မဲခေါင်၊ စက်တင်ဘာ ၂၉
ကိုးကန့်တပ်-MNDAA ထိန်းချုပ်ထားတဲ့ လားရှိုးမြို့ကို စစ်ကောင်စီက လေယာဉ်ဖြင့် ထပ်မံဗုံးကြဲတိုက်ခိုက်ခဲ့ပါတယ်။
မနေ့ စက်တင်ဘာ ၂၈ ရက်နေ့ ည ၈ နာရီ ၃၈ မိနစ်မှာ စစ်ကောင်စီက လေကြာင်းတိုက်ခိုက်မှုပြုလုပ်ခဲ့တာကြောင့် ရက်ကွက်(၈) ရုံး အနောက်ဘက် ကားဝပ်ရှော့ နဲ့ အနီးအနားကအဆောက်အဦးတော်တော်များများနဲ့ ကားများ ထိခိုက်ပျက်စီးသွားပြီး လူထိခိုက်မှုမရှိဘူးလို့ ဒေသခံအမျိုးသားတစ်ဦးက ဆိုပါတယ်။
“လူမထိခိုက်ဘူးဗျ။ ကား ၁၂ စီးတော့ထိသွားတယ် ဝပ်ရှော့ပေါ်ကျတာဆိုတော့။ ရပ်ကွက် (၈) ရုံး အနောက်ဘက် ကားဝပ်ရှော့ကိုကျတဲ့အတွက် ကား (၁၂) တော့ထိသွားပါတယ် “ လို့ ဒေသခံတစ်ဦးက ပြောပါတယ်။
အလားတူ စစ်ကောင်စီဟာ မနေ့ စက်တင်ဘာ ၂၈ ရက် မနက် အစောပိုင်းလူအများအိပ်မောကျနေချိန် ၂ နာရီ ၃၀ မိနစ်နဲ့ ၂ နာရီ ၅၀ မိနစ်အကြားမှာ ကိုးကန့်တပ်-MNDAA ထိန်းချုပ်ထားတဲ့ သိန္နီခရိုင်၊ သံလွင်လျင်ဟိုန်ဒေသ၊နောင်မွန်မြို့နယ်ကို ဗုံးသေး ၁၀ လုံးထက်မနည်း ဗုံးကြဲတိုက်ခိုက်ခဲ့တာကြောင့် ဒေသခံအရပ်သားတစ်ဦးရဲ့ ဘယ်ဘက်ခြေဖဝါး ထိခိုက်ပြုတ်ထွက်သွားပြီး ဒေသခံနေအိမ်များထိခိုက်ပျက်စီးခဲ့တာဖြစ်ပါတယ်။
စစ်ကောင်စီ ဘက်မှ တိုင်းရင်းသားလက်နက်ကိုင်တပ်တွေနဲ့ပြည်သူ့ကာကွယ်ရေးတပ်မတော်-PDF တွေကို လက်ရှိဖြစ်ပွါးနေတဲ့နိုင်ငံရေးပြဿာနာကို နိုင်ငံရေးနည်းလမ်းအတိုင်းဖြေရှင်းဖို့ ဖိတ်ခေါ်ခဲ့တဲ့ စက်တင်ဘာ ၂၆ ရက်ညပိုင်းပြီးနောက် စက်တင်ဘာ ၂၇ ရက်မနက်အစောပိုင်း၊ စက်တင်ဘာ ၂၈ ရက်မနက်အစောပိုင်းနဲ့ ညပိုင်း ၈ နာရီခွဲဝန်းကျင် မှာ ကိုးကန့်တပ်-MNDAA ထိန်းချုပ်ထားတဲ့ လားရှိုးမြို့ နဲ့ သိန္နီခရိုင်ကို လေကြောင်းဖြင့် နှစ်ရက်ဆက်တိုက်ဗုံးကြဲ တိုက်ခိုက်ခဲ့တာဖြစ်ပါတယ်။
ကိုးကန့်တပ်-MNDAA ထိန်းချုပ်ထားတဲ့ လာရှိုးမြို့မှာ မြို့သိမ်းတိုက်ပွဲ တစ်လနီးပါးကြာပြီးနောက် စစ်ကောင်စီဟာ လေယာဉ်နဲ့ဆက်တိုက် ဗုံးကြဲတိုက်ခိုက်နေတာဖြစ်ပြီး ဩဂုတ်လ ၃၀ရက်နေ့မှာ တစ်ကြိမ်၊ စက်တင်ဘာ ၉ ရက်နေ့မှာတစ်ကြိမ်၊ စက်တင်ဘာ ၁၀ ရက်နေ့မှာတစ်ကြိမ်၊ စက်တင်ဘာ ၂၁ ရက်နေ့မှာတစ်ကြိမ်၊ စက်တင်ဘာ ၂၄ ရက်နေ့မှာ တစ်ကြိမ်၊ စက်တင်ဘာ ၂၅ ရက်နေ့မှာတစ်ကြိမ်နဲ့ စက်တင်ဘာ ၂၇ ရက်နေ့မှာ တစ်ကြိမ်၊ စက်တင်ဘာ ၂၈ ရက်နေ့မှာတစ်ကြိမ် စုစုပေါင်း (၈)ကြိမ် ဗုံးကြဲတိုက်ခိုက်ခဲ့ပါတယ်။
MK-016
