မဲခေါင်၊ ဇူလိုင် ၂၂
ရှမ်းပြည်နယ်မြောက်ပိုင်း၊ နောင်ချိုမြို့နယ်မှာ စစ်ကောင်စီရဲ့ လက်နက်ကြီး ရမ်းသန်း ပစ်ခတ်မှုကြောင့် ကံကြီးကျေးရွာနေ အမျိုးသားတစ်ဦး သေဆုံးခဲ့တယ်လို့ ဓနုပြည်သူ့လွတ်မြောက်ရေးတပ်ဦး (DPLF) က ထုတ်ပြန်လာပါတယ်။
ဇူလိုင်လ ၂၁ ရက်နေ့ မနက်ပိုင်းမှာ နောင်ချိုမြို့နယ်၊ တောင်းခမ်း (၉၀၂) အမြောက်စခန်းကွပ်ကဲမှု ဌာနချုပ်ကနေ ကံကြီးကျေးရွာကို လက်နက်ကြီးနဲ့ ၃ ကြိမ်တိတိ ပစ်ခတ်ခဲ့တာပဲ ဖြစ်ပါတယ်။
“ပွဲချင်းပြီး ဆုံးတယ်လို့တော့ ကြားတယ်။ ဘယ်လိုဖြစ်တာလဲတော့ သေချာမသိဘူး။ အခုတော့ ရွာမှာ ဘယ်သူမှ မကျန်တော့ဘူး အကုန်ပြေးပြီ” လို့ ကံကြီးကျေးရွာနေ အမျိုးသားတစ်ဦးက ပြောပါတယ်။
ပြီးခဲ့တဲ့ ရက်ပိုင်းကတည်းက စစ်ကောင်စီအနေနဲ့ နောင်ချိုမြို့ကို ပြန်လည်ရရှိဖို့အတွက် စစ်ရေးပစ်မှတ်မဟုတ်တဲ့ အရပ်သားတွေ နေထိုင်ရာနေရာဒေသတွေကို နေ့စဉ် လက်နက်ကြီးနဲ့ ပစ်ခတ်နေတယ်လို့ DPLF ရဲ့ ထုတ်ပြန်ချက်မှာ ဖော်ပြထားပါတယ်။
“နောင်ချိုထဲကို တောက်လျှောက်ထုနေတာ။ အခု အောက်ဘက်ကိုပဲ ဦးတည်ထုနေတာ။ ပြောရင်းဆိုရင်း တစ်ကြိမ်ပြန်ထုပြီ။ ဟိုးတစ်နေ့ကလည်း တစ်နေကုန် ထုတယ်” လို့ မြေပြင် အရင်းအမြစ် တစ်ဦးက ပြောပါတယ်။
ဇူလိုင်လ ၁၀ ရက်နေ့ အမှတ် ၆၀၆ ဒုန်းတပ်ရင်း(ဒတရ)ကို ရရှိပြီးတဲ့နောက်မှာ နောင်ချိုတစ်မြို့လုံးကို တအာင်းအမျိုးသား လွတ်မြောက်ရေး တပ်မတော်(TNLA)နဲ့ မဟာမိတ်တပ်တွေက ထိန်းချုပ်ထားနိုင်ပေမယ့် မြို့အနီးက (၉၀၂) အမြောက်စခန်းကွပ်ကဲမှု ဌာနချုပ်ကိုတော့ သိမ်းပိုက်နိုင်ဖို့ ဆက်လက်တိုက်ပွဲဝင်နေဆဲ ဖြစ်ပါတယ်။
MK-014
