မဲခေါင်၊ မေ ၁၄
ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်ထဲက လျှပ်စစ်မီးမရရှိသေးတဲ့ ရွာတစ်ရွာကို ဓနုပြည်နယ်အမျိုးသားကာကွယ်ရေး တပ်တော် – DSNDA က ရွာလုံးကျွတ် လျှပ်စစ်မီးပေးနိုင်ခဲ့တယ်လို့ သိရပါတယ်။
“ ဒေသခံတွေအနေနဲ့တော့ အရမ်းပျော်နေကြပါတယ် အရင်ကဆို ထင်းမီးတွေနဲ့သုံးရတော့ ခုချိန်မှာ သူတို့အနေနဲ့ သဘာဝတောတောင်တွေလည်း ထိန်းသိမ်းလို့ ရသွားတာပေါ့” လို့ ဓနုပြည်နယ်အမျိုးသားကာကွယ်ရေးတပ်ဦး/ ဓနုပြည်နယ်အမျိုးသားကာကွယ်ရေးတပ်တော်မှ သတင်းနှင့်ပြန်ကြားရေးတာဝန်ခံ ကိုကျားပျံက ပြောပါတယ်။
DSNDA အနေနဲ့ ရွာငံမြို့နယ်တွင်းက လျှပ်စစ်မီးမရသေးတဲ့ ရွာတွေကို မီးပေးနိုင်ဖို့ ကြိုးစားခဲ့ရာ ပထမဆုံးအနေနဲ့ အိမ်ခြေ ၂၀၀ ကျော်ရှိတဲ့ ကျေးရွာတစ်ခုလုံးကို အိမ်ပေါက်စေ့ မီးပေးနိုင်ခဲ့တာ ဖြစ်တယ်လို့ သူကဆိုပါတယ်။
လျှပ်စစ်မီးပေးခြင်းအတွက် ငွေကြေးကောက်ခံခြင်းမရှိဘဲ DSNDA ကအကုန်အကျခံပြီး ပေးတယ်လို့ ဆိုပါတယ်။ မီးစက်နဲ့မီးပေးတာဖြစ်လို့ ညဘက်ပိုင်းကို ဦးစားပေးနေတာဖြစ်ပေမယ့် ရွာအတွင်းလမ်းမီးတိုင် ၁၀၀ ခန့်ကိုလည်း ဖွင့်ပေးတယ်လို့ သိရပါတယ်။
မီးရရှိထားတဲ့ရွာအတွက် မိုးရာသီမှာ ရာသီဥတုဒဏ်ကနေ စိတ်ချရအောင် နည်းပညာပိုင်းအရ ထပ်ပြီးဖြည့်တင်း ဆောင်ရွက်တာတွေလည်း လုပ်ဆောင်သွံားမယ်လို့ ဆိုပါတယ်။
ဒါ့အပြင် တခြားကျေးရွာတွေအတွက်လည်း မီးရရှိဖို့ ကြိုးစားသွားမယ်လို့ အဖွဲ့ရဲ့တာဝန်ရှိသူက ဆိုပါတယ်။
DSNDF အနေနဲ့ ဒေသဖွံ့ဖြိုးရေးသာမက စစ်ဆင်ရေးတွေလည်း ပြုလုပ်လျက်ရှိပါတယ်။ ပြီးခဲ့တဲ့ မတ်လ ၁၅ ရက်နေ့က ရွာငံမြို့၊ ရနဲကျေးရွာ အနီးဖြတ်သွားတဲ့ တပ်မ ၅၅ လက်အောက်ခံ (ခမရ-၄၂၀)မှ အင်အား ၁၃၀ ခန့်ပါဝင်တဲ့ ယာဥ်တန်းကို ဓနုပြည်နယ် အမျိုးသားကာကွယ်ရေးတပ်ဦး(DSNDF) က ကြားဖြတ်တိုက်ခိုက်ခဲံရာ စစ်ကောင်စီဘက်က ၂ ဦးသေဆုံးပြီး လက်နက်ခဲယမ်းတချို့ သိမ်းယူနိုင်ခဲ့တယ်လို့ ထုတ်ပြန်ချက်အရသိရပါတယ်။
ဓနုပြည်နယ် အမျိုးသားကာကွယ်ရေးတပ်ဦး/ ဓနုပြည်နယ်အမျိုးသားကာကွယ်ရေး တပ်တော် (DSNDF/DSNDA) ကို စစ်အာဏာသိမ်းပြီးနောက် ဓနုပြည်သူပြည်သားတွေ ဖိနှိပ်ချုပ်ချယ်ခံရမှုနဲ့ လူအခွင့်အရေးချိုးဖောက်ခံရမှုတို့ ဆက်တိုက်ပေါ်ပေါက်လာတာကြောင့် တော်လှန်လိုချင်စိတ် ပိုမိုပြင်းထန်လာတာကြောင့် ၂၀၂၃ခုနှစ်၊ နိုဝင်ဘာလ၊ ၂ရက်နေ့မှာ ဖွဲ့စည်း တည်ထောင်ခဲ့တာ လို့သိရပါတယ်။
CJ001
