မေ ၂၇၊ ၂၀၂၄
ရှမ်းပြည်နယ် မြောက်ပိုင်း၊ ပန်ဆိုင်း (ကြူကုတ်) ဖိုင်ကောင်းရွာရှိ စာသင်ကျောင်းဝင်းက ကချင် အမျိုးသားအလံကို ယမန်နေ့ မေလ ၂၆ ရက်နေ့ မွန်းလွဲ ၁ နာရီခန့်မှာ MNDAA တပ်ဖွဲ့က ဖြုတ်ချသွားခဲ့ကြောင်း ဒေသခံတွေဆီက သိရပါတယ်။
“ခါ့လွမ်ရွာနဲ့ ဖိုင်ကောင်းရွာ တွေမှာ ရှိတဲ့ စာသင်ကျောင်း ၂ ကျောင်းက အလံတွေ ဖြုတ်ချသွားတာ” လို့ ဒေသခံ တစ်ဦးက ပြောပါတယ်။ ကိုးကန့် MNDAA တပ်ဖွဲ့ ဘက်က ကား ၈ စီး လောက်နဲ့ လာပြီး အလံ ဖြုတ်ချသွားတယ်လို့ သူက ပြောပါတယ်။
“အလံကို တိတ်တိတ်လေး ခိုးဖြုတ်ပြီးတော့ ထွက်ပြေးသွားတာ။ တမင် လာဖျက်တီးတာပါ” လို့ နောက်ထပ် ဒေသခံတစ်ဦးက ပြောပါတယ်။
အဲဒီ အလံက KIA စစ်တပ် အလံ မဟုတ်ဘဲ ကချင်အမျိုးသား အလံဖြစ်ကြောင်း၊ အဲဒီ ကျောင်းဝင်းထဲမှာ ကိုးကန့် MNDAA ရဲ့ အလံလည်း ထောင်ထားတာ ရှိကြောင်း သူက ပြောပါတယ်။
“အလံ ဖြုတ်လိုက်ကြတာ ဟုတ်တယ်။ ပြန်တောင်းပြီး ပြန်လွှင့်တင်ထားပြီ” လို့ KIA အရာရှိ တစ်ဦးက ပြောပါတယ်။ KIA တပ်ဖွဲ့တွေက ယမန်နေ့ မေလ ၂၆ ရက်နေ့မှာ ကိုးကန့် MNDAA တပ်ဖွဲ့ ရဲ့ မုံးကိုးမြို့နယ်ရုံး ဖွင့်ပွဲ ရှိနေတာကြောင့် မုံးကိုးဘက် သွားရောက်နေကြတာလို့ သူက ပြောပါတယ်။
ဖိုင်ကောင်းရွာမှာတော့ ကချင်လူမျိုး အများဆုံးနေထိုင်တဲ့ ရွာဖြစ်ပြီး ပြီးခဲ့တဲ့ မတ်လ ၂၁ ရက်နေ့ကလည်း ကိုးကန့် MNDAA တပ်ဖွဲ့က အဲဒီ ဖိုင်ကောင်း စာသင်ကျောင်းက ကချင်အမျိုးသား အလံကို ဖြုတ်ချဖို့ ဖိအားပေးခဲ့တယ်လို့ ဆိုပါတယ်။
၂၀၂၃ အောက်တိုဘာလ ၂၇ ရက်နေ့မှ စတင်ခဲ့ ၁၀၂၇ တော်လှန်ရေးမှာ ပန်ဆိုင်း( ကြူကုတ်) မြို့ကို MNDAA က နိုဝင်ဘာလ ၂ ရက်နေ့ တိုက်ခိုက်သိမ်းပိုက်ပြီး အုပ်ချုပ်နေတာဖြစ်ပြီး ၂၀၂၄ ဖေဖေါ်ဝါရီ ဒုတိယပါတ်အတွင် ပန်ဆိုင်း(ကြူကြုတ်)မြို့တွင်း KIA နဲ့ SSPP/SSA တပ်ဖွဲ့တွေကို ဝင်ရောက်ခြင်းမပြုဖို့ ထုတ်ပြန်ခဲ့တာတွေလည်း ရှိပါတယ်။
ရှမ်းမြောက် ကြူကုတ် ပန်ဆိုင်းဒေသဟာ ခေတ်အဆက်ဆက် ကချင်၊ ရှမ်းလူမျိုး လူမျိုးစုများ ပူးတွဲနေထိုင်တဲ့ နယ်မြေဖြစ်ပြီး ကချင်လွတ်လပ်ရေးတပ်မတော် KIA နဲ့ SSPP တို့ အဓိကလှုပ်ရှားတဲ့နယ်မြေဖြစ်ပါတယ်။
CJ-008
