မဲခေါင်၊ မေ ၂၈
ရှမ်းတောင်၊ အောင်ပန်းမြို့ရဲ့ မီးလုံးယမ်းပေါက်ကွဲမှုထဲကလူနာ ၄ ဦးမြောက် မနေ့ မေ ၂၇ ရက်နေ့ ညနေက တောင်ကြီး စဝ်စံထွန်းဆေးရုံမှာဘဲ ဆေးကုသရင်း သေဆုံးခဲ့တယ်လို့ သိရပါတယ်။
မေလ ၂၅ ရက် ညနေပိုင်းက အောင်ပန်းမြို့၊ ရပ်ကွက်(၃)၊ အေးမြင့်သာယာရပ်ကွက်မှာ မီးလုံးယမ်းပေါက်ကွဲလို့ အိမ်မီးလောင်တာအပြင် လူ ၂ ဦး ပြင်းထန်တဲ့ဒဏ်ရာတွေ ရရှိခဲ့လို့ တောင်ကြီးစဝ်စံထွန်းဆေးရုံမှ ကုသရင်း မေလ၂၆ရက် မနက်ပိုင်းက ၁ ဦးနဲ့ စုစုပေါင်း ၂ ဦးလုံး သေဆုံးသွားခဲ့ရပြီး တစ်လထဲ ၄ ဦးထိ သေဆုံးခဲ့တာပါ။
“အခု ဆုံးသွားတဲ့သူက စတွေ့ကတဲက တစ်ကိုယ်လုံးအရေပြားတွေ လန်ကုန်တာ၊ ခြေသည်းလက်သည်းတွေပါ ကျွတ်ထွက်နေတာ အခြေအနေမကောင်းဘူး၊သူက လူငယ်ဆိုတော့ နည်းနည်း ခံနိုင်သွားတာထင်တယ်၊ သူ့ဆရာကတော့ အရင်ဆုံးရှာတယ်၊ သူက အဲဒီမီးလုံးပညာလာသင်တာလို့ သိရတယ်”လို့ ဒေသခံတစ်ဦးက မဲခေါင်သတင်းဌာနကို ပြောပါတယ်။
မေလ ၁၄ ရက် ပထမ အအကြိမ်ပေါက်ကွဲတုန်းက အိမ်အဝင်မှာ ထိတဲ့ ဦးဝင်းဦးကတော့ ၄၀% မီးလောင်ကျွမ်းခံရတာကနေ ပြန်သက်သာလာနေပြီလို့ သိရပါတယ်။
ဒီ လုဖုဲင်ခေါ် မီးလုံးကို ယမ်းစပ် ယမ်းထောင်းရာမှာ ယခင်က သစ်သားဆုံ သစ်သားကျည်ပွေ့တွေကိုသာ သုံးပေမယ့် ခုနောက်ပိုင်း ကြိတ်စက်ကို အသုံးပြုလာတာရှိတယ်လို့သိရပြီး ယခု ဒုတိယပေါက်ကွဲမှုဟာ ယမ်းကြိတ်စက်ကြောင့် ဖြစ်နိုင်တယ်လို့ ဒေသခံတစ်ဦးကပြောပါတယ်။
“မီးလောင်သွားတဲ့အထဲမှာ ယမ်းကြိတ်စက်လဲပါတယ်၊ အေးသာယာ၊ တောင်ကွေ့က အနိုင်ရထားတဲ့ သိန်း ၁ ထောင်လဲပါတယ်၊ အဲ့မီးဆရာကတော့ အိမ်မှာ မရှိဘူး”လို့ ပြောပါတယ်။
ယမ်းပေါက်ကွဲပြီး လူတွေသေ၊ အိမ်မီးလောင်တာတွေကို ဥပဒေပိုင်းဆိုင်ရာအနေနဲ့ ဘယ်လို့အရေးယူတယ်ဆိုတာ မသိပေမယ့် ဖြစ်ပြီးမှအရေးယူတာထက် မဖြစ်ခင်ကို ဒီလိုမတော်တဆမှုတွေ မဖြစ်အောင် သေသေချာချာ စိစစ်တင်းကြပ်သင့်တယ်လို့ ဒေသခံတွေကဝေဖန်ကြပါတယ်။
“ရှမ်းတောင်က ရွာတိုင်းလုပ်တာ အခြားနေရာတွေ မကြားရသလောက်ပဲ၊ ရွှေညောင်မှာဖြစ်တာ၊ လူမသေဘူး၊ မီးမလောင်ဘူး၊ အခုကအနိုင်ရလိုအားကြီးနဲ့ မတော်မတည့် ယမ်းတွေ သုံးနေကြလို့ဖြစ်မယ်”လို့ ယမ်းစပ်ဆရာတစ်ဦးက သုံးသပ်ပြောဆိုတယ်လို့ သိရပါတယ်။
မီးလုံးယမ်းတွေကို အရင်က ပြည်ပက မှာယူသုံးပေမယ့် အခုက စျေးကြီးတာ၊ သယ်ယူရမလွယ်တာတွေအပြင် ဒီမှာပဲ ကျည်ဆံယမ်း၊ အမြာက်ဆံယမ်းတွေ ရတာလွယ်ကူနေလို့ အဲဒီယမ်းတွေကို စပ်ရင်း ထောင်းရင်း ကြိတ်ရင်း ဖောက်ရင်း အဆင့်တဆင့်ဆင့်မှာ ပေါက်ကွဲရတာလို့သူက ပြောပါတယ်။
ယင်းမိုးခေါ်ပွဲခေါ် ပအိုဝ်းဘာသာနဲ့ ပွယ်လူးဖုဲင် (မီးလုံးပွဲတော်) ကို ပအိုဝ်း၊ ဓနု၊ တောင်ရိုး လူမျိုးတွေ ကဆုန်၊ နယုန် လတွေမှာ ကျင်းပပြုလုပ်ကြသလို ရှမ်းတောင် နမ့်စန်မြို့က ယင်းကြားလူမျိုးတွေလဲ ပြုလုပ်ကြတယ်လို့ သိရပါတယ်။
အလားတူ ထိုင်းနိုင်ငံမြောက်ပိုင်းမှာလည်း ကျင်းပကြတာမှာ မြန်မာပြည်တွင်းကထက် မီးလုံးပိုကြီး ပိုရှည်ပြီး ပစ်လွှတ်စင်အမြင့်ကြီးတွေအပေါ် ကြိုးဆွဲတင်ပြီး ပစ်လွတ်ကြတာရှိနေပြီး စနစ်ကျတာကြောင့် ပေါက်ကွဲမှု ဖြစ်တာမတွေ့ မကြားရဘူးလို့ သိရပါတယ်။
ယခုနှစ်မှာတော့ စစ်တိုင်းမှူးတွေကိုယ်တိုင်ဖွင့်လှစ်ပေးတဲ့ ရှမ်းတောင်က မီးလုံးအကြီးဆုံး၊ လုံးရေအများဆုံးနဲ့ ဆုကျပ်သိန်း ထောင်ချီရှိတဲ့ ပေါမူရွာ ပြိုင်ပွဲကို လုံခြုံရေးအခြေအနေအရ ပြုလုပ်မှာမဟုတ်ဘူးလို့ ဒေသခံတွေက ပြောနေကြပါတယ်။
MK-012
