မဲခေါင်၊ မေ ၄
လွတ်ငြိမ်းနဲ့လွှတ်ပြီးမှ စစ်ကောင်စီက ပြန်ဖမ်းသွားတဲ့ ကချင်နှစ်ခြင်းခရစ်ယာန်အဖွဲ့ချုပ်(KBC ) အကြံပေး သိက္ခာတော်ရဆရာတော် ဒေါက်တာခလမ်ဆမ်ဆွန်မှာ ကျန်းမာရေးအားနည်းပြီး ဆေးဝါးကုသမှုခံယူရန် လိုအပ်နေသူဖြစ်လို့ မိသားစုနေအိမ်သို့အမြန်ဆုံး ပြန်လည်ရောက်ရှိရန် အထူးမျှော်လင့်တယ်လို့ KBC က ထုတ်ပြန်ပါတယ်။
ဧပြီ ၁၇ ရက်က လွတ်ငြိမ်းနဲ့ပြန်လွတ်လာတဲ့ ဒေါက်တာခလမ်ဆမ်ဆွန်ကို အဲ့ဒီနေ့ ညပိုင်းမှာပဲ စစ်ကောင်စီက မေးမြန်းစရာရှိသည်ဟုဆိုကာ ပြန်ဖမ်းသွားပြီး ဒီနေ့အထိ ပြန်မရောက်သေးတာ ဖြစ်ပါတယ်။
စစ်ကောင်စီက ပြန်သွားပြီး လွှတ်ပေးခြင်းမရှိသေးတဲ့အတွက် ဆရာတော်နဲ့ မိသားစုဝင်များ၊ KBC အသင်းသူ/သားများအားလုံးက အထူးစိုးရိမ်ပူပန်နေတယ်လို့ KBC မေ ၃ ရက်မှာ ထုတ်ပြန်တောင်းဆိုတာ ဖြစ်ပါတယ်။
ဒေါက်တာခလမ်ဆမ်ဆွန်ကို ငြိမ်းချမ်းရေးကိစ္စတွေ ဆွေးနွေးဖို့ ခေါ်ထားတာဖြစ်တယ်လို့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက ပြောဆိုထားပါတယ်။
ဒေါက်တာခလမ်ဆမ်ဆွန်ကို မြောက်ပိုင်းတိုင်းစစ်ဌာနချုပ်က ဗိုလ်မှုးသူအောင်ဇော်က တရားလိုပြုလုပ်ပြီး မတရားအသင်းအက်ဥပဒေပုဒ်မ ၁၇(၁)၊ နိုင်ငံတော်အကြည်ညိုပျက်စေမှု ရာဇသတ်ကြီးပုဒ်မ ၅၀၅-က ၊ အကြမ်းဖက်ပုဒ်မ ၅၂(က) တို့နဲ့ တရားစွဲ ထောင် ၆ နှစ်ချထားတာ ဖြစ်ပါတယ်။
CJ-015
Photo : Kachinwaves
