မဲခေါင်၊ စက်တင်ဘာ ၂၉
စစ်ကောင်စီတပ်ရဲ့ ဒီမိုကရေစီအင်အားစုကြား သွေးခွဲဖို့ရည်ရွယ်ပြီး ကမ်းလှမ်းလာတဲ့ အတုအယောင်ငြိမ်းချမ်းရေး ကမ်းလှမ်းချက်ကို လက်မခံဘူးလို့ ကရင်နီကြားကာလအုပ်ချုပ်ရေးကောင်စီ IEC က စက်တင်ဘာလ ၂၈ ရက်နေ့က ထုတ်ပြန်ပါတယ်။
စစ်ကောင်စီတပ်က ပြည်သူလူထုဆီက အာဏာကို မတရားရယူပြီး စစ်ရာဇဝတ်မှုနဲ့ လူ့အခွင့်အရေး ချိုးဖောက်မှုလုပ်ရပ်တွေဖြစ်တဲ့ စစ်ဘေးရှောင်စခန်းတွေ၊ စာသင်ကျောင်းတွေ၊ ဆေးရုံတွေ၊ဘာသာရေးအဆောက်အအုံတွေအပေါ် ပစ်မှတ်ထားပြီး လက်နက်ကြီးနဲ့ပစ်ခတ်တာတွေ၊ လေကြောင်းကနေ ဗုံးကြဲတိုက်ခိုက်တာတွေကို အဆက်မပြတ်ပြုလုပ်ခဲ့တဲ့အတွက် ကလေးငယ်တွေအပါအဝင် ပြည်သူလူထု အများအပြား သေဆုံးခဲ့ရတယ်လို့ ဆိုပါတယ်။
“စစ်ကောင်စီလုပ်တာက တော်လှန်ရေး အင်အားစုတွေကို အကွဲအပြဲဖြစ်စေတဲ့ ဆန္ဒလို့မြင်တယ်။ သူတို့က ရမ်းလုပ်တယ်ဆိုတဲ့ အဆင့်လောက်ပဲရှိတယ်။ တကယ့်ကို နိုင်ငံရေးဖြစ်စဥ်ကို နားလည်ပြီးလုပ်တဲ့ဟာမျိုးမဟုတ်ဘူး။ နောက်တချက်က သူတို့ ရွေးကောက်ပွဲ လုပ်သည်ဖြစ်စေ မလုပ်သည်ဖြစ်စေ သူတို့ကခေါ်တယ်၊ ဒီဟာကို ငြိမ်းချမ်းရေးမလိုလားဘူး၊ ပြည်သူလူထုငြိမ်းချမ်းသာယာမှုကိုမလိုချင်လို့ ဒီနိုင်ငံက ဒီလိုဖြစ်နေတယ်ဆိုပြီး တဖက်လှည့် အပြစ်ပုံချတာလည်းပါတယ်။ သူတို့မှာ စနစ်ကျတဲ့ စဥ်းစားချက်တွေမရှိဘူး။အနိုင်လိုချင်စိတ်နဲ့ ဖျက်စီးလိုတဲ့ စိတ်ပဲရှိတယ်ဆိုတာကို တွေ့ရတယ်။ အယ့်အတွက် ကျွန်တော်တို့အနေနဲ့ ဘယ်လိုမှ လက်ခံနိုင်တဲ့အရာမဟုတ်ဘူးလို့ ပြောလိုပါတယ်။”လို့ IEC ရဲ့ အတွင်းရေးမှူး ဦးဗညားကပြောပါတယ်။
လူမဆန်တဲ့လုပ်ရပ်တွေကို ကျူးလွန်တဲ့ စစ်ကောင်စီတပ်ကို လူထုပေါင်းစုံက ဝိုင်းဝန်းဆန့်ကျင်တဲ့အတွက် စစ်ကောင်စီတပ်ရဲ့ အုပ်ချုပ်ရေး ယန္တရားလည်း ပျက်စီးနေပြီး အာဏာတည်မြဲမှုမရှိတော့တဲ့အခြေနေမှာ အတင်းအဓမ္မစစ်မှုထမ်းခိုင်းတာ၊ သန်းခေါင်စာရင်းကောက်ခံတာ၊ နိုင်ငံရေးထွက်ပေါက်အနေနဲ့ ရွေးကောက်ပွဲ ပြုလုပ်ဖို့ကြိုးစားတာ၊အတုအယောင် ငြိမ်းချမ်းရေးကမ်းလှမ်းမှုတွေ ပြုလုပ်လာတယ်လို့ သိရပါတယ်။
စစ်ကောင်စီတပ်ရဲ့ ကမ်းလှမ်းချက်က ခုလက်ရှိနိုင်ငံရေးအကြပ်အတည်းအတွက် အဖြေမဟုတ်ဘဲ နိုင်ငံရေးအမြတ်ထုတ်မှု တခုဖြစ်ပြီး ဖိတ်ခေါ်ချက်အပေါ်မှာလည်း လက်ခံညှိနှိုင်းခြင်းလုပ်မှာ မဟုတ်ဘဲ စစ်မှန်တဲ့ ဖက်ဒရယ်ဒီမိုကရေစီပေါ်ပေါက်ရေးအတွက် ကြိုးစားကာ စစ်ကောင်စီတပ်ရဲ့ လုပ်ရပ်တွေကို တားမြစ်သွားမယ်လို့ ဆိုပါတယ်။
စက်တင်ဘာလ ၂၆ ရက်နေ့ ညပိုင်းက PDF တွေနဲ့ တိုင်းရင်းသားလက်နက်ကိုင်တွေအနေနဲ့ နိုင်ငံရေးပြသနာကို န်ိုင်ငံရေးနည်းနဲ့ဖြေရှင်းဖို့ စစ်ကောင်စီတပ်ဖက်က ထုတ်ပြန်ခဲ့ပြီး လက်နက်ကိုင် လမ်းစဥ်အစား ရွေးကောက်ပွဲလမ်းစဥ်၊ ပါတီနိုင်ငံရေးလမ်းစဥ်တွေနဲ့ အဖြေရှာဖို့ စစ်ကောင်စီတပ်ရဲ့ ပြောရေးဆိုခွင့်ရှိသူ ဇော်မင်းထွန်းက ပြောပါတယ်။
CJ-004
