မဲခေါင်၊ ဧပြီ ၁၇
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ ဟဲယာရွာမ၊ ပြင်လွန်ရပ်မှာ ဖမ်းဆီးခံထားရတဲ့ အရပ်သား ၂ ဦးဟာ ဒီနေ့ (ဧပြီ ၁၇)အထိ ပြန်မလွတ်သေးဘူးလို့ ရွာခံတွေက ပြောပါတယ်။
သူတို့ ၂ ဦးဟာ လူမှုကွန်ယက်စာမျက်နှာ (Facebook)ပေါ်မှာ နိုင်ငံရေးအကြောင်းအရာ (Post)တွေကို ဝေမျှ (Share)ခဲ့တာကြောင့် ဧပြီလ ၁၄ ရက်နေ့ကတည်းက ဖမ်းဆီးခံလိုက်ရတာ ဖြစ်ပါတယ်။
ပုဂ္ဂိုလ်ရေးအရ နီးစပ်သူ တစ်ဦးက “မိန်းကလေးက နိုင်ငံရေးပိုစ့်တွေ ရှယ်လို့တဲ့။ သူ့ Post တိုင်းမှာ ဖမ်းချင် ဖမ်းလို့ရတယ်လို့ တည့်ရေးထားတာ။ သူ့အိမ်နေရာလည်း ပြောပြထားတယ်။ ယောင်္ကျားလေးကတော့ PDF တွေနဲ့ အဆက်အသွယ်ရှိလို့ ပြောတယ်။ နိုင်ငံရေးပိုစ့် ရှယ်တာက ဟုတ်တယ်။ PDF အဆက်သွယ်ရှိတာက သက်သေမပြနိုင်ပါဘူး” လို့ ပြောပါတယ်။
ဖမ်းဆီးခံရသူ ၂ ဦးဟာ မောင်နှမတွေဖြစ်ပြီး မြတ်နိုင်းအိမ် အကောင့်ပိုင်ရှင် အသက် ၄၀ အရွယ် မမြင့်ကြည်နဲ့ အသက် ၂၅ နှစ်အရွယ် အယ်လဲကူးတို့ ဖြစ်တယ်လို့ အိမ်နီးချင်းတွေဆီက သိရပါတယ်။
သူတို့ရဲ့ မိတ်ဆွေ တစ်ဦးက “ယောင်္ကျားလေးကတော့ စစ်မှူထမ်းကြောက်လို့ PDF ထဲဝင်မယ် ပြောထားတာတွေ ရှိတယ်။ အဲဒါကို ဒလန်တွေ ကြားသွားလို့ တိုင်လိုက်တာ။ စစ်မှုထမ်းခိုင်းဖို့ ဖမ်းတာလို့လည်း ပြောနေတယ်။ ဘယ်လိုလဲတော့ မသိဘူး” လို့ ပြောပါတယ်။
လက်ရှိမှာ သူတို့ ၂ ဦးကို နန်းပန်မြို့၊ နယ်မြေ ရဲစခန်းမှာ ချုပ်နှောင်ထားပြီး တောင်ကြီးမြို့၊ အရှေ့ပိုင်းတိုင်း စစ်ဌာနချုပ် (ရပခ)ရဲ့ စစ်ကြောရေးစခန်းကို ပို့ဆောင်သွားမယ်လို့ ဆိုပါတယ်။
အခု ဖြစ်စဉ်မှာ ရွာခံ အများစုက ဒေါက်တာထွန်းလှိုင်ရဲ့ သမီး ဒေါ်မြတ်ကြေးမှုံက သတင်းပေးခဲ့တာကြောင့် ဖမ်းဆီးခံလိုက်ရတယ်လို့ ပြောဆိုထားပေမယ့် အတည်ပြုနိုင်တာမျိုး မရှိသေးပါဘူး။
MK-014
