မဲခေါင် မေ ၁၄
ဟိုပုံးမြို့နယ်၊ ကျောက်တန်းကျေးရွာအုပ်စုမှာ ပအိုဝ်းပြည်သူ့စစ်(PNA)က အခု တစ်ပတ်အတ္ငင်း မော်တော်ယာဉ်တွေကို အခွန်ကောက်ခံနေပြီး စိုက်ပျိုးရာသီ နီးကပ်လာတာကြောင့် ဒေသခံတွေအနေနဲ့ အခက်တွေ့နေတယ်လို့ စုံစမ်း သိရပါတယ်။
မေလအကုန် နောက်ဆုံးထည့်ဝင်ရမယ်လို့ သတ်မှတ်ထားပြီး ဒေသခံတွေအနေနဲ့ စိုက်ပျိုးစရိတ် စုဆောင်းထားတဲ့ငွေနဲ့ ဖြေရှင်းရမယ့်အပြင် ပမာဏ မပြည့်မီတာကြောင့် ရှိတဲ့ပစ္စည်းတွေ ချေးငှား ပေါင်နှံရောင်းချနေရတယ်လို့ ဆိုပါတယ်။
ကျောက်တန်းရွာခံ အသက် ၄၀ အရွယ် အမျိုးသမီး တစ်ဦးက “မြေဩဇာ၊ မျိုးစေ့၊ ပိုးသတ်ဆေးတွေ ဝယ်ဖို့ စုထားတာ အခုတော့ အကုန်ပေးရတော့မယ်။ မပေးလို့လည်းမရဘူး။ မပေးရင် ရှိတဲ့လူ စစ်မှုထမ်း ခေါ်မယ်ဆို ခက်ပြီလေ။ ရှိတာမှ ဒီသားတစ်ယောက်ပဲ ရှိတာ။ လူမသေ ငွေမရှားပေါ့နော်။ လောလောဆယ်က နီးရာဓါး ကြောက်ရတယ်” လို့ ပြောပါတယ်။
အခွန်နှုန်းထားအနေနဲ့ ဘက်ဟိုး၊ ကုန်တင်ကား၊ ထော်လဂျီတွေကို တစ်သိန်းကျပ်၊ အိမ်စီးကား တစ်စီးကို ၅ သိန်းကျပ်၊ ဆိုင်ကယ် တစ်စီးကို ၅ သောင်းကျပ် သတ်မှတ်ထားတဲ့အပြင် ကုန်စုံဆိုင်တွေကိုလည်း ဆိုင်အနေအထားပေါ် မူတည်ပြီး ၅ သောင်း/ တစ်သိန်းကျပ် ကောက်ခံနေတယ်လို့ ရွာခံတွေဆီက သိရပါတယ်။
PNA နဲ့ နီးစပ်သူ တစ်ဦးက “ကားတွေဆိုင်ကယ်တွေ ကောက်တာက သပ်သပ်ပေါ့။ နောက်ထပ် ကျေးရွာအုပ်စု တစ်ခုလုံးစာ သိန်း ၁၅၀ သပ်သပ် ထပ်ပေးရမှာ။ အဲတာကျ တစ်ရွာလုံး မျှခံရမှာ။ သူဌေးတွေက ပိုထည့်ကြမှာပေါ့” လို့ ပြောပါတယ်။
ဧပြီလတုန်းကလည်း ကျောက်တန်းကျေးရွာအုပ်စု တစ်ခုလုံးအတွက် စစ်အသုံးစရိတ်လို့ ဆိုကာ သိန်း ၉၀၀ ကျပ် ကောက်ခံခဲ့ဖူးပြီး နိုင်ငံခြားရောက် စစ်မှုထမ်း အကြုံးဝင် အမျိုးသားတွေကလည်း လူတစ်ဦး ၃ သိန်းကျပ်နှုန်းနဲ့ စစ်မှုထမ်း လူစားထိုးစရိတ် ပေးဆောင်ခဲ့ရပါသေးတယ်။
ပအိုဝ်းကိုယ်ပိုင် အုပ်ချုပ်ခွင့်ရေဒေသတွေမှာ စစ်ကောင်စီတပ်နဲ့ PNA ၂ ဖွဲ့လုံးက စစ်မှုထမ်း ခေါ်ယူနေပြီး စစ်သင်တန်း ၂ ပတ်ခန့်သာပေးကာ ရှေ့တန်း စစ်မြေပြင်ကို စေလွှတ်နေတာကြောင့် အဓမ္မစုဆောင်းခံရတဲ့ တပ်သားသစ်တွေဟာ မကြာခဏ ထိခိုက်သေဆုံးမှုတွေ ကြုံနေရတယ်လို့ PNA နဲ့ နီးစပ်သူတွေဆီက သိရပါတယ်။
MK014
