မဲခေါင်၊ ဇွန် ၆
ကယား (ကရင်နီ)ပြည်၊ လွိုင်ကော်မြို့၊ မိုင်းလုံးရပ်ကွက်မှာ နေထိုင်သူတွေဟာ ဇွန်လ ပထမပတ်အတွင်း တတိယအကြိမ်မြောက် စစ်ဘေးရှောင်နေရတယ်လို့ တော်လှန်ရေးအင်အားစုတွေက ပြောပါတယ်။
မိုင်းလုံးရပ်ကွက်မှာ နေထိုင်သူတွေဟာ ၂၀၂၂ ခုနှစ် ဇွန်လမှာ တစ်ကြိမ်၊ ၂၀၂၃ ခုနှစ် နိုဝင်ဘာလမှာ တစ်ကြိမ်နဲ့ အခုတစ်ကြိမ် အပါအဝင် ၃ ကြိမ်မြောက် စစ်ရှောင်နေရတာပဲ ဖြစ်ပါတယ်။
ရပ်ကွက်တွင်း နေထိုင်သူတစ်ဦးက “ပြည်သူတွေက ပြန်လာတာ ဘယ်လောက်မှတောင် မကြာသေးဘူး။ ထပ်ရှောင်ရပြီ။ ဒါတောင်မှ ကံကောင်းလို့ သတင်းရလို့။ စစ်တပ်ဘက်က တိုက်ပွဲဖြစ်မယ်ဆိုရင် ကြိုပြောတာမျိုး မရှိဘူး။ လောလောဆယ်တော့ ချေးငှားပြီးတော့ ရှောင်နေရတယ်” လို့ ပြောပါတယ်။
၁၁၁၁ စစ်ဆင်ရေးကတည်းက တိမ်းရှောင်နေတဲ့ စစ်ဘေးရှောင်တွေဟာ မေလ နောက်ဆုံးပတ်မှာပဲ နေရပ်ပြန်လာကြတာဖြစ်ပြီး အခု ၂ ပတ်နီးပါးအကြာမှာ စစ်ဘေးထပ်ရှောင်ရတဲ့အတွက် ငွေကြေးနဲ့ စားနပ်ရိက္ခာ အခက်အခဲတွေ ကြုံနေရတယ်လို့ ဆိုပါတယ်။
စစ်ဘေးရှောင်ဖို့အတွက် ဘယ်အဖွဲ့အစည်းကမှ ညွှန်ကြားတာမျိုး မဟုတ်ဘဲ စစ်ကောင်စီတပ်ရဲ့ တပ်တွင်းအရင်းအမြစ် ကနေတစ်ဆင့် သတင်းရတာကြောင့် ရပ်ကွက်နေပြည်သူတွေက ကြိုတင် တိမ်းရှောင်ကြတာလို့ သိရပါတယ်။
ရှေ့တန်းမြေပြင် သတင်းအရင်းအမြစ် တစ်ဦးက “မြေပြင်အခြေအနေကတော့ ကျနော့် တစ်ဦးတည်း အမြင်ပြောရရင် စစ်မြေပြင်အနေနဲ့ ချဲ့ထွင်စိုးမိုး လာနိုင်ပေမဲ့ ထိုးစစ်နဲ့အတူ ခံစစ်ပါ ပြင်ထားရမှာပါ။ ရိုးရိုးမြေပြင် အနေအထားကတော့ ပြည်ထဲရေးပိုင်းကို တာဝန်ယူတဲ့ KSP (ကရင်နီပြည် ရဲတပ်ဖွဲ့ ) အနေနဲ့ အထူးတပ်မ ၁ မှာလည်း အထူးသဖြင့် ဒလန် မစိမ့်ဝင်နိုင်အောင် ထိန်းချုပ်နိုင်ရမှာပါ။ မဟုတ်ရင်တော့ IEC အနေနဲ့ ဘယ်လောက်ရာခိုင်နှုန်း ထိန်းချုပ်နိုင်ပြီပြောပြော ပြည်သူအသက် လုံခြုံရေးအတွက် အသက်အာမခံမှု ရာခိုင်နှုန်းက မရှိသလောက် နည်းသွားမှာပဲ” လို့ ပြောပါတယ်။
လတ်တလောမှာ မိုင်းလုံးရပ်ကွက်အတွင်း တိုက်ပွဲပြင်းထန်နေပြီး ကျန်ရှိနေတဲ့ ပြည်သူတချို့ကို ခြိမ်းခြောက်တာတွေ ပြုလုပ်နေတဲ့အပြင် ရပ်ကွက်နေရာတချို့မှာ မြေမြုပ်မှိုင်းတွေ ထောင်ထားတဲ့အတွက် လူမကျန်သလောက် ဖြစ်နေပြီလို့ ဆိုပါတယ်။
ဒါ့အပြင် စစ်ကောင်စီတပ်က မိုင်းလုံးရပ်ကွက်ရှိ GTC တက္ကသိုလ်၊ ရွှေလက်ဝါးဘုန်းကြီးကျောင်း၊ တောင်စျေးအနောက်ခြမ်း ရတနာသီရိရဲ့ တောင်ပေါ်နေရာတွေမှာ တပ်စွဲထားပြီး တွေ့မြင်သမျှ လူတွေကို ချောင်းမြောင်းပစ်ခတ်နေတယ်လို့ မြေပြင်သတင်းအရစ်အမြစ်တွေဆီက သိရပါတယ်။
MK-014
