မဲခေါင်၊ မေ ၁၆
ရှမ်းပြည်အရှေ့ပိုင်း၊ ကျိုင်းတုံအခြေစိုက်၊ တြိဂံတိုင်းစစ်ဌာနချုပ် လက်အောက်ခံ အမှတ် (၁၁) တန်းမြင့် လေ့ကျင့်ရေးသင်တန်းကျောင်းမှာ စုဆောင်းထားတဲ့ သူတွေကို ဒုတိယအသုတ်အဖြစ် စစ်သင်တန်းပေးနေတယ်လို့ သိရပါတယ်။
အဲ့ဒီ့သင်တန်းကို ရှမ်းအရှေ့မြို့များဖြစ်တဲ့ မိုင်းဆတ်၊ မိုင်းတုံ၊ တာချီလိတ်၊ မိုင်းပျဉ်း၊ ကျိုင်းတုံ၊ မိုင်းယောင်း၊ မိုင်းယန်း၊ တာချီလိတ်စတဲ့မြို့များက တိုင်းရင်းသားလူငယ်တွေကို ငွေပေးခေါ်ယူပြီး သင်တန်း ပို့လွှတ်ခဲ့တာလို့ သိရပါတယ်။
“ဒီမှာက လားဟူ များတယ်၊ အခါ၊ ရှမ်း၊ ဗမာ နည်းတယ်၊ အားလုံး ၅၂၈ ယောက်၊ သင်တန်းကတော့ အခြေခံ ၁၅ ရက် နဲ့ နောက် ၃၀ ရက် စုစုပေါင်း ၄၅ ရက်ပေါ့”လို့ အဲ့ဒီ့ သင်တန်းနဲ့နှီးစပ်သူ တစ်ဦးက မဲခေါင်ကို ပြောပါတယ်။
အဆိုပါ သင်တန်းတက်ဖို့ ရှမ်းရှေ့ မြို့တိုင်းလိုလိုက ၁ အိမ်ထောင် ကျပ် ငွေ ၂ သောင်းအပြင် သီးခြားငွေ စုဆောင်းပေးရတာ၊ မသွားချင်သူက ငွေ ၃ သိန်းနဲ့ အထက် ပေးနေရတာလို့ သိရပါတယ်။
“ရွာမှာ ဘာမှ သုံးစားမရတဲ့ ဆေးသမား၊ ငွေပေးပြီးတက်ခိုင်းရတာ၊ ငွေလဲ ရ ဆေးလဲပြတ်ဖြစ်ရင်တော့ အကောင်းဆုံးပဲပေါ့” လို့ သင်တန်းပို့ခံရတဲ့ မိသားစုဝင် တစ်ဦးက မဲခေါင်ကို ပြောပါတယ်။
စစ်ကောင်စီဟာ ဒုတိယပတ် စစ်သင်တန်းကို တစ်နိုင်ငံလုံးတစ်ပြိုင်နက် မေလ ၁၄ ရက် မှာဖွင့်လှစ်ခဲ့တာဖြစ်ပြီး ယခု ရှမ်းအရှေ့ ကျိုင်းတုံကနေ မိုင်းလားသွားလမ်းမှာရှိတဲ့ အမှတ်(၁၁) တန်းမြင့်လေ့ကျင့်ရေးသင်တန်းကျောင်း မှာ သင်တန်းပို့ချနေတာဖြစ်ပါတယ်။
စစ်အုပ်စုက ငွေပေးကာ၊ အဓမ္မဖမ်းဆီးကာ စုဆောင်းလာတဲ့ သူတွေကို အခြေခံ စစ်အခြေခံလေ့ကျင့်ရေးတပ်(၁၁)တပ်အပြင် တန်းမြင့် သင်တန်းကျောင်း(၁၄)ကျောင်းမှာပါ ဖွင့်လှစ်သင်ကြားပေးနေတာလို့ သိရပါတယ်။
၁၀၂၇ စစ်ဆင်ရေးမှာ လက်နက်ချ အညံ့ခံသူတွေ ထောင်ချီရှိခဲ့လို့ စစ်ကောင်စီဟာ ရှမ်းပြည်နယ်မှာ အင်အားအလုံးအရင်းနဲ့ စစ်သင်တန်းတွေပေးပြီး အင်အားပြနေတာလို့ စစ်ရေးလေ့လာသူတွေက သုံးသပ်ကြပါတယ်။
MK-012
