်ဆေးသုံးစွဲစေပြီး မသင်္ကာတဲ့ နေအိမ်တွေ၊ ပစ်ကွင်းမရှင်းတဲ့ နေအိမ်တွေ၊ အဝတ်အစားတွေ့ရှိတဲ့အိမ် တော်တော်များများကို စစ်ကြောင်းအကြီးအကဲရဲ့ ခိုင်းစေချက်အရ မီးရှို့ခဲ့ကြတယ်လို့ သုံ့ပန်းတွေက ပြောပါတယ်။
“အလုံးရေက တော်တော်များတယ်၊ အိမ် ၅၀ ကျော် ၆၀ နီးပါးတောင် မကဘူးဗျ၊ ရှို့တာ” လို့ သုံ့ပန်းတစ်ဦးက ပြောပါတယ်။
နောက်တစ်ဦးကလည်း “ကြီးတဲ့သူတွေက ရှို့ဆိုတော့လည်း ရှို့ရတာပေါ့လေ၊ ဒီလိုမျိုးလုပ်ခဲ့မိတာတွေကို ခွင့်လွှတ်ပေးပါလို့ ပြည်သူကို တောင်းပန်ပါတယ်၊ လွန်ဆန်လို့မရလို့ လုပ်ခဲ့ရတာပါ” လို့ပြောပါတယ်။
Wy စာသားပါတဲ့ ပန်းရောင်ဆေးပြားတွေကို စစ်ကောင်စီရဲ့ အရာရှိတွေကိုယ်တိုင်လည်း သုံးကြသလို အောက်လက်ငယ်သားတွေကိုလည်း ဝေမျှအသုံးပြုစေကာ စစ်မြေပြင်မှာ ရှေ့ကိုတက်ခိုင်းတာတွေ၊ နေအိမ်မီးရှို့တာတွေကို တွင်တွင်ကျယ်ကျယ် ပြုလုပ်ခိုင်းနေတာပါ။
“တပ်စိတ် သုံးစိတ်လုံးကို ဆေးသုံးခိုင်းတယ်၊ မရ ရရာရှာကြံပြီးတော့ ဝယ်ကြတယ်။ သူတို့ကိုယ်တိုင်လည်းလုပ်တယ်၊ ခွင့်လည်း ခွင့်ပြုထားတယ်” လို့တပ်သား ဖိုးထူးကပြောပါတယ်။
ခလရ(၈၀)စစ်ကြောင်းဟာ နောက်တန်းပြန်မယ်လို့ လက်အောက်ကို လိမ်ညာပြောကာ လှုပ်ရှားထွက်ခဲ့ရာမှ လွိုင်ကော်မြို့နယ်၊ လင်ဖုံလေးကျေးရွာအနီးရောက်ရှိစဉ် ၂၀၂၄၊ နိုဝင်ဘာ ၂၅၊ ၂၆ ရက်တွေမှာ တော်လှန်ရေးတပ်ဖွဲ့တွေနဲ့ ထိတွေတိုက်ပွဲဖြစ်ခဲ့ပြီး တပ်ခွဲတစ်ခွဲလုံးနည်းပါး သေဆုံးကာ သုံ့ပန်းအဖြစ် ငါးဦးကို ဖမ်းဆီးရမိခဲ့တာ ဖြစ်ပါတယ်။
စစ်ကောင်စီ ဗိုလ်မှူးဆိုသူနဲ့ အရာရှိ နှစ်ဦးဟာ တိုက်ရဲခိုက်ရဲဖို့ မူးယစ်ဆေးသုံးထားပေမယ့် တိုက်ပွဲဖြစ်ပွါးချိန်မှာ နောက်ကိုပြန်လှည့်ထွက်ပြေးသွားလို့ သုံ့ပန်းတွေက မကျေမနပ်ဖြစ်နေကြပါတယ်။
“ကျွန်တော် မကျေနပ်တာက ဗိုလ်မှူးကို၊ သူကျတော့ နောက်ဆုတ်တယ်၊ ကျန်တဲ့သူတွေကျ တစ်ယောက်မှ နောက်မဆုတ်နဲ့ ခံပစ် ခံပစ်ဆိုပြီးပြောတယ်။ သူသေမှာကျကြောက်တယ်၊ နောက်လှည့်ကြည့်တော့ မရှိတော့ဘူး။ နောက် အဲ့ဗိုလ်မှူးကလည်း တခါတလေကျရင် ဆေးသုံးတယ်”လို့ ပေါ်တာဆွဲခံရတဲ့ တပ်သား ဇော်လင်းဖြိုးက ပြောပါတယ်။
စစ်ကောင်စီတပ်က စစ်ကြောင်းထိုးရာလမ်းတလျှောက်မှာ တွေ့တဲ့နေအိမ်တွေကိုလည်း မီးရှို့တာတွေပြုလုပ်ကြပြီး နေအိမ်တွေ၊ ဘာသာရေးအဆောက်အအုံတွေ၊ စာသင်ကျောင်းတွေကိုလည်း လေကြောင်းကနေ ဗုံးကြဲတိုက်ခိုက်တာ၊ လက်နက်ကြီးနဲ့ ရမ်းသမ်းပစ်ခတ်တာတွေကိုလည်း ပြုလုပ်ခဲ့ပါတယ်။
စစ်ကောင်စီလက်ချက်ကြောင့် သုံးနှစ်ကျော်ကာလအတွင်း ပြည်သူ့နေအိမ်ပေါင်း ၂၇၀၀ ကျော် ပျက်စီးခဲ့ရပြီး ဘာသာရေးအဆောက်အအုံနဲ့ ဆေးရုံဆေးခန်း ၇ဝ ကျော်လည်း ပျက်စီးခဲ့ရတယ်လို့ စစ်တမ်းများအရ သိရပါတယ်။
CJ-004
#MekongNews
#မူးယစ်ဆေးသုံး
#နေအိမ်မီးရှို့
#ဗိုလ်မှူးကိုယ်တိုင်
#ပြန်လှည့်ထွက်ပြေး
#လင်ဖုံလေးရွာ
#သုံ့ပန်း၅ဦး
