မဲခေါင်၊ နိုဝင်ဘာ ၁၁
တာချီလိတ်မြို့တွင်း နိုင်ငံခြားသားဦးဆောင်တဲ့ လူပြန်ပေးဆွဲနေတဲ့ ဂိုဏ်းတစ်ဂိုဏ်းကို တာချီလိတ်ရဲတပ်ဖွဲ့က ဖမ်းဆီးရမိတယ်လို့ မဲခေါင်သတင်းဌာနက စုံစမ်း သိရပါတယ်။
ပြန်ပေးဆွဲတဲ့ဂိုဏ်းအဖွဲ့ဟာ တာချီလိတ်မြို့ ဟောင်လိတ်ရပ်ကွက်အတွင်းမှာ နေထိုင်တာဖြစ်ပြီး ဂိုဏ်းခေါင်းဆောင်ကိုတော့ ဖမ်းဆီးရမိတာမရှိပေမယ့် ပြန်ပေးဆွဲမှုမှာပါဝင်တဲ့ အမျိုးသမီး နှစ်ဦးကို ဖမ်းဆီးရမိတာလို့ သိရပါတယ်။
“ခေါင်းဆောင်ကိုတော့ မမိဘူး။ မိုင်းဖုန်းဘက်ထွက်ပြေးသွားတယ်ဆိုလို့ လိုက်ဖမ်းတာ မမိဘူးလို့ကြားတယ်။ ထိုင်းဘက်ကို ငွေလွှဲပေးတဲ့ အမျိုးသမီးနဲ့ ခေါင်ဆောင်ရဲ့မိန်းမကိုတော့ မိတယ်လို့ကြားတယ်” လို့ ရဲတပ်ဖွဲ့နဲ့ နီးစပ်သူတစ်ဦးက ပြောပါတယ်။
ပြန်းပေးဆွဲတဲ့အဖွဲ့ဟာ နိုင်ငံခြားသားဖြစ်တဲ့အတွက် ရဲတပ်ဖွဲ့ကို လစဉ်ကြေးပေးကာ မြို့တွင်းတရားမဝင်နေထိုင်နေတဲ့သူတွေဖြစ်ပြီး ဒေသခံအမျိုးသမီးနဲ့ အိမ်ထောင်ကျထားသူတစ်ဦးဖြစ်တယ်လို့ သိရပါတယ်။
တာချီလိတ်မြို့အတွင်း လူပြန်ပေးဆွဲမှုတွေဟာ လစဉ်နီးပါးဖြစ်ပေါ်နေတာဖြစ်ပြီး အောက်တိုဘာလလယ်ပိုင်းက မယ်ခေါင်ရပ်ကွက်အတွင်းမှာ သေနတ်နဲ့သတ်သွားတဲ့လူသတ်မှုတစ်ခုနဲ့ နိုဝင်ဘာလ အစပိုင်းမှာ ဆန်ဆိုင်း(က)ရပ်ကွက် ၅ လမ်းထဲမှာ သေနတ်ပစ်ခတ်မှုတစ်ခု ဖြစ်သွားခဲ့တယ်လို့ သိရပါတယ်။
