မဲခေါင်၊ သြဂုတ် ၁၂
ရှမ်းပြည်မြောက်ပိုင်း၊ သီပေါမြို့က TNLA၊ PDF တပ်ပေါင်းစုနဲ့ စစ်ကောင်စီတပ်တွေကြား တိုက်ပွဲတွေ အတွင်း အရပ်သားပြည်သူ သေဆုံး ၉ ဦးနဲ့ ဒဏ်ရာရသူ ၁၀ ဦးထိ ရှိလာနေပြီလို့ သိရပါတယ်။
တိုက်ပွဲစတင်ဖြစ်ပွားတဲ့ သြဂုတ်လ ၉ ရက်နေ့ကစပြီး ယနေ့ သြဂုတ်လ ၁၂ ရက်နေ့အထိ သီပေါ နယ်စည်းမခြားနဲ့ မြတ်မွန်စေတနာ ပရဟိတလူမှုကူညီမှုအသင်းတွေဆီက ရရှိတဲ့ စာရင်းအရ သေဆုံး ၉ ဦးနဲ့ ဒဏ်ရာရ ၁၀ ဦးရှိပြီလို့ သိရပါတယ်။
သေဆုံး စာရင်းမှာ သြဂုတ်လ ၉ ရက်မှာ ကုန်းဆုံရွာ က အမျိုးသမီး ၁ ဦး၊ ၁၀ ရက်နေ့မှာ မြို့ဟောင်းက ကျား ၁ ဦး၊ တုံစင့်က ကျား ၁ ဦး နားလွယ်က ကျား ၁ ဦး၊ ကျောင်စုက ကျား ၁ ဦး၊ ၁၁ ရက်နေ့မှာ အုတ်ကျင်းက ကျား ၁ဦး၊ တာပုတ်က ကျား၁ ဦး၊ ယနေ့ သြဂုတ်လ ၁၂ ရက်မှာတော့မြို့လယ်ရပ်က မ ၂ ဦး စုစုပေါင်း ၉ ဦး( ကျား ၆ ဦး ၊မ ၃ ဦး ) ဖြစ်တယ်လို့ သိရပါတယ်။
ဒဏ်ရာရသူစာရင်းကတော့ သြဂုတ်လ ၉ ရက်မှာ ကုန်းစုံရွာက ကျား(ကလေး) ၁ဦး၊ ၊ ၁၀ ရက်နေ့မှာ မြို့ဟောင်းက ကျား ၂ ဦး၊ မ ၂ ဦး၊ ၁၁ ရက်နေ့မှာ တာပုတ်က အဖိုး ၁ ဦး၊ အဖွား ၁ ဦး၊ မြို့လယ်ရွှေစေတီက ရဟန်း ၁ ပါး၊ သီလရှင် ၁ပါးနဲ့ မ ၁ဦး၊ ယနေ့ သြဂုတ်လ ၁၂ ရက်နေ့မှာတော့ ဒဏ်ရာသူ မရှိလို့ စုစုပေါင်း ၁၀ ဦး (ကျား ၅ ဦး မ ၅ ဦး) တို့ဖြစ်တယ်လို့သိရပါတယ်။
“သေဆုံးဒဏ်ရာရသူတွေကတော့ ပရဟိတအဖွဲ့တွေလည်း သဂြိုလ်ဖို့၊ ဆေးရုံဆေးခန်းပို့၊ စစ်ရှောင်တွေပို့နဲ့ မအားကြဘူးဖြစ်နေတာ၊ ဒဏ်ရာရသူတွေကို CDM ဆရာဝန် တစ်ယောက်နဲ့ အငြိမ်းစားစစ်ဆရာဝန််တစ်ယောက်က ကုပေးနေတာ၊ မြို့လူထုကတော့ မနေ့ကစပြီးစစ်ရှောင်ကြတာ များပါပြီ” လို့ သီပေါ ဒေသခံတစ်ဦးက မဲခေါင်ရဲ့ ဆက်သွယ်မေးမြန်းမှုကို ဖြေကြားပါတယ်။
သီပေါမြို့က တစ်ခြားမြို့တွေထက် သေဆုံး၊ ဒဏ်ရာရ နည်းတယ်ဆိုပေမယ့် ကလေးနဲ့သက်ကြီးရွယ်အိုတွေ ထိတာ ရာခိုင်နှုန်းများနေလို့ အဖိုး၊ အဖွားတွေ အိမ်စောင့်ထားခဲ့သလား၊ လူကြီးသူမတွေကိုယ်တိုင်က အိမ်စောင့်ထားခဲ့သလား ၊ ပြောမရ ဆိုမရလို့ နေခဲ့သလား မသိရပေမယ့် သီပေါမြို့ကို ပြန်ကြိုသူတွေ အပါခေါ်ခဲ့ဖို့ မေတ္တာရပ်ခံလိုတယ်လို့ သူကပြောပါတယ်။
အခြားမြေပြင်သတင်းတွေအရတော့ ယနေ့နေ့လည် ၁၂း၁၅ နာရီမှာ မြို့လယ်ရပ်၊ မင်္ဂလာလမ်း Hotel Hsipaw အနီး အိမ် ၁ အိမ်ထိလို့ လူသေဆုံးပြီး နေ့လယ် ၁၁း၃၀ အချိန်မှာတော့ မြို့လယ်ရပ် ပြောင်းပွဲရုံနားက ငှားနေတဲ့ အိမ်မှာ မိသားစု ၃ ဦးလုံး သေဆုံးသွားတာရှိခဲ့လို့ ပရဟိတအသင်းတွေကို အကူအညီတောင်းထားတယ်လို့ သိရပါတယ်။
ယနေ့ ညနေ ၃ နာရီအချိန်အထိ တိုက်ပွဲသံတွေကြားနေရဆဲလို့ သိရပြီး လက်နက်ကြီးပစ်တာ၊ လေယာဉ်နဲ့ဗုံးကြဲတာတွေ ကိုတော့ မဲခေါင်အနေနဲ့ ဆက်လက် ဆက်သွယ်စုံစမ်းဆဲဖြစ်ပါတယ်။
MNDAA နဲ့ ပူးပေါင်းတပ်တွေဟာ သီပေါ ခလရ-၂၃ နဲ့ ခမရ-၅၀၃၊ ၅၀၄ နေရာကို တိုက်ခိုက်နေဆဲဖြစ်ပြီး ထပ်တိုးအင်အားတွေနဲ့ သီပေါမြို့ကို အပြီးသိမ်းနိုင်အောင် ကြိုးစားနေတယ် ကြားရတယ်လို့ ဒေသခံတွေ ဆီက သိရပါတယ်။
ပုံ-ပုံဟောင်း
MK-012
