မဲခေါင်၊ ဇွန် ၃၀
၁၀၂၇ စစ်ဆင်ရေး အပိုင်း(၂) ကာလ ၅ ရက်အတွင်း စစ်ကောင်စီဘက်မှ လက်နက်ချသူ ၅၃ ဦးနဲ့ လက်နက်ခဲယမ်းအများအပြား သိမ်းဆည်းရမိသလို ပြည်သူ ၂၀ ကျော် သေဆုံးခဲ့တယ်လို့ သိရပါတယ်။
ဇွန်လ ၂၅ ရက်က စခဲ့တဲ့ TNLA၊ PDF တွေနဲ့ စစ်ကောင်စီတပ်တွေ တိုက်ပွဲမှာ ဇွန် ၂၉ ရက်နေ့အထိ ၅ ရက်တာအတွင်း စစ်တပ်ဘက်က ဗိုလ်မှူးကနေ တပ်သားအဆင့် အထိ ၅၃ ဦး လက်နက်ချ အလင်းဝင်ခဲ့လို့ PSLF/TNLA သတင်းစဉ်က ဖော်ပြလာပါတယ်။
ရှမ်းမြောက် နောင်ချိ၊ ကျောက်မဲ၊ သီပေါ၊ မိုးမိတ်နဲ့ မန္တလေးတိုင်း မိုးကုတ် မြို့နယ်တွေက တိုက်ပွဲတွေမှာ ဗိုလ်မှူး ၁ ဦး၊ ဗိုလ်ကြီး ၄ ဦး၊ တကက ၆ ဦး၊ ရဲတပ်ကြပ်(ယာဉ်ထိန်း) ၁ ဦး၊ တပ်ကြပ် ၁၁ ဦး၊ ဒုတက ၉ ဦးနဲ့ တပ်သား ၁၉ ဦး စုစုပေါင်း ၅၃ ဦး လက်နက်ချခဲ့တာလို့ သိရပါတယ်။
နောင်ချိုက ခမရ-၁၁၄ ကို သိမ်းပိုက်ရာမှာ လက်နက်မျိုးစုံ ၆၄ လက်နဲ့ ဂျမ်မာ ၂ ခု၊ ဗုံး၊ မိုင်းနဲ့စကားပြောစက်တွေ သိမ်းဆည်းရမိတယ်လို့ ဆိုပါတယ်။ နောင်ချို ရှုခင်းသာ က ခလရ-၁၄၆ တပ်စခန်းကို မနေ့က မနက် ၇ နာရီအချိန်မှာ သိမ်းပိုက်နိုင်ခဲ့တယ်လို့လည်း ပြောပါတယ်။
မိုးကုတ်က စစ်ကောင်စီတပ်စခန်း အောင်သာယာနဲ့ အာကာမိုးစခန်းတွေမှာ စစ်ကောင်စီအလောင်း ၁၀ လောင်းနဲ့ လက်နက်ခဲယမ်းမျိုးစုံသိမ်းဆည်းရမိတယ်လို့ ပြောပါတယ်။
မိုးမိတ်မှာတော့ မနေ့ ဇွန်လ ၂၉ ရက် မနက် ၅း၂၀ အချိန်ကစပြီး ရွှေဆာလီရွာ၊ လွယ်ဝိန်းရွာ၊ နဲ့ လယ်ကြီးရွာတွေ စကခ(၂၁) ခလရ(၂၂၃)၊ ခမရ(၃၄၈) တို့မှာ တိုက်ပွဲတွေ ဖြစ်ပွားခဲ့တယ်လို့ ဆိုပါတယ်။
တိုက်ပွဲ ၅ ရက်တာကာလအတွင်း ကျောက်မဲ၊ နောင်ချိုနဲ့ မိုးကုတ် ၃ မြို့မှာ ဒေသခံအရပ်သား ၂၂ ဦး သေဆုံးခဲ့ပြီး ဒဏ်ရာရသူ ၃၀ ဦးထိရှိခဲ့တယ်လို့ သိရပြီး နောင်ချို၊ ကျောက်မဲ၊ မိုးကုတ် မြို့တွေက စစ်ရှောင် ၃၀၀၀ နီးပါး အထိရှိနေတယ်လို့ သိရပါတယ်။
MK-012
