မဲခေါင်၊ မေ ၂၂
ရှမ်းပြည်နယ်တောင်ပိုင်း၊ ပအိုဝ်းဒေသ ၊ ဆီဆိုင်မြို့ရဲ့အရှေ့ဘက်အနီးဝန်းကျင်က ရွာတွေဖြစ်တဲ့ ထီလီ၊ ခိုမုန်း၊ တုံပန်၊ လွယ်ထွယ်ရွာဘက်တွေမှာ တိုက်ပွဲတွေဖြစ်ပွားလို့ ဒေသခံ ၁ ထောင်ကျော် ဟိုပုံးနဲ့ ညောင်ရွှေဘက်ကို စစ်ဘေးရှောင်ကြရတယ်လို့ သိရပါတယ်။
မေလ ၂၀ ရက်ကနေ ယနေ့အထိ ၃ ရက်အတွင်း စစ်ကောင်စီတပ်နဲ့သူ့လက်အောက်ခံ PNA တွေက ရွာတွေဘက် စစ်ကြောင်းထိုး ဝင်ရောက်လာတာမှာ ဒေသခံတွေ ကြောက်လန့်ပြီးထွက်ပြေးပုန်းရှောင်ကြတာလို့ PNLA စစ်ဘက်ဆိုင်ရာပြောရေးဆိုခွင့်ရှိသူ က မဲခေါင်သတင်းဌာနကို ပြောပါတယ်။
“စစ်အုပ်စုတွေက ရွာတွေကိုဝင် သူကြီးနဲ့ရွာသူရွာသားတွေကို ဖမ်းသတ်ဖြတ်၊ ရွာထဲကို လက်နက်ကြီးနဲ့ပစ်လို့ကြောက်ပြီး ပြည်သူတွေ ထွက်ပြေးကြရတာပါ၊ ကိုယ်ကျိုးသမား စစ်ကောင်စီကို ကာကွယ်ပြီး ကိုယ့်အမျိုးသားချင်း သတ်ဖြတ်မှုတွေမလုပ်ကြဘဲ မှန်ကန်တဲ့ အမျိုးသားရေး လမ်းကြောင်းပေါ်ကိုတက်လာဖို့ အမြဲတန်းတိုက်တွန်းနေပါတယ်”လို့ ပြောရေးဆိုခွင့်ရှိသူ ခွန်ရိန်းယံက ပြောသည်။
ဆီဆိုင်မြို့ဒေသခံတွေကို ပြန်လာနေဖို့ စစ်ကောင်စီက ဖိအားပေးနေပေမယ့် ဖြစ်ပွားနေတဲ့ ဆီဆိုင်ရပ်ကွက် အောင်ချမ်းသာရပ်ကွက်၊ နယ်မြေ-၇ မှာနဲ့ နောင်ရင်းရွာဘက်ကို လက်နက်ကြီး ၂ လက် ထောင်ထားပြီး အနီးဝန်းကျင်ရွာတွေထဲ ပစ်ခတ်နေလို့ နှလုံးရောဂါနဲ့ သွေးနုသားနုမိခင်တွေ ပြန်လာဖို့ မသင့်သေးဘူးလို့ ဒေသခံတွေက ပြောနေကြပါတယ်။
“ပြန်လာတာ ၁၅ ရက်ပဲ ရှိသေးတယ်၊ ခု ထပ်ပစ်လာလို့ ထပ်ပြေးရပြန်ပြီ”လို့ လွယ်ထွယ်ရွာသားတစ်ဦးက လူမှုကွန်ရက်မှာ ဖော်ပြလာပါတယ်။
ပအိုဝ်းအမျိုးသား လူငယ်အစည်းအရုံးက ရှမ်းတောင်တိုက်ပွဲ (၁၁၂) ရက်အတွင်း ထုတ်ပြန်ချက်မှာ ပအိုဝ်းဒေသအတွင်း စစ်ဘေးရှောင် ၇၂၀၀၀ ဦးနဲ့အထက်ရှိတယ်လို့ ဖော်ပြထားပါတယ်။
MK-012
