မဲခေါင်၊ မေ ၉
ကချင်ပြည်နယ်၊ ဗန်းမော်ခရိုင်၊ မိုးမောက်မြို့ထဲ မနေ့ မေ ၈ ရက်မှာ စစ်ကောင်စီက လေယာဉ်နဲ့ ဗုံးလာကြဲသွား နေအိမ်တချို့မီး ထပ်လောင်ကျွမ်းသွားကြောင်း ဒေသခံ တွေဆီက သိရပါတယ်။
“(မေလ ၇ ရက်နေ့) ဒီညနေတုန်းက Y12 လေယာဉ်နဲ့ ဗုံးလာကြဲသွားလို့ မိုးမောက် ဈေးကုန်းက နေအိမ်တွေ မီးလောင်နေပြန်ပြီ။ အရပ်သား ပြည်သူတွေရဲ့ နေအိမ်တွေ မီးလောင်ပြန်ပြီ” လို့ ဗုံးကြဲတာကို အဝေးမှမြင်တွေ့ခဲ့သူ တစ်ဦးက ပြောပါတယ်။
ယမန်နေ့က မိုးမောက်မြို့ထဲမှာ နေရာယူထားတဲ့ စစ်ကောင်စီ တပ်ဖွဲ့တွေကို KIA ပူးပေါင်း တော်လှန်ရေးတပ်ဖွဲ့တွေက ရှင်းလင်း တိုက်ထုတ်လိုက်ပြီဖြစ်ပြီး ခမရ – ၄၃၇ တော့ ရှိသေးတယ်လို့ ရှေ့တန်း သတင်း ရင်းမြစ် တစ်ဦးက ပြောပါတယ်။
“မိုးမောက်မြို့တော့ အကုန်ပျက်ပြီ” လို့ မိုးမောက်မြို့ထဲ သွားကြည့်ခဲ့တဲ့ ဒေသခံ တစ်ဦးက ပြောပါတယ်။
မနေ့ မေလ ၈ ရက်နေ့က စစ်ကောင်စီဘက်က Y12 လေယာဉ်နဲ့ ဗုံး အလုံး ၇၀ ထက် မနည်း လာကြဲသွားတာလို့ သူက ထပ်ရှင်းပြပါတယ်။
မေလ ၇ ရက်နေ့ကလည်း မေလ ၇ ရက်နေ့ နေ့လယ်ပိုင်းခန့်ကစလည်း မိုးမောက်မြို့ထဲက နေအိမ်တချို့ကို စစ်ကောင်စီတပ်က မီးရှို့တာကြောင့် ညပိုင်း အထိ ပြည်သူတွေရဲ့ နေအိမ် တချို့ မီးလောင်နေခဲ့တယ် လို့ ဒေသခံတွေက ပြောပါတယ်။
မေလ ၇ ရက်နေ့မှာ KIA နဲ့ ပူးပေါင်းတော်လှန်ရေး တပ်ဖွဲ့တွေဟာ မိုးမောက်၊ မံစီ နဲ့ ဗန်မော် စင်ခန်း တွေမှာရှိတဲ့ စစ်ကောင်စီရဲ့ ရဲစခန်းတွေနဲ့ တပ်စခန်း တချို့ကို သိမ်းပိုက်လိုက်တာ ဖြစ်ပါတယ်။
CJ-008
