မဲခေါင်၊ စက်တင်ဘာ ၁၉
ရှမ်းပြည်တောင်ပိုင်း၊ ဖယ်ခုံမြို့နယ်၊ မိုးဗြဲမြို့အနီး၊ ဝါရီဆူးပလိုင်ကျေးရွာမှာ ရေဘေးသင့် စစ်ဘေးရှောင်စခန်းတွေအတွက် အကူအညီလိုအပ်နေတယ်လို့ တာဝန်ရှိသူတွေက ပြောပါတယ်။
ဝါရီဆူးပလိုင်ကျေးရွာက နောင်ခိုင် စစ်ဘေးရှောင်စခန်းဟာ အပေါ်ထပ် အလုံးစုံ ရေနစ်မြုပ်နေပြီး စားနပ်ရိက္ခာတွေ ပျက်စီးဆုံးရှုံးကုန်တဲ့အတွက် အရေးပေါ် အကူအညီ လိုအပ်နေတာပါ။
“ဖျားနေတာတွေလည်း ရှိတယ်။ နီးနီးနားနား ရေမမြုပ်တဲ့ နေရာကိုပဲ အရင်ပြောင်းထားတယ်။ ဝေးဝေးလည်း သွားလို့ မရဘူး။ လမ်းတွေက ရေကျော်နေပြီ။ ကလေးတွေလည်း ဗိုက်ဆာနေကြတယ်” လို့ ကယ်ဆယ်ရေး ဆောင်ရွက်ပေးနေသူ တစ်ဦးက ပြောပါတယ်။
နောင်ခိုင် စစ်ဘေးရှောင်စခန်းကို လာရောက်လှူဒါန်းတွေ ရှိကြပေမယ့် လူဦးရေ များလွန်းတာကြောင့် စားနပ်ရိက္ခာပိုင်း မလုံမလောက် ဖြစ်နေပြီး စခန်းပြန်လည်တည်ဆောက်ဖို့ ဝါးလုံးနဲ့ မိုးကာတွေလည်း လိုအပ်နေတယ်လို့ သိရပါတယ်။
လက်ရှိ ဒီးမော့ဆိုမြို့နယ်၊ ချယ်ရီကုန်းမှာ မိုးကာ ၁၈ ပေ ပတ်လည်ကို ၉ သောင်းခွဲကျပ်၊ ၂၁ ပေပတ်လည်ကို ၁၃၅,၀၀၀ ကျပ်၊ ၂၄ ပေပတ်လည်ကို ၁၆၅,၀၀၀ ကျပ် စတဲ့နှုန်းထားတွေနဲ့ ရောင်းချပေးနေပြီး ဝါးလုံးလည်း ဈေးသက်သာတာကြောင့် ဝယ်လှူပေးစေချင်တယ်လို့ ဆိုကြပါတယ်။
“စစ်ကောင်စီ ရှိတဲ့နေရာတွေတော့ လှူကြတဲ့လူ များတယ်။ သူတို့က ပေါ်တင်အလှူခံလို့ ရတယ်လေ။ ဒီမှာက အလှူခံရင်လည်း ကြောက်လို့ မလှူကြဘူး” လို့ ရေဘေးသင့် စစ်ဘေးရှောင် တစ်ဦးက ပြောပါတယ်။
နောင်ခိုင်စစ်ဘေးရှောင်စခန်းမှာ အိမ်ခြေ ၂၀၀ ကျော်နဲ့ လူဦးရေ တစ်ထောင်နီးပါး နေထိုင်ကြပြီး ကလေးသူငယ်၊ သက်ကြီးရွယ်အိုနဲ့ ကိုယ်ဝန်ဆောင်တွေလည်း ပါဝင်တာကြောင့် တခြားရေကြီးတဲ့ နေရာတွေထက် အကူအညီ ပိုလိုအပ်တယ်လို့ သူက ဆက်ရှင်းပြပါတယ်။
စက်တင်ဘာလ ၁၆ ရက်နေ့ကစပြီး မိုးဗြဲရေကာတာကို စစ်ကောင်စီတပ်တွေက ဖောက်ချလိုက်တာကြောင့် ဖယ်ခုံ၊ ဒီးမော့ဆိုနဲ့ လွိုင်ကော်မြို့နယ်တို့မှာ ရေကြီးရေလျှံ ဖြစ်နေပြီး လူပေါင်း ၃ သောင်းကျော် တိမ်းရှောင်နေရသလို လယ်ဧက ၄ ထောင်ကျော်လည်း ရေမြုပ်ပျက်စီးခဲ့ပြီလို့ သိရပါတယ်။
လက်ရှိ ညောင်ရွှေမြို့နယ်၊ အင်းလေးဒေသမှာလည်း ရေကြီးရေလျှံ ဖြစ်နေတာကြောင့် မိုးဗြဲရေကာတာ ဖောက်ချရတယ်လို့ ဆိုနိုင်ပေမယ့် စစ်ကောင်စီဖက်က ဒေသစာရီကြွချီ အပူဇော်ခံပွဲကို ကျင်းပဖို့အတွက် အလျင်စလို ဖောက်ချနေတာပဲ ဖြစ်ပါတယ်။
MK-014
