မဲခေါင်၊ မေ ၁၃
ထိန်းချုပ်နယ်မြေတွေအတွင်းမှာ တရုတ်ကျားဖြန့် အဖွဲ့တွေကို လုံးဝလက်မခံဖို့ တပ်မှူးတွေအပါအဝင် သက်ဆိုင်ရာဌာနတွေအားလုံးနဲ့ အရာရှိအရာခံ အဆင့်ဆင့်ကို ဒီနေ့ မေလ ၁၃ ရက်စွဲနဲ့ အမိန့်ကြေညာချက်တစ်စောင် SSPP က ထုတ်ပြန်လိုက်ပါတယ်။
ရှမ်းဘာသာနဲ့ ထုတ်ပြန်ထားတဲ့ အဲဒီစာမှာ စာကိုလက်ခံရရှိပြီးတာနဲ့ နေရာအနှံ့ကို စိစစ်ဆေးသွားဖို့ ညွန်ကြားထားတာတွေ့ရ
ပါတယ်။
အဲဒီထုတ်ပြန်စာမှာ တရုတ်ကျားဖြန့်လုပ်တဲ့သူတွေကို အဖွဲ့လိုက်ဖြစ်စေ၊ တစ်ဦးချင်းဖြစ်စေ ထိန်းချုပ်တဲ့နယ်မြေတွေအတွင်းမှာ ပုန်းအောင်း နေထိုင်ခွင့်လုံးဝ မရှိစေဖို့နဲ့ တွေ့ရှိပါက နယ်မြေအတွင်းက ချက်ချင်းမောင်းထုတ်ရမယ်လို့ ပါရှိပါတယ်။
ကျားဖြန့်တွေကို နေရာပေးပုန်းခို တိမ်းရှောင်ခိုင်းတဲ့သူ ပြည်သူဖြစ်စေ၊ စစ်သားဖြစ်စေ ဘယ်သူ့ကိုမဆို အလုပ်ကြမ်းနဲ့ထောင်ဒဏ်ချမှတ်မှာဖြစ်ပြီး ပုန်းခိုအောင်းတဲ့ နေရာတွေကိုပါ သိမ်းဆည်းသွားမယ်လို့ ဆိုပါတယ်။
ဒါ့အပြင် ကျားဖြန့်လုပ်သူတွေကိုလည်း ဖမ်းဆီးပြီး တရုတ်နိုင်ငံကို လွှဲအပ်ပေးသွားမယ်လို့ ပြောပါတယ်။
အဲဒီအမိန့်စာကို SSPP/SSA စည်းကမ်းထိန်းသိမ်းရေးကော်မရှင်ရဲ့ခေါင်းဆောင်ဖြစ်သူ ဗိုလ်ချုပ်ကြီးခေးတိုင်းက လက်မှတ်ရေးထိုး ထုတ်ပြန်ခဲ့တာဖြစ်ပါတယ်။
ကျားဖြန့်လုပ်ငန်းနဲ့ပတ်သက်ပြီး ဒေသထဲမှာ ရှိ၊ မရှိ မဲခေါင်အနေနဲ့စုံစမ်းမေးမြန်းရာမှာတော့ မိုင်းရှူးဒေသခံတစ်ဦးက “ဒီမှာက မီးလဲမမှန်၊ ဖုန်းလိုင်းကလည်း မကောင်းနဲ့ ကျားဖြန့်ကတော့ လုံးဝမရှိပါဘူး။ ဒေသလောင်းကစားကတော့ ရှိတယ်။ ဒါကလဲ ပြည်သူ့စစ်တွေနဲ့ပဲလုပ်ကြတာ” လို့ မဲခေါင်ကိုပြောပါတယ်။
အခြားရှမ်းတောင်မြို့နယ်တွေဖြစ်တဲ့ မိုးနဲ၊ နမ့်စန်၊ လင်းခေး၊ ကျေးသီး၊ မိုင်းနောင်ဘက်တွေမှာလည်း ကျားဖြန့်လုပ်ငန်းတွေ မရှိနိုင်ဘူးလို့ အဲဒီဒေသခံက သူ့ရဲ့အမြင်ကို ပြောပါတယ်။
နမ့်စန်ဧရိယာဖြစ်တဲ့ ပန်လျန်းဆိုင်က မတ်ကျန်းပြည်သူ့စစ်နဲ့ နားရိုင်းဘက်မှာတော့ တရုတ်လူမျိုးတွေရှိနေပေမယ့် လောင်းကစားဝိုင်းတွေသာရှိပြီး ကျားဖြန့်လုပ်ငန်းတွေ မတွေ့ရဘူးလို့ နမ့်စန်ဒေသခံတစ်ဦး ကပြောပါတယ်။
“ဟိုတလောကပဲ တရုတ်တွေထောင်နဲ့ချီဖမ်းပြီး တရုတ်ပြည်ကို ပြန်ဖို့တာ အများကြီးပဲ၊ ကျားဖြန့်လားဘာလားတော့မသိဘူး” လို့ သူက ပြောပါတယ်။
ရှမ်းမြောက်ဒေသတွေဖြစ်တဲ့ ကျောက်မဲ၊ သီပေါမြို့တွေမှာလည်း ကျားဖြန့်ငွေလိမ်ဂိုဏ်း မရှိကြောင်းဒေသခံတွေထံက သိရပါတယ်။
SSPP အနေနဲ့ ကျားဖြန့်လုပ်သူ ၈၈ ဦးကို ပြီးခဲ့တဲ့ ၂၀၂၃ခုနှစ်၊ နိုဝင်ဘာ ၂၃ရက်က ထိန်းချုပ်နယ်မြေဖြစ်တဲ့ နမ့်ခမ်းကနေ တရုတ်ဘက်ကို လွှဲပြောင်းပေးခဲ့တယ် သူတို့ရဲ့ ထုတ်ပြန်ချက်တွေအရ သိရပါတယ်။
အဲဒီမတိုင်ခင် ၂၀၂၃ ခုနှစ်၊ ဇန်နဝါရီလ ၂၉ ရက်ကတည်းကပင် ဗဟိုကော်မတီ မျက်နှာစုံညီအစည်းအဝေး က အွန်လိုင်းငွေလိမ်ဂိုဏ်း(ကျားဖြန့်)လုပ်ငန်းတွေကို ဆက်လက်ဖော်ထုတ်အရေးယူသွားမယ်လို့ ထုတ်ပြန်ကြေညာခဲ့ပါတယ်။
ပြီးခဲ့တဲ့ရက်ပိုင်းက ရှမ်းပြည်အခြေစိုက် ရွှေဖီမြေသတင်းဌာနက စုံစမ်းရေးသားဖော်ပြတဲ့ “မိုင်းရယ် ဒေသမှာ ခြေကုပ် ယူလာတဲ့ တရုတ်နိုင်ငံသားတွေ ဉီးဆောင်တဲ့ အွန်လိုင်း ငွေလိမ်ဂိုဏ်း” ဆိုတဲ့ သတင်းဆောင်းပါးမှာ အဲဒီဒေသဟာ SSPP လှုပ်ရှားတဲ့ ဒေသတစ်ခုဖြစ်တယ်လို့ ဖော်ပြထားတဲ့အပေါ် SSPP က ပြင်းပြင်းထန်ထန်ရှုတ်ချကြောင်း ထုတ်ပြန်ထားပါတယ်။
MK – 012
ပုံအညွှန်း – SSPP က နမ့်ခမ်းမြို့မှာ ကျားဖြန့်လုပ်နေတဲ့ တရုတ်နိုင်ငံသားတွေကို ဖမ်းဆီးစဉ်
