မဲခေါင်၊ နိုဝင်ဘာ-၈

ကရင်နီပြည်နယ်၊ လွိုင်ကော်မြို့မှာ ပြန်လည်နေထိုင်သူတွေထဲက အမျိုးသားတွေကို ပြည်သူ့စစ်အနေနဲ့ စစ်ကောင်စီက အောက်တိုဘာဒုတိယအပတ်ကစပြီး စုဆောင်းနေတယ်လို့ ဒေသခံနဲ့ နီးစပ်သူတွေဆီက သိရပါတယ်။

လွိုင်ကော်မြို့ပေါ်မှာ ပြန်လည်နေထိုင်ကြသူတွေက အသက်ကြီးပိုင်းတွေ၊ အမျိုးသမီးတွေ၊ အိမ်ထောင်သည်တွေလောက်ပဲ ပြန်လည်နေထိုင်တာတွေရှိပြီး အသက်အလတ်ပိုင်း လူငယ် လူရွယ်တွေကတော့ တခြားနေရာတွေမှာပဲ နေထိုင်နေကြတယ်လို့ ဆိုပါတယ်။

“လွိုင်ကော်မှာ နဂိုကတည်းက စစ်တပ်ကိုထောက်ခံသူတွေကျန်တယ်ပေါ့နော်၊ အဲ့လူတွေနဲ့ပဲ ပြည်သူ့စစ်မှုထမ်းဖွဲ့မယ်လို့ကြားတယ်၊ ခုက ၅၀ နဲ့ ၁၀၀ ကြားရှိမယ်လို့ ခန့်မှန်းရတယ်၊ ၁၁၁၁ ဖြစ်ကတည်းက သူတို့က ကျန်နေတာတွေရှိတယ်၊ ဒါပေမယ့် မသင်္ကာတဲ့သူတွေကို ဖမ်းပြီး စစ်မှုထမ်းခိုင်းတာလည်း ရှိတယ်လို့ကြားတယ်”လို့ ဒေသခံနဲ့ နီးစပ်သူတယောက်က ပြောပါတယ်။

စစ်ကောင်စီတပ်က လွိုင်ကော်မြို့ရဲ့ ရပ်ကွက်တော်တော်များများကို ပြန်လည်နေရာယူထားပြီး ရပ်ကွက်လုံခြုံရေးနဲ့ မြို့ပြင်စစ်ဆေးဂိတ်တွေမှာ ပြည်သူ့စစ်တွေကို စောင့်ကြည့်ခိုင်းတာတွေပြုလုပ်နေတယ်လို့ သိရပါတယ်။

“အခု လွိုင်ကော်မှာက ယောကျာ်းသားတွေက သိပ်မနေကြတော့ဘူး၊ လူငယ်တွေ သိပ်မရှိဘူး၊ ဒါပေမယ့် တောင်ကြီးနဲ့ လွိုင်ကော်သွားတဲ့လမ်း ဆောင်းပြောင်း ဂျာမနီလမ်းမှာတော့ ပျောက်သွားတဲ့သူတွေရှိတယ်၊ ဘယ်နှယောက်လဲ အတိအကျတော့ မသိရဘူး၊ ပေါ်တာက ပျောက်ကြားဆွဲသလိုပေါ့” လို့ ဒေသခံနဲ့ နီးစပ်သူနောက်တယောက်က ပြောပါတယ်။

ပန်ကန်း၊ ၆ မိုင်၊ ထူဒူငံသ၊ ရွာတန်းရှည်၊ ဒေါဆန်းဘွန်းစတဲ့ မြို့အပြင်နားက ရပ်ကွက်တွေမှာ နေထိုင်နေတဲ့ ပြည်သူတွေကို အသက်အရွယ်အလိုက် အသက် ၃၅ ကနေ ၅၀ အတွင်းကို တော်လှန်ရေးတပ်ဖွဲ့တွေရဲ့ လှုပ်ရှားမှုကို သတင်းပေးခိုင်းတာတွေနဲ့ အသက် ၅၀ အထက်တွေကို ကင်းစောင့်ခိုင်းထားတွေ ပြုလုပ်ခိုင်းတာရှိတယ်လို့ သိရပါတယ်။

လွိုင်ကော်မြို့အနီးတဝိုက်နဲ့ ရှမ်းပြည်နယ်အစပ်တွေမှာ စစ်ကောင်စီတပ်က အင်အားဖြည့်တင်းထားပြီး ဒေသတွင်း စစ်ကောင်စီယန္တရားလည်ပတ်အောင်လို့ တက္ကသိုလ်တွေပြန်ဖွင့်ဖို့ ပြင်ဆင်တာတွေပြုလုပ်နေတာတွေလည်း ရှိတယ်လို့ သိရပါတယ်။

CJ-004

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)