မဲခေါင် မေ ၂၈
ကွက်ခိုင်မြို့နယ်အတွင်း ရှမ်းဘာသာနဲ့ရေးသားထားတဲ့ ရွာအဝင်ဆိုင်းဘုတ်တွေကို တအာင်းဘာသာနဲ့ လိုက်လံအစားထိုးနေတဲ့အပေါ် TNLA တပ်ဖွဲ့အနေနဲ့ သိရှိခြင်းမရှိသေးဘူးလို့ ပြောရေးဆိုခွင့်ရှိသူထံက သိရပါတယ်။
အဲ့ဒီဖြစ်စဥ်နဲ့ ပတ်သက်ပြီး TNLA ရဲ့ ပြောရေးဆိုခွင့်ရှိသူ ဗိုလ်မယေဦးက “ဆိုင်းဘုတ်ဖျက်ခံရတဲ့ကိစ္စတော့ ကျမဆီ မရောက်သေးဘူး။ သိလည်း မသိရသေးဘူးပေါ့နော်။ အတူယှဥ်တွဲနေထိုင်ကြတဲ့ အဲ့ဒီတိုင်းရင်းသားတွေနဲ့ ပတ်သက်ပြီး ငြိမ်းချမ်းစွာအတူယှဥ်တွဲနေထိုင်ရေးကို လက်ခံထားပါတယ်။ တိုင်းရင်းသားအချင်းချင်းကြားမှာ အငြင်းပွားမှုတစ်စုံတစ်ရာ ဖြစ်လာမယ်ဆိုရင်လည်း နိုင်ငံရေးနည်းနဲ့ပဲ ဆွေးနွေးသွားဖို့ရှိပါတယ်။ ဒီဖြစ်ရပ်တွေ အပေါ် လူထုက စိုးရိမ်စရာ မရှိပါဘူး။ မူလအတိုင်း အေးအေးချမ်းချမ်း နေထိုင်နိုင်ပါတယ်” လို့ ပြောပါတယ်။
ရှမ်းပြည်မြောက်ပိုင်း၊ ကွတ်ခိုင်မြို့နယ်၊ မိုင်းယုလမ်းခွဲက ရှမ်းဘာသာနဲ့ရေးသားထားတဲ့ ရွာအဝင်ဆိုင်းဘုတ်တွေကို ဒေသခံတွေရဲ့ သဘောထားမပါဘဲ တအောင်းအမျိုးသားလွတ်မြောက်ရေးတပ်မတော် (TNLA) က တအောင်းဘာသာနဲ့ ပြင်ဆင်အစားထိုးလိုက်တယ်လို့ စုံစမ်းသိရပါတယ်။
မူရင်းရှမ်းဘာသာနဲ့ မြန်မာဘာသာရေးထိုးထားတဲ့ ရွာအဝင်ဆိုင်းဘုတ်တွေကို ဒေသခံတွေရဲ့ သဘောဆန္ဒ မပါဘဲ ပန်လော့ရွာအုပ်ချုပ်ရေးမှူးနဲ့ ဆွေးနွေးပြီး ပြောင်းလဲခဲ့တာလို့ ဆိုပါတယ်။
ဒေသတွင်း ရှမ်းအမျိုးသားရေး တက်ကြွလှုပ်ရှားသူတစ်ဦးက “လူမျိုးတစ်မျိုးရှိတဲ့နေရာကို နောက်ထပ်လူမျိုး တစ်မျိုးက လာအုပ်ချုပ်တဲ့အခါ သူတို့ဘာသာပြောင်းတာတော့ မထူးဆန်းပါဘူး။ ဥပမာ ဟိုပန်ဆိုရင် ဗမာစာနဲ့ ဝစာ တွဲသုံးတယ်ပေါ့။ ဒါပေမယ့် မူလရှိပြီးသား ပြောင်းလိုက်တဲ့ဟာက အရင်ကတည်းက ရှမ်းဘာသာနဲ့လေ၊ အတူတူရောနှောနေထိုင်တဲ့ မိုင်းယုလိုမျိုးဆိုရင်တော့ ဒါက ပြဿနာရှိတယ်ပေါ့နော်” လို့ ပြောပါတယ်။
ယခုကဲ့သို့ TNLA အနေနဲ့ ဒေသခံတွေရဲ့ သဘောထားမပါဝင်ဘဲ ရွာအဝင်ဆိုင်းဘုတ်တွေကို တအာင်းဘာသာပြောင်းလဲရေးသားခြင်းမှာ အာဏာရှင်ဆန်တာဖြစ်ကြောင်းနဲ့ လူမျိုးစုနှစ်ခုအကြားမလိုအပ်ဘဲ ပဋိပက္ခပိုမိုကြီးထွားလာစေနိုင်ကြောင်း ရှမ်းတိုင်းရင်းသားတွေက ဆိုပါတယ်။
ရွာခံတွေ ကန့်ကွက်နေတဲ့ကြားက မေလ ၈ ရက်နေ့မှာ TNLA တပ်သားတွေ ရောက်ရှိလာပြီး ရွာအဝင်ဆိုင်းဘုတ် ကို တအောင်းဘာသာနဲ့ အစားထိုးရုံတင်မကဘဲ ရှမ်းအလံ၊ သာသာနာ အလံတွေလည်း ဖြုတ်ချသွားတယ်လို့ သိရပါတယ်။
ဒေသတွင်းနေထိုင်တဲ့ ပလောင်တိုင်းရင်းသားတစ်ဦးက “TNLA အနေနဲ့ အရင်က ဒီလိုခွဲခြားဆက်ဆံတာမရှိပေမယ့် အခုနောက်ပိုင်း သူတို့သိမ်းတဲ့မြို့တွေမှာလုပ်လာတာတွေ့ရတယ် တအာန်းလူမျိုးတစ်ယောက်အနေနဲ့ ကျွန်တော်လဲ မကြိုက်ပါဘူး၊ တနေရာတည်းမှာနေတဲ့ တိုင်းရင်းသားအချင်းချင်း အမုန်းပွားတာတွေပိုဖြစ်လာနိုင်တယ် “လို့ ပြောပါတယ်။
TNLA အနေနဲ့ အုပ်ချုပ်မှုနယ်မြေအတွင်းနေထိုင်တဲ့ တခြားတိုင်းရင်းသားတွေရဲ့ ရိုးရာယဉ်ကျေးမှုကို လေးစားသင့်ကြောင်းနဲ့ ဖိနိုပ်မှုတွေက ဒေသတွင်း မတည်ငြိမ်မှုကို ပိုမိုဖြစ်ပေါ်လာစေတယ်လို့ တအာန်းလူမျိုး တက်ကြွလှုပ်ရှားသူ တစ်ဦးကပြောပါတယ်။
ကွတ်ခိုင်မြို့ကို ၁၀၂၇ စစ်ဆင်ရေးအတွင်း ဇန်နဝါရီလ ၈ ရက်လောက်ကစလို့ စစ်ကောင်စီရဲ့ ခြေလျင်တပ်ရင်း တွေဖြစ်တဲ့ ခမရ ၂၄၁၊ ၂၄၂၊ ၂၄၅ နဲ့ အမြောက်တပ်ရင်း ၂၄၇ တို့ကို မြောက်ပိုင်းမဟာမိတ်တွေနဲ့အတူ TNLA က တိုက်ခိုက်သိမ်းယူပြီးနောက် မြို့ကို ထိန်းချုပ်ထားပါတယ်။
ဒါပေမယ့် ကွတ်ခိုင်မြို့ပေါ်မှာတော့ ကိုးကန့် တပ်မတော် (MNDAA) နဲ့ ကချင်လွတ်မြောက်ရေးတပ်မတော် (KIA) တို့လည်း နေရာတချို့မှာ တပ်ခွဲထားပြီး ရွာဘက်ခြမ်းတွေကိုတော့ TNLA က အုပ်ချုပ်ရေးယန္တရား အပြည့်အဝ လည်ပတ်နေပြီလို့ ဆိုပါတယ်။
မိုင်းယုလမ်းခွဲက ကျေးရွာတွေမှာ ရှမ်း၊ ကချင်၊ ဗမာ၊ လီဆူ စတဲ့တိုင်းရင်းသားအများစု နေထိုင်ကြပြီး တအောင်းတိုင်းရင်းသားလူနည်းစုသာ ပါဝင်တာကြောင့် TNLA ရဲ့ အခုလိုလုပ်ရက်ဟာ ဒီမိုကရေစီနည်းလမ်း မကျဘူးလို့ ဒေသခံတွေကြားမှာ ဝေဖန်ပြောဆိုနေကြပါတယ်။
အလားတူ ကျောက်မဲမြို့နယ်၊ မိုင်းငေါ့မြို့အဝင်ဆိုင်းဘုတ်ကိုလည်း ရှမ်းဘာသာနဲ့ ရေးထိုးထားတဲ့ နောက်ကျောဘက်မှာ TNLA က ဒေသခံတွေရဲ့ သဘောထားမပါဘဲ တအောင်းစာပေကို ဖြည့်စွက်ထားတယ်လို့ ဒေသတွင်း သတင်းအရင်းမြစ်တွေဆီက သိရပါတယ်။
MK 014
