မဲခေါင်၊ ဇူလိုင် ၂၇
ကရင်နီပြည်အခြေစိုက် ဝရဇိန်တပ်ဖွဲ့က ဂျမ်မာတွေကို ကျော်လွန်ပြီး ပျံသန်းနိုင်တဲ့ ဒရုန်းကို အောင်မြင်စွာ တီထွင်ထုတ်လုပ်နိုင်ခဲ့ပြီလို့ တာဝန်ရှိသူတွေက ပြောပါတယ်။
တီထွင်ထားတဲ့ ဒရုန်းတွေကို စစ်ကောင်စီတပ်ဆီက သိမ်းဆည်းရမိထားတဲ့ ဂျမ်မာတွေနဲ့ ထိန်းချုပ် စမ်းသပ်ပြီး ပျံသန်းခဲ့ရာမှာတော့ ရာနှုန်းပြည့် အောင်မြင်မှု ရခဲ့တယ်လို့ ဆိုပါတယ်။
“ရန်သူ့ ဂျမ်ပါတွေအပေါ်မှာ ကျော်ပြီး မီတာ ၃၀၀ နဲ့ ၅၀၀ ကြားမှာ ခပ်နိမ့်နိမ့် ပျံသန်းနိုင်တဲ့ ဒရုန်းမျိုးကို ကျနော်တို့ တည်ဆောက်နေတာပါ။ ကျနော်တို့ မော်ဒယ်လ် ထွက်ထားတာလည်း ရှိပါပြီ။ အဲ့လိုမျိုး Phase 2 နဲ့ Phase 3 ဆိုပြီး နာမည်တပ်ထားတယ်ပေါ့နော်။ Frequency Hooping ကြိမ်နှုန်းကွင်းအတွင်း အသုံးချနိုင်တဲ့အနေအထားကို ကျနော်တို့ ရောက်ခဲ့ပြီ။ 3 ရောက်ပြီ ဆိုလို့ရှိရင်တော့ အဲ့ထက်ပိုပြီးတော့ အဆင့်မြင့်ပြီးတော့ GPS ကို မှီခိုခြင်းမရှိတဲ့ navigation system အနေနဲ့ အလုပ်လုပ်လို့ရပြီဆိုတဲ့ အနေအထားမျိုး ဖြစ်ပြီပေါ့နော်” လို့ ဝရဇိန်တပ်ဖွဲ့ တာဝန်ခံ တစ်ဦးက ပြောပါတယ်။
ဒရုန်းအတွက် လိုအပ်တဲ့ ပစ္စည်းတွေကို နိုင်ငံခြားကနေမှာယူရပြီး ဒရုန်းတစ်စင်းအတွက် ကုန်ကျစရိတ်ဟာ ဒေါ်လာ ၁,၃၀၀- ၁,၅၀၀ ဝန်းကျင် ရှိတယ်လို့ သိရပါတယ်။
ဝရဇိန်တပ်ဖွဲ့မှာ အင်ဂျင်နီယာနဲ့ နိုင်ငံတကာက ဘွဲ့ရရှိထားတဲ့ IT ပညာရှင်တွေလည်း ပါဝင်တာကြောင့် နည်းပညာပိုင်း အင်အားတောင့်တင်းတဲ့အပြင် တိုက်ခိုက်ရေးတပ် အနေနဲ့လည်း စုဖွဲ့ထားတာတွေ ရှိတယ်လို့ ဆိုပါတယ်။
“ဒရုန်းတစ်စီးအတွက်ဆို လက်ရှိအနေအထားနဲ့ကို ကျန်တဲ့ဘာတွေညာတွေ မစဥ်းစားနဲ့ဦး၊ နိုင်ငံခြားက ဝယ်ရတဲ့ပစ္စည်းရှိတယ်၊ နောက် အဝေးကြီးကနေ ကျော်ပြီးတော့ ဝယ်နေရတဲ့ ပစ္စည်းရှိတယ်။ ပြည်တွင်းမှာမရနိုင်တဲ့ ပစ္စည်းတွေများပါတယ်။ အဲ့လိုမျိုးပစ္စည်းမျိုးမှပဲ ဒရုန်းအတွက်ကို သိန်း ၆၀ အထိရှိတယ်။ အဲ့မော်ဒယ်တွေလည်း အခုထွက်နေပြီ။ ဒါ ပြင်ဆင်ထားပြီးတော့ ခနနေကျရင်တော့ ကျနော်တို့ ထုတ်ပြန်မလားလို့ စဥ်းစားထားတယ်ပေါ့နော်” လို့ ဝရဇိန်တပ်ဖွဲ့ တာဝန်ခံ တစ်ဦးက ဆက်ပြောပါတယ်။
ပြီးခဲ့တဲ့ လားရှိုးနဲ့ လွိုင်ကော်တိုက်ပွဲတွေမှာ စစ်ကောင်စီတပ်ဘက်က ဂျမ်မာတွေထောင်ပြီး ဒရုန်း မပျံသန်းနိုင်အောင် လုပ်ဆောင်ခဲ့တာကြောင့် အခုလို ဂျမ်မာတွေကို ထိုးဖော်ပျံသန်းနိုင်တဲ့ ဒရုန်းတွေကို တီထွင်နေတာပဲ ဖြစ်ပါတယ်။
ဝရဇိန်တပ်ဖွဲ့ကို စစ်အာဏာရှင်စနစ် အမြစ်ပြတ်ချေမှုန်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ဖွဲ့စည်းခဲ့ပြီး လတ်တလော ကရင်နီဒေသတွင်းမှာ စစ်ရေးပြင်ဆင် လေ့ကျင့်နေပေမယ့် နောင်တစ်ချိန်မှာတော့ မြေပြန့်ဒေသကို ပြောင်းရွှေ့စစ်ရေး ဖော်ဆောင်သွားမယ်လို့ တာဝန်ရှိသူတွေဆီက သိရပါတယ်။
MK-14
