မဲခေါင်၊ ဩဂုတ် ၁
လွိုင်ကော်မြို့ကို စစ်ကောင်စီက ထပ်မံထိုးစစ်ဆင်ဖို့အတွက် အရပ်ဘက် ကုန်တင်ကားတွေအသုံးပြုပြီး စစ်ကောင်စီတပ်သားတွေကို တောင်ကြီးမြို့ဘက်ကနေ ဖယ်ခုံကို အင်အားအလုံးအရင်းပို့ဆောင်နေတယ်လို့ ဒေသခံဆီက သိရပါတယ်။
ပြီးခဲ့တဲ့ ဇူလိုင်လ ၃၀ ရက်နေ့က စစ်ကား ၁၂ ဘီးကုန်တင်ကား ၂၅ စီးနဲ့ မနေ့ ဇူလိုင် ၃၁ ရက်နေ့က ကုန်တင်ကား ၅ စီး စုစုပေါင်း ကားအစီးရေ ၃၀ ထဲက ဖယ်ခုံမြို့ဘက်ကို တက်လာတာပါ။
တောင်ကြီးဘက်က စစ်ကောင်စီတပ်သားတွေတင်လာတဲ့ အရပ်ဘက်ကုန်တင်ကား အချို့ ဖယ်ခုံကို ရောက်ရှိနေပြီး အဲဒီကနေတစ်ဆင့် လွိုင်ကောက်ကိုတက်မှာ ဖြစ်သလို လွိုင်ကော်မြို့တွင်းမှာလည်း ၅ စီးထက်မနည်း ရောက်နေပြီလို့ မြေပြင်မှာရှိတဲ့ စစ်ရေးသတင်းအရင်းအမြစ် တွေဆီက သိရပါတယ်။
“သူတို့က ကုန်တင်ကားတွေနဲ့ အင်အားဖြည့်လာတာ။ အခုက နေရာတိုင်းလိုလို တိုက်ပွဲဖြစ်နေတော့ လောလောဆယ် သူတို့ လှုပ်ရှားမှုကိုပဲ စောင့်ကြည့်နေပါတယ်” လို့ မြေပြင် သတင်းအရင်းအမြစ် တစ်ဦးက ပြောပါတယ်။
အရပ်သား ကုန်တင်ကားတွေ အသုံးပြုနေတဲ့ စစ်ယာဉ်တန်းကားဟာ တောင်ကြီး – ဆိုက်ခေါင် လမ်းပိုင်းကနေတဆင့် တက်လာကြတာဖြစ်ပြီး စစ်ကောင်စီတပ်ထဲက ထုတ်နုတ်ဖို့ ခက်နေတဲ့အတွက် အများစုက ရပ်ရွာထဲက မဲပေါက်ပြီး လပိုင်းခန့် စစ်သင်တန်းတက်ရောက်ခဲ့တဲ့ သူတွေပါဝင်တယ်လို့ သိရပါတယ်။
လက်ရှိ လွိုင်ကော်မြို့တွင်းမှာ အထိုင်ချထားတဲ့ ပအိုဝ်းပြည်သူ့စစ် (PNA)တပ်တွေကိုတော့ ထုတ်နုတ်ပြီး ညောင်ရွှေမြို့နယ်၊ အင်းလေးဒေသ အနောက်ခြမ်းနဲ့ အရှေ့ခြမ်းတွေက နန်းပန်၊ မှော်ဘီ၊ သစ်ပင်ကောက်၊ အင်းတိန် စတဲ့ ကျေးရွာတွေက စစ်ဆေးရေးဂိတ်အသီးသီးကို ပို့ဆောင်ထားပါတယ်။
လက်ရှိ လွိုင်ကော်မြို့ အနောက်ဘက်ခြမ်းက မိုင်းလုံး၊ ဒေါဥခူ၊ ထူဒူငံသ၊ GTC တက္ကသိုလ်နဲ့ မြကလပ်တောင်တို့မှာ နေ့တိုင်းနီးပါး တိုက်ပွဲဖြစ်ပွားတာကြောင့် ထိုးစစ်ဆင်ဖို့အတွက် စစ်ကောင်စီက လိုအပ်တဲ့ စစ်ကူနဲ့ ရိက္ခာပို့တာလို့ သိရပါတယ်။
စစ်ရှုံးနေတဲ့ စစ်ကောင်စီတပ်ဟာ နယ်မြေတွေ ပြန်တိုက်ယူဖို့အတွက် ရခိုင်ပြည်၊ ကချင်ပြည်၊ ရှမ်းပြည်မြောက်ပိုင်း ဒေသတွေကိုလည်း စစ်မှုထမ်း ခေါ်ယူထားတဲ့ လူငယ်တွေနဲ့ တိုက်ရည်ခိုက်ရည်ရှိတဲ့ တပ်မတွေကို တွဲပြီး အဆက်မပြတ် စစ်ကူပို့ဆောင်နေတယ်လို့ စုံစမ်း သိရပါတယ်။
MK-014
ဓာတ်ပုံ – ပုံဟောင်းဖြစ်ပါတယ်။
