မဲခေါင်၊ စက်တင်ဘာ ၂၀
UWSA “ဝ”အမျိုးသားသွေးစည်းညီညွှတ်ရေးတပ်မတော် အုပ်ချုပ်လျက်ရှိတဲ့ ဟိုပန်ခရိုင်၊ ဟိုပန်မြို့မှာ ခရိုင်းအတွင်းရှိ ဝန်ဆောင်မှုလုပ်ငန်းလုပ်သူအားလုံး ကျန်းမာရေးစစ်ဆေးခြင်းပြုလုပ်၍ ကျန်းမာရေးခွင့်ပြုချက် လက်မှတ်များပြုလုပ်ရန် ဟိုပန်ခရိုင်ကျန်းမာရေးဌာနက စက်တင်ဘာ ၁၈ ရက်နေ့မှာ ထုတ်ပြန်ထားပါတယ်။
ဒါပေမယ့် ကျန်းမာရေးခွင့်ပြုချက်လက်မှတ်တွေရဖို့ ကုန်ကျစရိတ်များတာကြောင့် ဟိုပန်မြို့ရှိ ပြည်သူလူထုများ အခက်တွေ့နေတယ်လို့ ဒေသခံတွေက ပြောပါတယ်။
ကျန်းမာရေးခွင့်ပြုချက်တစ်ခုကို ယွမ် ၂၄၀ လက်ရှိမြန်မာငွေပေါက်ဈေး (၁၆၃,၂၀၀)ကျပ် ကျသင့်မှာဖြစ်ပြီး ကျန်းမာရေး လက်မှတ်ကတော့ တစ်ဦးကို ယွမ် ၁၄၀ (၉၅,၂၀၀)ကျပ် (လိုင်စင်ဓာတ်ပုံ ရိုက်ကူးခ အပါအဝင်) ကျသင့်ကြောင်း ဟိုပန်ခရိုင်ကျန်းမာရေးဌာနက သတ်မှတ်ထားပါတယ်။
” အစ်မတစ်ယောက်ကခေါက်ဆွဲဆိုင်ဖွင့်ထားတာ သူ့ဆိုင်မှာဆိုရင် တစ်နေကုန်ရောင်းမှ (မြန်မာငွေ)ငါးသောင်းမရတဲ့အချိန်တွေရှိတယ်သုံးသောင်း၊ လေးသောင်းလောက်ပဲရတာ အဲ့တာကိုသူတို့က စာလာပေးတာ အဲ့တာကိုတစ်ယောက်ကို တရုတ်ငွေနဲ့ အဲ့လောက်ကအရမ်းများတယ် တစ်ရက်ကိုမှ သုံးလေးသောင်းပဲရတဲ့ဟာကို ပြီးတော့ဒါ(ကျန်းမာရေးခွင့်ပြုချက်လက်မှတ်)ကတခါပဲလုပ်ရတာမဟုတ်ဘူး သုံးလတစ်ခါလုပ်ရမယ်တဲ့နေကိုမနေချင်တော့တာ” လို့ ပိုပန်မြို့ခံ အမျိုးသမီးတစ်ဦးက ပြောပါတယ်။
ဒါ့အပြင် ဟိုပန်မြို့တွင်းရှိ လုပ်ငန်းရှင်တချို့များလည်း ၎င်းတို့ ကိုယ်ပိုင်လုပ်ငန်းများဖြစ်တဲ့ ဟိုတယ်များ၊ KTVများနဲ့ စားသောက်ဆိုင်တချို့များကို ပြန်ထုတ်ရောင်းနေတာရှိတယ်လို့ဒေသခံတွေကပြောပါတယ်။
“အခုဟာက(ကျန်းမာရေးခွင့်ပြုချက်လက်မှတ်) တစ်ခုပဲမဟုတ်ဘူး။ ကျန်တဲ့အခွန်တွေလည်း အရမ်းအများကြီးကောက်တာ အဲ့ကြောင့် အခုဆိုရင် စီးပွားရေးသမားတွေဆို သူတို့ရဲ့လုပ်ငန်းဖြစ်တဲ့ ဟိုတယ်တွေ ဆိုင်ခန်းတွေပြန်ထုတ်ရောင်းတာတွေရှိတယ်ပိတ်ထားတွေလည်းရှိတယ်” လို့ ဒေသခံအမျိုးသမီးတစ်ဦးက ပြောပါတယ်။
ထိုပြန်ချက်မှာ ဟိုပန်ခရိုင် အတွင်းရှိ ဖျော်ဖြေရေးလုပ်ငန်း၊ အနှိပ်ခန်း၊ ဟိုတယ်လုပ်ငန်း၊ အသေးစား စားသောက်ဆိုင်၊ ကုန်စုံဆိုင်၊ ဆံပင်ညှပ်ဆိုင်၊ အလှပြင်ဆိုင်၊ တက်တူးဆိုင်များ စတဲ့ဝန်ဆောင်မှုလုပ်ငန်းများလုပ်ဆောင်ကြတဲ့ လုပ်ငန်းရှင်များနဲ့ ဝန်ထမ်းများအားလုံး HBV, HAV, TB, TP, HIV ရောဂါ ပိုးစစ်ဆေးရန် ဟိုပန်ခရိုင်ကျန်းမာရေးဌာနက ထုတ်ပြန်ထားပါတယ်။
သတ်မှတ်ထားတဲ့အချိန်ကာလအတွင်း လက်မှတ်များကို လျှောက်ထားရမှာဖြစ်ပြီး ခွင့်ပြုချက်မရှိဘဲ လုပ်ငန်းဆောင်ရွက်နေသူများကို တွေ့ရှိပါက “ဝ”ပြည်နယ်၊ ကျန်းမာရေး စီမံခန့်ခွဲမှု စည်းမျဉ်းအတိုင်း အရေးယူသွားမှာဖြစ်ကြောင်းနဲ့ ကျန်းမာရေးလက်မှတ် မရှိဘဲ လုပ်ငန်းဆောင်ရွက်သူကို ဒဏ်ငွေ ယွမ် ၁ ထောင်၊ ကျန်းမာရေးခွင့်ပြချက် လက်မှတ်မရှိဘဲ မိမိ သဘောအရ ဖွင့်လှစ်သူကို ဒဏ်ငွေ ယွမ် ၂ ထောင်စီ အသီးသီးချမှတ်သွားမှာဖြစ်ကြောင်း ထုတ်ပြန်ချက်မှာ ရေးသားဖော်ပြထားပါတယ်။
MK-016
