မဲခေါင်၊ နိုဝင်ဘာ ၁၉
ရှမ်းပြည်မြောက်ပိုင်း၊ မူဆယ်မြို့မှာရှိတဲ့ တရုတ်-မြန်မာ နယ်စပ်ဆင်ဖြူဂိတ်ကို တရုတ်ဘက်က ဒီနေ့ (နိုဝင်ဘာလ၁၉)မနက်ပိုင်းမှာ ပြန်လည်ဖွင့်လှစ်ပေးခဲ့တယ်လို့ ဒေသခံတွေဆီက သိရပါတယ်။
အာဏာသိမ်း စစ်ခေါင်းဆောင်တရုတ်နိုင်ငံခရီးစဉ်အပြီး နိုဝင်ဘာလ ၁၁ ရက်ကစပြီး မူဆယ်မြို့နယ် ဆင်ဖြူနယ်စပ်ဂိတ်ကနေ တစ်ပိုင်တစ်နိုင် ကုန်သယ်ယူခွင့်ကို တရုတ်အစိုးရက ပိတ်လိုက်တာဖြစ်ပြီး ဒီနေ့ မနက်မှာ ပြန်လည်ဖွင့်ပေးတာဖြစ်ပါတယ်။
ဂိတ်ပြန်ဖွင့်တယ်ဆိုပေမယ့် အစားအသောက်ကို လူတစ်ယောက်တနိုင်သာ သယ်ခွင့်ရကာ တခြားကုန်တွေ သယ်ခွင့်မပေးတဲ့ အကန့်အသတ်နဲ့ ဂိတ်ဖွင့်တာဖြစ်တယ်လို့ မူဆယ်ဒေသခံတစ်ဦးက ပြောပါတယ်။
မူဆယ်မြို့ နဲ့ တရုတ်နိုင်ငံ ကျယ်ဂေါင်မြို့ရဲ့ နှစ်နိုင်ငံကုန်သွယ်ရာမှာ ဆင်ဖြူဂိတ်၊ နန်းတော်ဂိတ်နဲ့ မန့်ဝိန်းဂိတ် ၃ ဂိတ်ရှိရာမှာ ဆင်ဖြူဂိတ်က ကုန်တွေကို ဆိုင်ကယ်၊ သုံးဘီးကားတွေနဲ့ သယ်ကြပြီး၊ မန့်ဝိန်းဂိတ်ကတော့ ကုန်ကားကြီးတွေနဲ့ သယ်ကြကာ၊ နန်းတော်ဂိတ်ကတော့ သီးသန့် လူအဝင်အထွက်အတွက်ဖြစ်ကြောင်း သိရပါတယ်။
ပြီးခဲ့တဲ့နိုဝင်ဘာလ ၉ ရက်မှာရွှေလီပြည်သူ့အစိုးရက ဆင်ဖြူဂိတ်ကနေသယ်တာကို တရုတ်ဘက်က ခွင့်မပြုတော့ဘဲ မန့်ဝိန်းဂိတ်ကနေ ကုန်ကားတွေနဲ့ သယ်ခွင့်ပြုမယ်လို့ ကြေညာခဲ့ပေမယ့် ၂ ရက်အကြာ နိုဝင်ဘာလ ၁၁ ရက်မှာတော့ စစ်ကောင်စီက မန့်ဝိန်းဂိတ်ကို ပိတ်ခဲ့တာ ခုထိ ပြန်မဖွင့်သေးဘဲ ပိတ်ထားဆဲလို့ သိရပါတယ်။
“ကုန်တွေ အကုန်ပုပ်လို့ လွှင့်ပစ်ကြရတယ်၊ ကုန်စျေးနှုန်းတွေလည်း တအားတက်တယ်။ ခုက မငတ်ဖို့လောက်ပဲ ဖွင့်ပေးတဲ့သဘော၊ အောက်ဘက်လည်း းစစ်တပ်က ပိတ်ဆို့ထားတော့ လူထု တအားခက်ခဲကုန်ကြပြီ” လို့ မူဆယ်ကုန်သည်တစ်ဦးက ပြောပါတယ်။
ယင်းကဲ့သို့ တရုတ်နဲ့ စစ်ကောင်စီက ပိတ်လို့ မြန်မာဘက်ကိုတင်မယ့် ကုန်စိမ်းကား ၃၀၀ ကျော် ပျက်စီးဆုံးရှံးခဲ့တယ်လို့ ကုန်သည်တွေဆီက သိရပါတယ်။
မူဆယ်မြို့က ဂိတ်တွေကို ပိတ်ထားသလို UWSA ထိန်းချုပ်ထားတဲ့ဂိတ်တွေကနေ ပစ္စည်းတွေ သယ်ပြီး MNDAA ထိန်းချုပ်ထားတဲ့ဘက်ကို မဖြန့်ဖို့ကလည်း တရုတ်ဘက်က ဖိအားပေး ကန့်သတ်ထားပါတယ်။
ရှမ်းမြောက်က တရုတ်နယ်စပ်ဂိတ် ၁၃ ဂိတ်အနက် စစ်ကောင်စီက မူဆယ် ၃ ဂိတ်သာ ထိန်းချုပ်ထားနိုင်ပြီး ကျန်ဂိတ်တွေကို MNDAA က ၄ ဂိတ်၊ TNLA က ၁ ဂိတ်၊ UWSA က ၄ ဂိတ်နဲ့ NDAA မိုင်းလားက ၁ ဂိတ် တို့ကို ထိန်းချုပ်ထားတာ ဖြစ်ပါတယ်။
အဲ့ဒိဂိတ်တွေကို ဆက်ပိတ်ထားဖို့ စစ်ခေါင်းဆောင်က တရုတ်ခရီးစဥ်အတွင်း ပြောကြားထားကြောင်း သိရပါတယ်။
ရှမ်းမြောက်က ၁၀၂၇ စစ်ဆင်ရေးတွေအတွင်း တော်လှန်ရေးတပ်တွေ တိုက်ခိုက်သိမ်းပိုက်ထားတဲ့ လားရှိူးလို မြို့တွေကို စစ်ကောင်စီကိုပြန်ပေးဖို့ တရုတ်အစိုးရက နယ်စပ်ဂိတ်တွေပိတ်ပြီး ဖြတ်လေး ဖြတ်အနေနဲ့ ဖိအားပေးနေတာဖြစ်ကြောင်း သိရပါတယ်။
MK – 012
#MeKongNews
#မူဆယ်
#ဆင်ဖြူဂိတ်
#အကန့်အသတ်နဲ့
#ပြန်ဖွင့်
#ကုန်ပစ္စည်းသယ်ခွင့်မပြု
