မဲခေါင်၊ ဇူလိုင် ၁
ရှမ်းတောင်၊ ပင်လောင်း၊ ဖယ်ခုံတကြော ဆောင်းပြောင်းမှာ စစ်ကောင်စီတပ်၊ PNAနဲ့ တော်လှန်ရေးတပ်ဖွဲ့တွေ တိုက်ပွဲတွေ ပြင်းထန်ဆဲလို့ စစ်မြေပြင်သတင်းအရင်းအမြစ်တွေဆီက သိရပါတယ်။
မနေ့ မနက် ၇ နာရီကနေ ဖြစ်ပွားနေတဲ့တိုက်ပွဲဟာ ယနေ့ ညနေ ၃ နာရီအထိ ပြင်းထန်နေဆဲဖြစ်ပြီး ဒေသခံလူထု ၃၀၀ ကျော်ကို လူသားဒိုင်းအနေနဲ့ ချုပ်ကိုင်ထားတဲ့ စစ်ကောင်စီဟာ လက်ရှိမှာ အထိနာနေလို့လေယာဉ်နဲ့ပါ ဗုံးကြဲလာနေတယ်လို့ သိရပါတယ်။
“အခုထိတိုက်ပွဲဖြစ်နေသေးလို့ အသေအချာတော့ မသိရသေးပါဘူး၊ လေယာဉ်ကတော့ သူတို့ အထိနာလို့ ကြဲတာဖြစ်နိုင်တယ်၊ သေချာသိရမှ ထုတ်ပြန်တာမျိုးလုပ်နိုင်မှာပါ”လို့ တော်လှန်ရေးသတင်းအရင်းအမြစ် တစ်ဦးက မဲခေါင်သတင်းဌာနရဲ့ ဆက်သွယ်မေးမြန်းမှုကို ဖြေကြားပါတယ်။
ယမန်နေ့ ဇွန်လ ၃၀ ရက်က လေယာဉ်နဲ့ ၂ ကြိမ် ဗုံးလာကြဲချသလို ယနေ့ နေ့လယ် ၁ နာရီမှာလည်း ဗုံး ၂ လုံးလာကြဲခဲ့တယ်လို့သိရပြီး အထိအခိုက်ရှိမရှိ သေချာမသိရသေးဘူးလို့ပြောပါတယ်။
စစ်ကောင်စီက လမ်းပိတ်ထားပြီး ယနေ့မနက်ပိုင်းမှာ ဆောင်းပြောင်းကို ဒေသခံတွေ ပစ္စည်းပြန်ယူတာ နေ့ခင်း ၁၂ နာရီ နောက်ဆုံးဝင်ခွင့်ပေးခဲ့တယ်လို့ သိရပါတယ်။
မနေ့က ဒဏ်ရာရသူတွေနဲ့ ဘုန်းကြီးကျောင်းထဲ ပိတ်မိထားတဲ့ ဒေသခံတွေ လွတ်တဲ့အခြေအနေကို ခုချိန်ထိ အတည်ပြုလို့ မရသေးလို့ ဒေသခံတွေ အားလုံး စိတ်ပူနေကြတယ်လို့ သိရပါတယ်။
“ဒဏ်ရာရသူတွေကို ဆေးရုံတွေပေးလွှတ်သင့်တယ်၊ အားလုံးကို စစ်မြပြင်ကြား ခုလို လူသားဒိုင်းလုပ်ထားတာ လူမဆန်ဘူး၊ လူ့အသိစိတ်ကို မရှိကြတော့ဘူး၊ လေယာဉ်ဗုံးကတော့ အထိအခိုက်မကြားဘူး”လို့ ပင်လောင်းက လူမှုကူညီနေသူ ၁ ဦးက မဲခေါင်သတင်းဌာနကို ပြောပါတယ်။
ဖယ်ခုံအနောက်ဘက်ခြမ်း ဘန်ကောက်စစ်ဘေးရှောင်စခန်းနား ကို ဗုံးတွေ ကျရောက်ခဲ့တာ ဖုန်လုံးတွေ မြင်တွေ့ရပေမယ့် အထိအခိုက်မရှိဘူးလို့ ပြောပါတယ်။
ပင်လောင်း၊ ဖယ်ခုံတကြော တိုက်ပွဲတွေဖြစ်ပွားလာတာ ၁၁ ရက်ရှိနေပြီဖြစ်ပြီး စစ်ကောင်စီက အင်အားဖြည့်ဖို့ အတွက် ရွှေညောင်မြို့စစ်တပ်စစ်ကြောရေးနဲ့တည်းခိုရေးစခန်းမှာ သင်တန်းဆင်း တပ်သားသစ် တစ်ထောင်ခန့်ရောက်နေတယ်လို့သိရပြီး ဟိုပုံး၊ ရပ်စောက်ဘက်မှာ တပ်သားသစ်တွေကို စုရပ်ထားပြီး တိုက်ပွဲပြင်းထန်တဲ့နေရာတွေကို အင်အားဖြည့်တင်းနေတယ်လို့ သိရပါတယ်။
MK-012
