မဲခေါင်၊ ဇွန် ၂၄
မန္တလေးတိုင်း၊ မြင်းခြံမြို့နယ်၊ ဆခမ ကျေးရွာက ခန်းနေဆရာတော် ဦးဥတ္တမကို ဇွန်လ ၂၂ ရက် ည ၉ မှာ စစ်ကောင်စီက ပစ်သတ်ပြီး ဒေသ PDF တွေက ပစ်သတ်တယ်လို့ စစ်ကောင်စီက သတင်းထုတ်ပြန်လာတာ တွေ့ရပါတယ်။
ပဲခူး ဝင်းနိမ္မိတာရုံ ဆရာတော်ဘုရားကို စစ်ကောင်စီက မြို့သာ ဘက်မှာပစ်သတ်ပြီးနောက် ယခု ထပ်မံပြီး ဦးဥတ္တမ ပစ်သတ်ခံရတာဖြစ်ကာ စစ်ကောင်စီက ၄င်းတို့လက်ချက်မဟုတ်ပဲ Myingyan Black Tiger PDF တွေရဲ့လက်ချက်လို့ သတင်း ထုတ်ပြန်လာတာ ဖြစ်ပါတယ်။
စခမကျေးရွာက မဝင့်ဝါအေး ၂၈ နှစ် ဗိုက်အောင့်လို့ မြတ်ပုည ပရဟိတကားကို ဆရာတော် ဦးဥတ္တမကမောင်းပြီး ဦးအောင်မျိုးသောင်း အသက် ၄၀ နှစ်က လိုက်ပါကာ လူနာပို့ပြီးအပြန်မှာ ပစ်ခံရတာလို့ သိရပါတယ်။
“ဆရာတော် ဦးဥတ္တမက ညရေးညတာ လူနာအရေးကြီးရင် အဖွဲ့ဝင်တွေ ပြဿနာဖြစ်မှာစိုးလို့ သူကိုယ်တိုင် မောင်းပို့တာတွေရှိတယ်။ ကျေးရွာအပေါ် အင်မတန် စေတနာထားတဲ့ ကိုယ်တော်ကြီးပါ။ လူနာတင်ကားမှန်းလည်း သိတယ်၊ ဘုန်းကြီးမှန်းလည်း သိတယ်၊ တမင်တကာ ပစ်ခတ်တာဟာ မိစ္ဆာလုပ်ရပ်ပဲ”လို့ ဒေသခံ တစ်ဦးက မဲခေါင်သတင်းဌာနကို ပြောပါတယ်။
စစ်ကောင်စီတပ်ရဲ့ ပစ်ခတ်မှုကြောင့် သက်တော် ၅၀၊ ၀ါတော် ၁၂ ၀ါရှိ ဆရာတော် ဦးဥတ္တမမှာ ဦးခေါင်းကို ထိတာအပါအဝင် သေနတ်ဒဏ်ရာ ၄ ချက်ထိမှန်လို့ ပျံလွန်တော်မူရတာဖြစ်ပြီး ဦးအောင်မျိုးသောင်းကတော့ ခြေသလုံးနဲ့နားနောက် (မစိုးရိမ်)ရဒဏ်ရာတွေရရှိခဲ့လို့ ဆေးရုံတင်ကုသနေတယ်လို့သိရပါတယ်။
စစ်ကောင်စီက စွပ်စွဲခဲ့တဲ့ Myingyan Black Tiger PDF ကတော့ လူနာလာပို့တဲ့ဆရာတော်ကို စစ်တပ်က ပစ်ခတ်သတ်ဖြတ်တာဖြစ်ပြီး အဖွဲ့နဲ့ လုံးဝ(လုံးဝ)မသက်ဆိုင်ကြောင်း၊ တပ်ဖွဲ့ဟာ မြင်းခြံမှာ စစ်ရေးလှုပ်ရှားမှုမရှိသလို မြင်းခြံအနီးမှာလည်း မရှိကြောင်း၊ ၄င်းတပ်ဖွဲ့ရဲ့ အမှတ်-၉တပ်ရင်းဟာ စစ်အာဏာရှင်ကို တိုက်ပွဲဝင်နေတာသာဖြစ်ပြီး ရဟန်းရှင်လူ၊ မိဘပြည်သူတွေကို ဘယ်တုန်းကမှ သေနတ်ပြောင်းမလှည့်ခဲ့သလို MOD အောက်က တရားဝင်တပ်ရင်းဖြစ်ကာ စစ်ကောင်စီလော်ဘီတွေတင်သလို တပ်ဖွဲ့က လုပ်တာမဟုတ်ဘဲ ယင်းအခင်းဖြစ်ပွားရာနေရာမှာ PDF လှုပ်ရှားမှုတွေ မရှိဘဲ စစ်တပ်ကင်းပုန်းဝပ်တဲ့နေရာသာဖြစ်လို့ စစ်တပ်ဘက်ကသာ ကျူးလွန်တာလို့ မနေ့ ဇွန်လ ၂၃ ရက်၊ နေ့လည် ၂ နာရီခွဲမှာ သတင်းထုတ်ပြန်ထားပါတယ်။
MK-012
